ކ. ފުށިދިއްގަރު ފަރަށް ދެ އުޅަނދެއް އެރި މައްސަލައިގައި ކުރި 100 މިލިއަންގެ ޖޫރިމަނާ މިނިސްޓަރ އޮފް އެންވަޔަރމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާވެސް ދަމަހައްޓަވައިފިއެވެ.

"މުތާ ރޯޔަލް" ކިޔާ ޓަގު ބޯޓާއި "މުތާ ގްރޭސް" ކިޔާ ބާޖު ފުށިދިއްގަރު ފަޅަށް އަރާފައިވަނީ 2015 ވަނަ އަހަރުގެ ޑިސެމްބަރު މަހުގެ 27 ވަނަ ދުވަހުއެވެ. އޭރު އުޅަނދުތައް ނަގައި އެންވަޔަރމަންޓް ޕްރޮޓެކްޝަން އޭޖެންސީ (އީޕީއޭ) އަށް އަންގާފައިވަނީ 19 މާރޗު 2017 ގައެވެ.

އީޕީއޭއިން އެ ސަރަޙައްދު ބެލުމަށްފަހު ސާރވޭއެއް ކޮށްފައިވެއެވެ. އަދި ސާރވޭގެ މަސައްކަތް ނިންމާފައިވަނީ 18 ސެޕްޓެމްބަރު 2017 ގައެވެ. އެއަށްފަހު އެ ފަރާތް ޖޫރިމަނާ ކޮށްފައިވަނީ 14 މާރޗު 2018 ގައެވެ. އެއީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދުގެ ދަށުންނެވެ.

އަދި ޖޫރިމަނާއަށްވާ 100 މިލިއަން ރުފިޔާ 30 ދުވަހުގެ ތެރޭގައި ދެއްކުމަށް އެ ދެ އުޅަަނދުގެ ލޯކަލް އޭޖެންޓުގެ ގޮތުގައި ހަރަކާތްތެރިވަމުން އައި މެއިންލޭންޑް ޝިޕިން ޕްރައިވެޓް ލިމިޓެޑަށް އޭރު އީޕީއޭއިން އެންގިއެވެ.

އެހެންނަމަވެސް، އީޕީއޭގެ މި ނިންމުން މިނިސްޓަރުގެ އަރިހުގައި އިސްތިއުނާފު ކޮށްފައިވާއިރު، އިސްތިއުނާފު މަރުޙަލާއަށް ގިނަ ދުވަސްތަކެއް ހޭދަވުމަށްފަހު މިހާރު އެ މައްސަލަ މިވަނީ ނިންމާފައެވެ.

އެކަމާއި ގުޅޭގޮތުން ރާއްޖެއެމްވީއާއި ވާހަކަދައްކަވަމުން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ، އޭރު ޖޫރިމަނާ ކުރި ނަމަވެސް، އެޕީލް މަރުޙަލާގައި ގިނަ ދުވަސްތަކެއް ވެގެން ދިޔަ ކަމަށެވެ. އަދި މިހާރު އީޕީއޭއިންވެސް ނިންމާފައިވާ ގޮތަށް، އެ ޖޫރިމަނާ ދެއްކުމަށް މިނިސްޓަރުވެސް އަންގަވާފައިވާކަމަށް ނައީމް ވިދާޅުވިއެވެ.

އީޕީއޭއިން މިހާރު ވަނީ ޖޫރިމަނާ ފައިސާއަށްވާ 100 މިލިއަން ރުފިޔާ 15 ދުވަސް ތެރޭގައި ދެއްކުމަށް އަންގާފައެވެ. އެގޮތުން އުޅަނދުތައް ފަރަށް އެރުމުގެ ސަބަބުން ފަރުގެ 4،370 އަކަމީޓަރުގެ ސަރަހައްދަކަށް ގެއްލުންވިކަން އީޕީއޭއިން ފާހަގަކުރެއެވެ.

އަދި، ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާގެ ޢަދަދަކީ 110.39 މިލިއަން ރުފިޔާ ކަމަށް އީޕީއޭއިން ބުނެ އެވެ. ނަމަވެސް، ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު ޢަދަދަކީ 100 (އެއްސަތޭކަ) މިލިއަން ރުފިޔާ ކަމުގައިވާތީވެ، ޖޫރިމަނާކޮށްފައިވަނީީ 100 މިލިއަން ރުފިޔާއިންކަމަށް އެޖެންސީން ބުނެ އެވެ.