ސްޕޯޓްސް އެވޯޑްސް 2022: ގޯޑަން ރެއިޑް ބައިވެރިވާނެ
ގޯޑަން ވަނީ ޕެރަލީމިކް ގޭމްސްގެ ޑަބަލްސްގައި ރަން، ރިހި އަދި ލޯ މެޑަލްވެސް ކާމިޔާބުކޮށްފައި
ގޯޑަން ރެއިޑް، ވީލްޗެއަރ ޓެނިސް ކުޅުންތެރިޔާ
ކުޅިވަރާއި ބެހޭ ވުޒާރާއިން މި މަހު 17 ވަނަ ދުވަހު ބޭއްވުމަށް ނިންމާފައިވާ މޯލްޑިވްސް ސްޕޯޓްސް އެވޯޑްސް 2022 ގައި ވީލްޗެއަރ ޓެނިސް ކުޅުންތެރިޔާ ގޯޑަން ރެއިޑް ބައިވެރިވާނެކަމަށް ކުޅިވަރާއި ބެހޭ ވަޒީރު އަހުމަދު މަހުލޫފު ވިދާޅުވެއްޖެއެވެ.
ޕެރަލިމިކް ގޭމްސްގައި ރަން ވަނަތައް ހޯދާފައިވާ ވީލްޗެއަރ ޓެނިސް ކުޅުންތެރިޔާ ގޯޑަން، ސްޕޯޓްސް އެވޯޑްސްގައި ބައިވެރިވާނެކަމަށް މިނިސްޓަރ ކުރެއްވި ޓްވީޓެއްގައި ވިދާޅުވިއެވެ. ރާއްޖޭގެ ކުޅިވަރު ދާއިރާގައި އުޅޭ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ނިސްބަތުން ބެލިޔަސް ފެންވަރު ރަނގަޅު އިވެންޓަކަށް ހަދައި އަހަރަކު އެއް ފަހަރު މި އިވެންޓް ބޭއްވުމަކީ އެންމެ ބޮޑު ބޭނުން ކަމަށް މީގެ ކުރިންވެސް މިނިސްޓަރ ވަނީ ވިދާޅުވެފައެވެ. އަދި ސްޕޯޓްސް އެވޯޑްސް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
ގޯޑަންވަނީ ޕެރަލީމިކް ގޭމްސްގެ ޑަބަލްސްގައި ރަން، ރިހި އަދި ލޯ މެޑަލްވެސް ކާމިޔާބުކޮށްފައެވެ. އަދި އޭނާ ވަނީ ގްރޭންޑް ސްލޭމް ސިންގަލްސް ޗެމްޕިއަންކަން ދެފަހަރު ކާމިޔާބުކޮށް، ގްރޭންޑް ސްލޭމް ޑަބަލްސް ޗެމްޕިއަންކަން 18 ފަހަރު ނަގާފައެވެ.
މި މަހުގެ ފަހުކޮޅުގައި އޮންނަ މޯލްޑިވްސް ސްޕޯޓްސް އެވޯޑް 2022 ގައި ބައިވެރިވުމަށް ކެތްމަދުވެފައިވާ ކަމަށްބުނެ ގޯޑަން ވަނީ ޓްވީޓެއް ކޮށްފައެވެ.
މޯލްޑިވްސް ސްޕޯޓްސް އެވޯޑްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސާފައިވަނީ ރާއްޖެ ޓީވީއެވެ. އެހެންކަމުން ރާއްޖެ ޓީވީ އިން މޯލްޑިވްސް ސްޕޯޓްސް އެވޯޑްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނަސްދޭނެއެވެ.
