ސްޕޯޓްސް އެވޯޑްސް 2022: ބްރެޒިލްގެ ކުރީގެ ވޮލީ ކެޕްޓަން ޖީބާ ބައިވެރިވާނެ
6 މާރިޗު 2022 | އާދީއްތަ 09:35މިނިސްޓަރގެ އަމާޒަކީ ދުނިޔޭގެ ސަމާލުކަން ހުއްޓޭފަދަ ކާމިޔާބު އިވެންޓަކަށް މި ސްޕޯޓްސް އެވޯޑްސް ހެދުން
ބްރެޒިލްގެ ކުރީގެ ވޮލީ ކެޕްޓަން ޖިލްބާޓޯ ގޮޑޯއީ
ކުޅިވަރާއި ބެހޭ ވުޒާރާއިން މި މަހު ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސް 2022 ގައި ބްރެޒިލްގެ ކުރީގެ ވޮލީ ކެޕްޓަން ޖިލްބާޓޯ ގޮޑޯއީ (ޖީބާ) ބައިވެރިވާނެކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.
މުޅިން އަލަށް ރާއްޖޭގައި ބާއްވާ މޯލްޑިވްސް ސްޕޯޓްސް އެވޯޑްސް 2022 ގައި، ބްރެޒިލްގެ އޮލިމްޕިކްސް ގޯލްޑް މެޑަލިސްޓް ޖީބާއަށް ދެއްވި ދައުވަތު ގަބޫލުކޮށްފައިވާކަމަށް މިނިސްޓަރު ވިދާޅުވިއެވެ. މިނިސްޓަރުގެ އަމާޒަކީ ދުނިޔޭގެ ސަމާލުކަން ހުއްޓޭފަދަ ކާމިޔާބު އިވެންޓަކަށް މި ސްޕޯޓްސް އެވޯޑްސް ހެދުމެވެ. އެގޮތުން ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
ދުނިޔޭގައި އުފެދުނު އެންމެ މޮޅު ވޮލީ ކުޅުންތެރިޔާކަމަށް ގިނަ ބަޔަކު އިއްތިފާގުވާ ޖީބާވަނީ 3 ވޯލްޑް ޗެމްޕިއަންޝިޕާއި، 3 ވޯލްޑް ގްރާންޑް ޗެމްޕިއަންސް ކަޕްގެ އިތުރުން 2 ވޯލްޑް ކަޕާއި 8 ވޯލްޑް ލީގު ކާމިޔާބުކޮށްފައެވެ. އަދި ސައުތު އެމެރިކަން ޗެމްޕިއަންޝިޕް 9 ފަހަރަށް ކާމިޔާބުކޮށްފައި ވާއިރު، އެއް އޮލިމްޕިކްސް ގޭމާއި 3 އެމެރިކާސް ކަޕްވެސް ބްރެޒިލްގެ ވޮލީ ޓީމް ވަނީ ޖީބާގެ ކެޕްޓަންކަމުގެ ދަށުގައި ކާމިޔާބު ކޮށްފައެވެ. އެފްއައިވީބީ އެތުލީޓްސް ކޮމިޝަންގެ ސެކެޓްރީ ޖީބާ ވަނި އޭނާގެ ވޮލީ ކެރިއަރގައި 30 ށްވުރެ ގިނަ އިންޓަރނޭޝަނަލް ރަން މެޑަލް ކާމިޔާބު ކޮށްފައެވެ.
މޯލްޑިވްސް ސްޕޯޓްސް އެވޯޑްސްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސާފައިވަނީ ރާއްޖެ ޓީވީއެވެ. އެހެންކަމުން ރާއްޖެ ޓީވީ އިން މޯލްޑިވްސް ސްޕޯޓްސް އެވޯޑްސްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނަސްދޭނެއެވެ.
