މޯލްޑިވްސް ސްޕޯޓްސް އެވޯޑްސްގައި ބައިވެރިވުމަކީ ލިބޭ އުފަލެއް: ސާރާ

މޯލްޑިވްސް ސްޕޯޓްސް އެވޯޑްސް 2022 ގައި ބައިވެރިވެވުމަކީ އެނާއަށް ލިބޭނެ އުފަލެއް ކަމުގައި އޮލިމްޕިކް ގޯލްޑް މެޑަލިސްޓް ސާރާ ޝިއޯސްޓްރޯމް ބުނެފިއެވެ.

ދުނިޔޭގެ ފެންވަރުގެ ބޮޑެތި ފެތުމުގެ މުބާރާތްތަކުގައިވެސް ކާމިޔާބު ހޯދާފައިވާ ސާރާ، ފޭސްބުކްގައި ކުރި ޕޯސްޓެއްގައި ބުނެފައިވަނީ އެނާ ވަރަށް އަވަހަށް ރާއްޖެއަށް ދަތުރުކުރާނެ ކަމަށެވެ. އަދި ރާއްޖޭގައި ހޭދަ ކުރާ ހަފްތާގެ ތެރޭގައި މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ކެތްމަދުވެފައިވާ ކަމަށް އޭނާ ބުނެފައިވެއެވެ.

ސްވިޑްންގެ ފެތުންތެރިޔާ ސާރާއަކީ ދުނިޔޭގެ ފެންވަރުގައި ބާއްވާ ފެތުމުގެ ބޮޑެތި މުބާރާތްތަކުގައި ރަންވަނަ ހާސިލްކޮށްފައިވާ ކާމިޔާބު އެތުލީޓެކެވެ. އެގޮތުން ސާރާ ވަނީ ވޯލްޑް ޗެމްޕިއަންޝިޕްގައި 14 ރަން މެޑަލް ކާމިޔާބު ކުރުމުގެ އިތުރުން ޔޫރަޕިއަން ޗެމްޕިއަންޝިޕްގައި 26 ރަން މެޑަލް ހާސިލްކޮށްފައެވެ. މިވަގުތު 50 މީޓަރު އަދި 100 މީޓަރުގެ ފްރީސްޓައިލް އާއި ބަޓަފްލައި ކެޓަގަރީގެ ދުނިޔޭގެ ރެކޯޑުވެސް އޮތީ ސާރާ އަތުގައެވެ.

މޯލްޑިވްސް ސްޕޯޓްސް އެވޯޑް ބޭއްވުމަށް ހަމަޖެހިފައިވަނީ މިމަހުގެ 17 ވަނަ ދުވަހުއެވެ. ރާއްޖޭގެ ކުޅިވަރު ދާއިރާގައި އުޅޭ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ނިސްބަތުން ބެލިޔަސް ފެންވަރު ރަނގަޅު އިވެންޓަކަށް ހަދައި އަހަރަކު އެއް ފަހަރު މި އިވެންޓް ބޭއްވުމަކީ އެންމެ ބޮޑު ބޭނުން ކަމަށް ކުޅިވަރާއި ބެހޭ ވަޒީރު ވަނީ ވިދާޅުވެފައެވެ. އަދި ސްޕޯޓްސް އެވޯޑްސް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިންނާއި ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.

އެގޮތުން ސާރާގެ އިތުރުން ފުޓްބޯޅަ ލެޖެންޑް ސަލްގާޑޯވެސް މި ހަރަކާތުގައި ބައިވެރިވާނެކަން ހޮނިހިރު ދުވަހުގެ ރޭ ކުޅިވަރާއި ބެހޭ ވަޒީރު ވަނީ ހާމަކުރައްވާފައެވެ.

މޯލްޑިވްސް ސްޕޯޓްސް އެވޯޑްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސައިފައިވަނީ ރާއްޖެޓީވީ އެވެ. އަދި އޮންލައިން މީޑިއާ ޕާޓްނަރަކީ އަދަދު ނޫހެވެ. އެހެންކަމުން ރާއްޖެޓީވީ އިން މޯލްޑިވްސް ސްޕޯޓްސް އެވޯޑްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނަސްދޭނެއެވެ.