މޯލްޑިވްސް ސްޕޯޓްސް އެވޯޑްސް 2022: ފުޓްބޯޅަ ލެޖެންޑް ސަލްގާޑޯވެސް ބައިވެރިވާނެ
5 މާރިޗު 2022 | ހޮނިހިރު 18:35މި އިވެންޓް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވޭ
ފުޓްބޯޅަ ލެޖެންޑް މިޝެލް ސަލްގާޑޯ
ކުޅިވަރާއި ބެހޭ ވުޒާރާއިން މި މަހު 17 ވަނަ ދުވަހު ބޭއްވުމަށް ނިންމާފައިވާ މޯލްޑިވްސް ސްޕޯޓްސް އެވޯޑްސް 2022 ގައި ފުޓްބޯޅަ ލެޖެންޑް މިޝެލް ސަލްގާޑޯ ވެސް ބައިވެރިވާނެކަމަށް ކުޅިވަރާއި ބެހޭ ވަޒީރު އަހުމަދު މަހުލޫފު ވިދާޅުވެއްޖެއެވެ.
ރާއްޖޭގެ ފުޓްބޯޅަ ކުރިއެރުވުމަށްޓަކައި މިހާރުވެސް މަސައްކަތް ކުރަމުން އަންނަ ސަލްގާޑޯވެސް ސްޕޯޓްސް އެވޯޑްސްގައި ބައިވެރިވާނެކަމަށް މިނިސްޓަރ ކުރެއްވި ޓްވީޓެއްގައި ވިދާޅުވިއެވެ. ރާއްޖޭގެ ކުޅިވަރު ދާއިރާގައި އުޅޭ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ނިސްބަތުން ބެލިޔަސް ފެންވަރު ރަނގަޅު އިވެންޓަކަށް ހަދައި އަހަރަކު އެއް ފަހަރު މި އިވެންޓް ބޭއްވުމަކީ އެންމެ ބޮޑު ބޭނުން ކަމަށް މީގެ ކުރިންވެސް މިނިސްޓަރ ވަނީ ވިދާޅުވެފައެވެ. އަދި ސްޕޯޓްސް އެވޯޑްސް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
ސްޕެއިންގެ ގައުމީ ޓީމަށްވެސް ކުޅެފައިވާ ރެއާލް މެޑްރިޑްގެ ލެޖެންޑް ވަނީ ސްޕެއިންގެ ގައުމީ ޓީމަށް 53 މެޗު ކުޅެދީފައެވެ. ކަނާއަތު ފަޅިން ފަހަތަށް ކުޅުނު ސަލްގާޑޯ ސްޕެއިންގެ ޖޫނިއާ ޓީމަށް 24 މެޗު ކުޅެދީ އެއް ގޯލު ޖަހާފައިވެއެވެ.
މީގެ އިތުރުން، ކްލަބް ފުޓްބޯޅައިގައިވެސް ކާމިޔާބު ސަލްގާޑޯ ވަނީ ރެއާލް މެޑްރިޑަށް 251 މެޗު ކުޅެދީ ހަތަރު ލަނޑު ކާމިޔާބު ކޮށްދީފައެވެ. އަދި ޔުއެފާ ޗެމްޕިއަންސްް ލީގާއި ޔުއެފާ ސުޕަ ކަޕްވެސް ސަލްގާޑޯ ވަނީ ރެއާލްގައި ކާމިޔާބު ކޮށްފައެވެ. ސަލްގާޑޯއަކީ ފީފާ ލެޖެންޑްސް އަދި އަޑިޑާސްގެ ވެސް އެމްބަސެޑަރެކެވެ.
ސަލްގާޑޯގެ އިތުރުން މިއަހަރުގެ މޯލްޑިވްސް ސްޕޯޓްސް އެވޯޑުގައި ބައިވެރިވާނެކަން ޔަގީނެވެފައިވާ އެއް އެތުލީޓަކީ ގޯލްޑް މެޑަލިސްޓް ފެތުންތެރިޔާ ސާރާ ޝިޔޯސްޓްރޯމްއެވެ.
މޯލްޑިވްސް ސްޕޯޓްސް އެވޯޑްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސާފައިވަނީ ރާއްޖެ ޓީވީއެވެ. އަދި އޮންލައިން މީޑިއާ ޕާޓްނަރަކީ އަދަދު ނޫހެވެ. އެހެންކަމުން ރާއްޖެ ޓީވީ އިން މޯލްޑިވްސް ސްޕޯޓްސް އެވޯޑްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނަސްދޭނެއެވެ.
