ރަޝިޔާ އިން ޔޫކްރެއިންގައި ހިންގަނީ ދިފާއުގައި ކުރިއަށް ގެންދާ އޮޕަރޭޝަނެއް - ސީރިއާ

ރަޝިޔާ އިން ޔޫކްރެއިންގައި ކުރަމުންދަނީ ހަނގުރާމައެއް ނޫންކަމަށާއި، އެއީ އަމިއްލަ ދިފާއުގައި ކުރިއަށް ގެންދާ އޮޕަރޭޝަނެއް ކަމަށް ވިދާޅުވެ ސީރިއާގެ ޑެޕިއުޓީ ފޮރިން މިނިސްޓަރ ބައްޝާރު އަލް-ޖާފަރި ރަޝިޔާ ދިފާއު ކުރައްވައިފިއެވެ.

ރަޝިޔާ ޔޫކްރެއިންގައި ހިންގަނީ ދިފާއުގައި ކުރިއަށް ގެންދާ އޮޕަރޭޝަނެއް ކަމަށް ވިދާޅުވެ ރަޝިޔާގެ ދިފާއުގައި ޖަފާރި ވާހަކަދައްކަވާފައިވަނި ޗައިނާގެ ސީއެމްޖީއާއި ވާހަކަދައްކަވަމުންނެވެ. ބުރާސްފަތި ދުވަހު ދެއްވި އިންޓަރވިއުގައި ޖަފާރި ވިދާޅުވީ ރަޝިޔާ އިން އަބަދުވެސް ހުޅަނގަކީ އެކުވެރިން ކަމަށް ބަލައިގަނެފައިވާ ކަމަށާއި، ނަމަވެސް ހުޅަނގުގެ ގައުމުތަކުން ރަޝިޔާ އާއި ދޭތެރޭގައި އަމަލުކުރަމުން އަންނަނި ދުޝްމަނެއް ކަމަށް ބަލައިގެން ކަމަށެވެ.

ޖާފަރި ވިދާޅުވީ ރަޝިޔާގެ އޮޕަރޭޝަންގެ މައިގަނޑު މަގުސަދަކީ ނޭޓޯއިން އިރުމައްޗަށް އެމީހުންގެ ނުފޫޒު ފޯރުވުމަށް ކުރަމުން އަންނަ މަސައްކަތް ހުއްޓުވުން ކަމަށެވެ.

މި ފަހުން، އަޒަރބައިޖާނުންނާއި، އަލް-ތަންފް، އަފްގާނިސްތާން އަދި ބުކީނާ ފާސޯއިން ޓެރަރިސްޓުން އެހެންތަނަކަށް ގެންދިޔަކަމަަށް ވިދާޅުވެ ޖާފަރި ވިދާޅުވި ޓެރަރިސްޓުން އެއްތަނުން އަނެއް ތަނަށް ގެންދިއުމަށް ބައިނަލްއަގުވާމީ ފޯސް އެއް މިކަމުގެ ފަހަތުގައިވާ ކަމަށާއި، އެމީހުން އެތައް ހާސް ޓެރަރިސްޓުންނެއް އެއްތަނުން އަނެއް ތަނަށް ވިސާ އަކާ ނުލާ އަވަސް އަވަހަށް ބަދަލުކުރާ ކަމަށެވެ.

ޖާފަރި ވިދާޅުވީ މި ފޯސް އިން ޓެރަރިޒަމް ބޭނުން ކުރަނީ ސިޔާސީ ހަތިޔާރެއްގެ ގޮތުގައި ކަމަށާއި، އެކަން ފުރަތަމަ ފެށީ ސީރިއާގައި ނަމަވެސް އެކަން ޔޫކްރެއިންއާއި ހަމައަށް ދެން ގެންދާނެ ކަމަށެވެ.