މުޖުތަމައުން ބައިބައިވުމާއި ފިތުނަ ފަސާދަ ނައްތާލުމަށް އެންމެން ގުޅިގެން މަސައްކަތް ކުރަން ޖެހޭ: ފުވައްމުލައް ސިޓީގެ މޭޔަރު
ޝަހީދުންގެ ދުވަސް ކުލަގަދަކޮށް ފުވައްމުލައް ސިޓީގައި ބޭއްވުމަކީ ހަމައެކަނި މާލެއަށް ބަރޯސާނުވެ މަސައްކަތް ކުރާކަމުގެ ހެއްކެއް
ހުކުރު ދުވަހުގެ ރޭ ކުރިއަށް ގެންދިޔަ ޝަހީދުންގެ ދުވަހުގެ ރަސްމީ ޖަލްސާގެ ތެރެއިން
މުޖުތަމައުން ބައިބައިވުމާއި ފިތުނަ ފަސާދަ ނައްތާލުމަށް އެންމެން ގުޅިގެން މަސައްކަތްކުރަން ޖެހޭކަމަށް ފުވައްމުލައް ސިޓީގެ މޭޔަރު އިސްމާއީލް ރަފީގު ވިދާޅުވެއްޖެއެވެ.
މޭޔަރު މިހެން ވިދާޅުވީ ހުކުރު ދުވަހުގެ ރޭ ކުރިއަށް ގެންދިޔަ ޝަހީދުންގެ ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ. ހޯމް މިނިސްޓްރީން މިފަހަރު ޝަހީދުންގެ ދުވަސް ފާހަގަކުރީ ފުވައްމުލައް ސިޓީ ކައުންސިލާ ގުޅިގެން އެސިޓީގައެވެ. މި ޖަލްސާ ޝަރަފްވެރިކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑޮކްޓަރ އިބްރާހީމް ހަސަންއެވެ.
މި ޖަލްސާގައި މޭޔަރު ވިދާޅުވީ އެއްވެސް ރަށެއް, އަދި އެއްވެސް މީހެއްވެސް މިސަރުކާރުގައި ބާކީ ނުކުރާނެ ކަމަށާއި، އެކަން މިއަދު ސާބިތުކޮށްދެމުންދާ ކަމަށެވެ. މީގެ ކުރިން މިފަދަ ހުރިހާ ޖަލްސާތަކާއި ހަރަކާތްތައް ބާއްވަމުން ދަނީ މާލެ ސިޓީގައި ކަމަށާއި، ނަމަވެސް މިހާރު އަތޮޅުތެރެއަށް އިސްކަންދެމުންދާކަން ފާހަގަކުރެވިފައިވާ ކަމަށެވެ. އަދި ޝަހީދުންގެ ދުވަސް ކުލަގަދަކޮށް ފުވައްމުލައް ސިޓީގައި ބޭއްވިގެން ދިއުމަކީ ހަމައެކަނި މާލެއަށް ބަރޯސާނުވެ މަސައްކަތް ކުރާކަމުގެ ހެތްކެއް ކަމަށް މޭޔަރު ވިދާޅުވިއެވެ.
ޝަހީދުންގެ ދުވަސް ފާހަގަކުރުމުގެ މަގުސަދަށް އިޝާރަތްކުރައްވައި މޭޔަރު ވިދާޅުވީ, މިފަދަ ދުވަސްތައް ފާހަގަކުރުމުގެ ބޭނުމަކީ ހަމައެކަނި ޖަލްސާ ބާއްވާފައި ނިންމާލުން ނޫން ކަމަށާއި، މިކަހަލަ ހާދިސާތަކުން އިބުރަތް ހާސިލްކޮށް, ފިލާވަޅުތައް ހޯދައި، އެގޮތަށް މަސައްކަތް ކުރުން ކަމަށެވެ. އަދި ފިތުނަ ފަސާދައާއި ބައިބައިވުން އޮތުމަކީ އަޅުވެތިވުމަށް މަގުފަހިވާ ކަމެއްކަން ފާހަގަކުރައްވައި މޭޔަރު ވިދާޅުވީ, މި މުޖުތަމައުން ބައިބައިވުމާއި ފިތުނަފަސާދަ ނައްތާލަން ޖެހޭކަމަށެވެ. އެހެންކަމުން އެންމެ އެކުވެރިވެ، އެކުގައި މަސައްކަތް ކުރުމަށް މޭޔަރު އެދިވަޑައިގަތެވެ.
ޝަހީދުންގެ ދުވަހުގެ ރަސްމީ ޖަލްސާގައި ދުވަހާ ގުޅިގެން ފުވައްމުލައް ސިޓީގައި ކުރިއަށްގެންދިޔަ ސުވާލު މުބާރާތާއި, ކުރެހުމުގެ މުބާރާތުގެ ނަތީޖާ ފާޅުކޮށް ވަނަތަކަށް އައި ފަރާތްތަކަށް އިނާމުދިނެވެ. މީގެއިތުރުން ފުވައްމުލަކުގެ ދަރިވަރުންގެ ފަރާތުން ދުވަހާ ގުޅޭ ޚާއްސަ ހަރަކާތެއް ހުށަހަޅައިދިނެވެ.
