ދިވެހިވަންތަ ސާދާ އުޅުން، ހެދިބޮޑުވަމުން އަންނަ ޖީލަށް ފޯރުކޮށްދިނުމަކީ ކޮންމެ މީހެއްގެ ޒިންމާއެއް: އަލީ ނަޒީރު
5 މާރިޗު 2022 | ހޮނިހިރު 07:24މިއީ ހަމައެކަނި ސްކޫލުތަކުގެ ޒިންމާއެއް ނޫން
މިނިސްޓަރ އޮފް ސްޓޭޓް ފޮރ ހޯމްއެފެއާޒް އަލީ ނަޒީރު
އިސްލާމްދީނާއި ދިވެހިވަންތަ ސާދާ އުޅުން, ހެދިބޮޑުވަމުން އަންނަ ޖީލަށް ފޯރުކޮށްދިނުމަކީ ކޮންމެ މީހެއްގެ ޒިންމާއެއް ކަމަށާއި، މިހާރަށް ވުރެ ބޮޑަށް އެ މަސައްކަތް ކުރަން ޖެހޭ ކަމަށް މިނިސްޓަރ އޮފް ސްޓޭޓް ފޮރ ހޯމްއެފެއާޒް އަލީ ނަޒީރު ވިދާޅުވެއްޖެއެވެ.
ފުވައްމުލައް ސިޓީގައި ހުކުރު ދުވަހުގެ ރޭ ބޭއްވި މިއަހަރުގެ ޝަހީދުންގެ ދުވަހުގެ ރަސްމީ ޖަލްސާގައި ވާހަކަދައްކަވަމުން ނަޒީރު ވިދާޅުވީ, އެތައްބަޔަކު މަސައްކަތްކޮށްގެން ފުރާނައާއި ލެއިން ގުރުބާންވެގެން އަޅުގަނޑުމެންނާ ހަމައަށް ގެނެސްދީފައި މިވާ އިސްލާމްދީނާއި ދިވެހިވަންތަ ސާދާ އުޅުން, ހެދިބޮޑުވަމުން އަންނަ ޖީލަށް ފޯރުކޮށްދިނުމަކީ ކޮންމެ މީހެއްގެ ޒިންމާއެއް ކަމަށެވެ. އެކަމަށް ބޮޑު ސަމާލުކަމެއް ދިނުމަކީ ވަރަށް މުހިއްމުކަމެއް ކަމަށާއި, އެއީ ހަމައެކަނި ސްކޫލްތަކުގެ ޒިންމާއެއްކަމުގައި ނުދެކި ބެލެނިވެރިން ވެސް އެކަންކަމާމެދު ފުންކޮށް ވިސްނަންޖެހޭ ކަމަށެވެ.
ގައުމީ ފެންވަރުގައި ފާހަގަކުރާ މި ކަހަލަ ހަރަކާތްތައް އަބަދު މާލޭގައި ފާހަގަކުރުމުގެ ބަދަލުގައި, މުޅި ރާއްޖޭގެ އެކިހިސާބުތަކުގައި މިކަން ފާހަގަކުރުމަކީ މިސަރުކާރުން އިސްކަންދޭ, މިސަރުކާރުގެ ސިޔާސަތެއްކަމަށާއި, އޭގެ ބޭނުމަކީ މިފަދަ ކަންކަން ދައުލަތުން ކުރިއަށްގެންދާ މަގުސަދު ރަނގަޅަށް ހާސިލްކުރުންކަމަށް ވެސް ވިދާޅުވިއެވެ.
ފުވައްމުލައް ސިޓީގައި ހިންގި ހަރަކާތްތަކަށް އިޝާރަތް ކުރައްވައި އަލީ ނަޒީރު ވިދާޅުވީ, މި ހަރަކާތްތަކުން ދިވެހި ތާރީޚާއި, ސަގާފަތާއި, ދިވެހި ގައުމިއްޔަތު, އިލްމީ މައުލޫމާތުގެ ގޮތުނާއި އެނޫންވެސް ތަފާތު އެކިއެކި ހުނަރު މެދުވެރިކޮށްގެން ދިރުވުމުގެ މަސައްކަތް ކުރުމަށް ޒުވާނުން ވަރަށް ބޮޑަށް ބޭނުންވެފައިތިބިކަން ހާމަވެފައިވާ ކަމަށެވެ. އެހެންކަމުން މި ހަރަކާތްތައް ކުރިއަށް ގެންދިއުމަށް ފުރިހަމަ އެއްބާރުލުން ދޭނެކަމުގެ ޔަގީންކަން ނަޒީރު ދެއްވިއެވެ.
