ލަންކާއަށް ދިމާވެފައިވާ އިގްތިސާދީ ކަރިސާއިން އަރައިގަތުމަށް ކަރަންޓާއި ތެލުން ނަގާ ޓެކްސް ބޮޑުކުރަން ހުށަހަޅައިފި

ސްރީލަންކާއަށް މިހާރު ކުރިމަތިވެފައިވާ އިގްތިސާދީ ގޮންޖެހުންތަކުން އަރައިގަތުމަށް ކުރެވޭނެ 8 ކަމެއް ސްރީލަންކާގެ ސެންޓްރަލް ބޭންކުގެ މަނިޓަރީ ބޯޑުން އެގައުމުގެ ސަރުކާރަށް ހުށަހަޅައިފިއެވެ.

މީގެ ތެރޭގައި އެއް ކަމެއްގެ ގޮތުގައި ހުށަހަޅާފައިވަނީ މިވަގުތަށް އެންމެ ބޭނުންތެރި ނޫން ތަކެތި އެގައުމަށް އެތެރެކުރުން ވީހާވެސް އަވަހަކަށް ހުއްޓާލުމަށްޓަކައި މިކަމަށް އަޅަންޖެހޭ ފިޔަވަޅުތައް އެޅުމަށެވެ. މިއީ މީގެ ކުރިންވެސް ލަންކާގެ ސެންޓްރަލް ބޭންކުން ދީފައިވާ ލަފަޔަކަށް ބިނާކޮށް ހުށަހަޅާފައިވާ ހުށަހެޅުމެކެވެ. ދެވަނަ ކަމެއްގެ ގޮތުގައި ހުށަހަޅާފައިވަނީ ތެލުގެ އަގު އަދި ކަރަންޓުން ނަގާ ޓެކްސް އިތުރުކުރުމަށެވެ.

ތިންވަނަ ކަމަކަށް ހުށަހަޅާފައިވަނީ ބޭރުގެ ގައުމުތަކުން މާލީ އެހީތެރިކަން ހޯދުމަށް މަސައްކަތްކުރުމަށާއި، އަދި އިންވެސްޓްމެންޓްތައް އިތުރުކުރުމަށް މަސައްކަތްކުރުމަށެވެ. ބޭކާރު ގޮތުގައި ހަކަތަ ބޭނުންކުރުން މަދުކުރުމަަށް ބާރުއެޅުމަށް ޚާއްސަ ފިޔަވަޅުތަކެއް އެޅުމަށާއި، އަދި ހަކަތަ އުފެއްދުމަށް ތެޔޮ އަންދާމިންވަރު މަދުކޮށް އަވިން ހަކަތަ އުފެއްދުމާއި ދިމާލަށް ދިޔުމަށް މަސައްކަތްކުރުމަށް ހަތަރު ވަނަ ކަމެއްގެ ގޮތުގައި ވަނީ ހުށަހަޅާފައެވެ.

ފަސްވަނަ ކަމަކަށް ދައުލަތުގެ އާމްދަނީ އިތުރުކުރުމަށް އެކަށީގެންވާ އަދަދަކުން ޓެކްސް ނެގުމަށް ހުށަހަޅާފައިވެއެވެ. ހަވަނަ ކަމަކަށް އަލުން އަނބުރާ ދައްކަން ނުޖެހޭ ގޮތަށް އެހެން ގައުމުތަކުގެ މާލީ އެހީ ހޯދުމަށް ތައްޔާރުވުމަށް ވަނީ ހުށަހަޅާފައެވެ. ހަތްވަނަ ކަމެއްގެ ގޮތުގައި ހުށަހަޅާފައިވަނީ ވަނީ ބޭނުންނުކޮށް ހުރި އެސެޓުތަކާއި، ކޮންމެހެން ބޭނުންނުވާ އެސެޓުތައް ވިއްކައިގެން އެއިން އާމްދަނީ ހޯދުމަށެވެ. އަދި 8 ވަނަ ކަމެއްގެ ގޮތުގައި ހުށަހަޅާފައިވަނީ މިވަގުތަށް އެހާ ބޭނުންތެރި ނޫން ޕްރޮޖެކްޓުތައް މަޑުޖައްސާލުމަށެވެ.

މިކަންކަން ކޮށްގެން ލަންކާއަށް މިހާރު ކުރިމަތިވެފައިވާ އިގްތިސާދީ ކާރިސާއިން އަރައިގަތުމަށް އެހީތެރިވެދޭނެ ކަމަށް ލަންކާގެ ސެންޓްރަލް ބޭންކުން ބުނެފައިވެއެވެ.

ސްރީލަންކާއިން މިހާރު ދަނީ މީގެ ކުރިން އެގައުމަށް ކުރިމަތިލާންޖެހިފައި ނުވާވަރުގެ އިގްތިސާދީ ކާރިސާއަކާއި ކުރިމަތިލަމުންނެވެ. މީގެ ސަބަބުން ކަރަންޓު އުފެއްދުމަށް ބޭނުންވާ ތެޔޮ ނުލިބުމާއި، އަސާސީ އެތައް ކަމެއް ކުރުމަށްވެސް އެގައުމަށް ވަނީ ދަތިތަކާއި ކުރިމަތިލާންޖެހިފައެވެ.