ސްޓޫޑެންޓް ލޯނަށް އެދި 1،000 ފޯމު ހުށަހަޅައިފި

ސްޓޫޑެންޓް ލޯނަށް ހުޅުވާލި މުއްދަތުގައި 1،000 ދަރުވަރުން މި ލޯނަށް އެދި ފޯމު ހުށަހަޅައިފިއެވެ.

މަތީ ތައުލީމު ހާސިލްކުރުމަށް ސަރުކާރުން ދޭ ސްޓޫޑެންޓް ލޯނަށް އެދުމުގެ ފުރުސަތު ހުޅުވާލާފައިވަނީ ފެބްރުއަރީ 7 ވަނަ ދުވަހުން ފެށިގެންނެވެ. ހަޔަރ އެޑިއުކޭޝަން މިނިސްޓްރީން ބުނީ މި ލޯނަށް އެދުމުގެ ފުރުސަތު ބުރާސްފަތި ދުވަހުގެ މެންދުރުފަހު 1:00 ގައި ހަމަވެފައިވާއިރު، ސްޓޫޑެންޓް ލޯނަށް އެދި 1،000 ފޯމެއް ހުށަހަޅާފައިވާކަމަށެވެ.

މި ލޯން ސްކީމްގެ ދަށުން މިއަހަރު 720 ދަރިވަރުންނަށް ލޯނު ދޫކުރުމަށް ސަރުކާރުން ވަނީ ނިންމާފައެވެ. އެއީ އަލަށް ކިޔެވުން ފަށާ 417 ދަރިވަރަކަށާއި، މިހާރުވެސް ކިޔަވަމުންދާ 303 ދަރިވަރުންނަށެވެ.

ހަޔަރ އެޑިއުކޭޝަން މިނިސްޓްރީން މި 720 ފުރުސަތު ހުޅުވާލާފައިވަނީ ސްޓޫޑެންޓު ލޯނު ދޫކުރުމުގައި އެޑްމިނިސްޓްރޭޓިވް ފީގެ ގޮތުގައި ނަގަމުން އަންނަ އިންޓްރެސްޓު ކުޑަ ކުރުމަށް ފަހުގައެވެ. އިއުލާނު ކުރެވުނު ފުރުސަތުތަކުގައި ކުރިން އެޑްމިޝަން ފީގެ ގޮތުގައި ނަގަމުން އައި ތިން އިންސައްތައިގެ އިންޓްރެސްޓު، އެއް އިންސައްތައަށް ވަނީ ކުޑަކޮށްފައެވެ.

ހިލޭ ޑިގްރީ ސްކީމްގެ ދަށުން މިހާރު ކިޔަވަމުން އަންނަ ދަރިވަރުންނަށް ވެސް ލޯނަށް ކުރިމަތިލުމުގެ ފުރުސަތު ލިބިފައިވެއެވެ. މީގެ ތެރެއިން ރާއްޖޭގައި އެމްބީބީއެސް ކިޔަވަމުން އަންނަ ދަރިވަރުންނަށް 40 ސްލޮޓު ރިޒަރވްކޮށްފައިވެއެވެ. އަދި މިއަހަރުގެ ލޯން ސްކީމް، ރާއްޖެއިން މާސްޓާރސް ތައުލީމު ހާސިލް ކުރުމަށް ވެސް ދޫކުރާނެއެވެ.