އިއްސެގެ މަރުގެ ޚުލާސާ ބަޔާން: އެކަން ކުރީ އަނބިމީހާގެ މައްސަލައާހުރެ ހިތްދަތިވެގެންކަމަށް ސުމޮން ބުނޭ

ޅ. ހިންނަވަރު އިސްލާއީލް އުމަރު (އިއްސެ) މަރާލި މައްސަލައިގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ދައުވާ އުފުލާފައިވަނީ ބަންގްލަދޭޝްގެ ރައްޔިތެއްކަމަށްވާ ސުމޮން މިއާގެ މައްޗަށެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.

މި އަޑުއެހުމަކީ މި މައްސަލައިގެ ދެފަރާތުން ޚުލާސާ ބަޔާން އިއްވުމަށް ބޭއްވި އަޑުއެހުމެކެވެ. އެންމެ ފުރަތަމަ ދައުލަތުން ވަނީ ޚުލާސާ ބަޔާން އިއްވާފައެވެ.

2017 ވަނަ އަހަރުގެ ސެޕްޓެމްބަރު މަހުގެ 16 ވަނަ ދުވަހު އިހަވަންދޫ އައިސް ޕްލާންޓުގެ ތެރޭގައި ރަހުމު ކުޑަގޮތަކަށް މަރާލާފައި އޮއްވާ ފެނުނު އިއްސެގެ މަރުގެ މައްސަލައިގައި ހައްޔަރު ކުރި މީހުންގެ ތެރެއިން އެންމެ އިސްކޮށް އުޅުނު ކަމުގެ ތުހުމަތު ދައުލަތުން ކޮށްފައިވަނީ ސުމޮން މިއާގެ މައްޗަށެވެ. އިއްސެ މަރާލާފައިވަނީ އޭނާ އެކޮމޮޑޭޝަން ބްލޮކްގައި ނިދާފައި އޮއްވައެވެ.

މި މައްސަލައިގައި ސުމޮން މިއާގެ މައްޗަށް ކޮށްފައިވަނީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގެ ކުށުގެ ދައުވާއެވެ. މި މައްސަލައިގެ އިބްތިދާއީ މަރުޙަލާގައި އޭނާ ކުށަށް އިއުތިރާފުވިއެވެ. ނަމަވެސް އެ އިއުތިރާފުން އޭނާ ރެކުމުގެ ފުރުސަތު އޮތުމާއެކު ދައުލަތުން ވަނީ ހެކިންގެ ހެކިބަސް ނެގުމާއި، ކަން ހިނގާ ދިޔަ ގޮތް ސުމޮން މިއާގެ ފަރާތުން ކިޔާދިނުމަށް އެދިފައެވެ.

ކުށް ކުރި ސަބަބު:

ޝަރީއަތުގައި އޭނާ ބުނެފައިވަނީ އޭނާ ލައްވާ މަސައްކަތް ކުރުވި ނަމަވެސް، އޭނާއަށް އޯޓީ ފައިސާ ދޭން އިއްސެ އެއްބަސް ނުވާ ކަމަށާއި، ސުމޮން މިއާގެ އަންހެނުންނަށް ގުޅުމުގެ ފުރުސަތުވެސް ނުލިބޭ ކަމަށެވެ. އަދި ގިނަ ވަގުތު ބުރަކޮށް މަސައްކަތް ކުރަންޖެހޭއިރު، އޭނާއަށް ޖިސްމާނީ އަނިޔާވެސް ބައެއް ފަހަރު އިއްސެގެ ފަރާތުން ލިބޭ ކަމަށެވެ. އަދި އިއްސެ މަރާލަން ނިންމީ، އޭނާގެ އަންހެނުންނަށް ގުޅުމުގެ ފުރުސަތު ނުލިބި، އޭނާ ވަރި ކުރަންޖެހޭ ހިސާބަށް ދިއުމުންކަމަށް ޝަރީއަތުގައި ސުމޮން ވަނީ ބުނެފައެވެ.

ސުމޮން ބުނާ ގޮތުގައި އަންހެނުންނަށް ވަގުތު ނުދޭތީ އޭނާ ވަރިކުރުމަށް އަންހެނުންގެ މައިންބަފައިންވެސް ދިޔައީ އެދެމުންނެވެ.

ކުށް ކުރި ގޮތް:

އެހިސާބުން ސުމޮން މިއާ ފިލައިގެން ދިރިއުޅެނީ އެހެން ތަނެއްގައެވެ. އަދި އެއް ރޭ އިއްސެ ނިދާފައި އޮއްވައި ނައިލޯނު ވާގަނޑަކާއި 12 އިންޗީގެ ވަޅިއެއް ހިފައިގެން އެ ކޮޓަރިއަށް ދިޔަކަމަށް އޭނާ ބުންޏެވެ. އެއަށްފަހު ބާލީސް ދަށަށް ވާގަނޑު ލައްވައިގެން ކަރުގައި އަޅުވަން އުޅެނިކޮށް އިއްސެއަށް ހޭލެވުމުން، ދެމީހުންގެ މެދުގައި މާރާމާރީ ހިނގައި، އޭނާއަށް ވަޅިން ޙަމަލާ ދިނީއެވެ.

އެއަށްފަހު އޭނާގެ ރައްޓެއްސެއް މެދުވެރިކޮށް ލޯންޗެއް ހަމަޖައްސައިގެން އެހެން ރަށަކަށް ދާން މަސައްކަތް ކުރިކަމަށް އޭނާ ބުންޏެވެ. އަދި އަލުން އިއްސެ އޮތް ކޮޓަރިއަށް ގޮސް، އޭނާގެ ހަށިގަނޑު ދަމާފައި އެތަނުގައި ހުރި ލޮނުފެން ޓޭންކެއް ކައިރިއަށް ގެންގޮސް ބޭއްވީއެވެ. އެއަށްފަހު ކޮޓަރިތެރެއަށް ފެން ބާލިދީއެއް އަޅައި، އިއްސެގެ ދަބަހުގައި ހުރި ފައިސާ ނަގައިގެން އޭނާ ހަމަ އެވަގުތު ފުރައިގެން ދިޔައީއެވެ. ލޯންޗަށްވެސް ފައިސާ ދެއްކީ އިއްސެގެ ދަބަހުން ނެގި ލާރިންނެވެ.

އެއަށްފަހު އެ ލާރިން މާލެ ދިޔުމަށްވެސް އޭނާ ފައިސާ ދެއްކިއެވެ. އަދި މާލެ ދިޔުމަށް ތައްޔާރީތައް ވެފައި ހުއްޓައި، އޭނާ ހައްޔަރުކުރީއެވެ.

މި ހުރިހާ ވާހަކައެއް އޭނާ ކިޔާދީފައިވަނީ އެއްވެސް މަޖުބޫރުކަމެއް ނެތިކަން ފާހަގަކޮށް އޭނާ ވަނީ އިއުތިރާފު ދަމަހައްޓާފައެވެ.

މި މައްސަލައިގައި ދައުލަތުން ދައުވާ ހުށައެޅުމުންވެސް އޭނާ ވަނީ އިއުތިރާފު ދަމަހައްޓާފައެވެ. އެއީ 27 ނޮވެމްބަރު 2017 ގައި ބޭއްވި އަޑުއެހުމެވެ.