ހުޅުމާލޭގައި ތަރައްގީ ކުރަމުންދާ ކޮންޓެއިނަރު ޕާކް ރަމަޟާން މަހަށް ނިންމާ ހުޅުވުމަށް މަސައްކަތް ކުރަމުންދާ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުނެފިއެވެ.
ބޭނުން ނުކުރާ ކޮންޓެއިނަރުތަކުން ބޭނުންކޮށްގެން ތަރައްގީކުރާ މިޕާކަކީ މިފަދަ ކޮންސެޕްޓަށް ތަރައްގީ ކުރާ ފުރަތަމަ ޕާކެވެ.
އެޗްޑީސީން ބުނީ ރަމަޟާން މަހުގެ ކުރިން ޕާކުގެ މަސައްކަތް ނިންމުމަށް އަމާޒު ހިފައިވާ ކަމަށާއި، މިހާރު ކުރިއަށްދަނީ ޕާކު ނިންމުމަށްޓަކައި ކުރަން ޖެހޭ އެންމެފަހުގެ މަސައްކަތްތައް ކަމަށެވެ. އެގޮތުން ރޯދަ އަށް ޚާއްސަކޮށް ޕާކުތައް އާއްމުންނަށް ހުޅުވާލެވޭނެ ކަމަށް އުންމީދު ކުރާ ކަމަށް އެޗްޑީސީން ބުނެއެވެ.
މީގެ އިތުރުން އެޗްޑީސީން ބުނީ މި ޕާކުގައި ކެފޭ އެގްޒިބިޝަން ސްޕޭސް އަދި ތަފާތު މަސައްކަތްތައް ކުރުމަށް ކޯ ވޯކިން ސްޕޭސްއެއް ހިމަނާފައިވާ ކަމަށާއި، އެގްޒިބިޝަން ސްޕޭސްގައި ފަންނުވެރި ކަމުގެ މަސައްކަތްތައް މައުރަޒުކޮށް ދައްކާލުމުގެ ފުރުސަތު ލިބޭނެ ކަމަށެވެ. އަދި ޕާކުގައި ކުދި އަދި މެދު ފަންތީގެ ވިޔަފާރިތަކަށް އެކިއެކި ހަރަކާތްތައް ހިންގުމަށް ފުރުސަތުތައް ލިބޭނެ ކަމަށް އެޗްޑީސީން ބުނެއެވެ. މިއީ އާއްމުކޮށް މީހުން ޒިޔާރަތްކޮށް ހިތްހަމަ ޖައްސާލާއި އުފާވެރި ވަގުތުތަކެއް ހޭދަކުރުމަށް ހުޅުވިގެންދާ އިތުރު ފުރުސަތުތެއް ކަމަށް ވެސް އެޗްޑީސީން ބުނެއެވެ.
އެޗްޑީސީން ބުނީ ކުރިއަށް އޮތްތަނުގައި ތަފާތު ކޮންސެޕްޓްތަކަށް ޕާކުތައް ތަރައްގީ ކުރުމުގެ ޕްލޭންތައް އެބަހުރި ކަމަށެވެ. އަދި އަބަދުވެސް މަސައްކަތް ކުރަމުންދަނީ ހުޅުމާލޭގައި ދިރިއުޅެމުންދާ އާއްމުންނަށް ހިތް ފަސޭހަ މާހައުލެއް ގާއިމްކޮށް ދިނުން ކަމަށް އެޗްޑީސީން ބުނެއެވެ.
