ވަކިފަރާތަކަށް ނުޖެހޭނެކަމަށް ބުނާ ފްލެޓް ކޮމިޓީގައި ފަޒުލްގެ ކޮއްކޮ: "މިދިޔަ ސަރުކާރުން އަހަރެންނަށް އެހާވަރުކޮށްލީ އަހަރެން ކީއްކޮށްގެން؟"

ކުރީ ސަރުކާރުން ދޫކުރި 4000 ފުލެޓު ލިސްޓް އަލުން ބެލުމަށް ރައީސް ޑރ. މުހައްމަދު މުއިއްޒު އުފެއްދެވި ހައުސިންގ ކޮމިޓީއާ ގުޅޭގޮތުން ރައީސް ވިދާޅުވެފައިވަނީ އެއީ މިނިވަން ކޮމިޓީއެއް ކަމަށެވެ.

އަދި އެ ކޮމިޓީގައި ހިމެނޭނީ ރައްޔިތުން އިތުބާރު ކުރާ ފަދަ ބޭފުޅުން ކަމަށާއި، އެފަދަ ކޮމިޓީއެއް އެކުލަވާލެއްވީ ވެސް ފްލެޓްތައް ދިނުން އެއީ ސަރުކާރުން އަމިއްލަ އަމިއްލައަށް ކުރާ ކަމަކަށް ހަދަން ބޭނުން ނުވާތީކަމަށް ސަރުކާރުން ބުނެފައިވެއެވެ.

ރައީސް ޑރ މުޙައްމަދު މުއިއްޒުގެ އިރުޝާދާއެކު އެކުލަވާލެއްވި އެ ކޮމިޓީގައި ކުރިން ތިއްބެވީ 5 މެންބަރުންނެވެ. ނަމަވެސް ކޮމިޓީގެ މެންބަރަކު އިސްތިއުފާ ދެއްވާފައިވާތީ މިހާރު ވަނީ 7 މެންބަރުނަށް ކޮމިޓީގެ އަދަދު އިތުރު ކުރައްވާފައެވެ.

ހައުސިންގ މިނިސްޓްރީން މައުލޫމާތު ދޭ ގޮތުގައި މި ކޮމިޓީގައި ހިމެނިވަޑައިގަންނަވާ މެންބަރުންނަކީ ރައީސް ޑރ މުޙައްމަދު މުއިއްޒުގެ އިރުޝާދުގެ ދަށުން ކޮމިޓީއަށް އައްޔަންކުރައްވާފައިވާ ބޭފުޅުންނެވެ.

ކޮމިޓީގައި މިހާރު ހިމެނިވަޑައިގަންނަވަނީ އާމިނަތު އީނާސް (ކޮމިޓީގެ ޗެއާ)، އަބްދުލްއަޒީޒް ޔޫސުފް (ޑެޕިއުޓީ ޗެއާ)، އަހްމަދު އަލިމަނިކު، މަރިޔަމް ފިޒާނާ ރަޝީދު، މުހައްމަދު މައުރޫފް ޖަމީލް، ފާތިމަތު ސައީދު އަދި އާމިނަތު ޝައީރާއެވެ.

އޭގެ ތެރެއިން މަރިޔަމް ފިޒާނާ ރަޝީދުއަކީ ކުރިން އެކުލަވާލި 5 މެންބަރުންގެ ކޮމިޓީގައި ވެސް ހިމެނިވަޑައިގަންނަވާ ފަރާތެކެވެ. މިހާރު އަލަށް އެކުލަވާލެވިފައިވާ 7 މެންބަރުންގެ ކޮމިޓީގައި ވެސް ފިޒާނާ ހިމެނިވަޑައިގަންނަވައެވެ.

ފިޒާނާއަކީ މި ސަރުކާރުން ހައުސިންގ ޑިވޮލޮޕްމަންޓް ކޯޕަރޭޝަން (ޢެޗްޑީސީ) އަށް އައްޔަންކުރި މެނޭޖިންގ ޑިރެކްޓަރު އިބްރާހީމް ފަޒުލް ރަޝީދުގެ ކޮއްކޯފުޅެވެ.

އޭނާއަށް ރައީސް މުއިއްޒުގެ ސަރުކާރުން ސްޓޭޓް މިނިސްޓަރުކަން ވެސް ދެއްވާފައިވެއެވެ. އެއީ ހަޔަރ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުކަމެވެ.

މީގެ އިތުރުން، މިއަހަރުގެ ޖެނުއަރީ މަހު އޭނާ މޯލްޑިވްސް ކޮލިފިކޭޝަން އޮތޯރިޓީގެ ސީއީއޯކަމަށް ވެސް ވަނީ އައްޔަންކުރައްވާފައެވެ.

ފިޒާނާ އޭނާގެ ސޯޝަލް މީޑިއާގައި ހިއްސާކުރައްވާފައިވާ ބައެއް ޕޯސްޓުތަކަށް ބަލާއިރު، މިދިޔަ ސަރުކާރަށް ނުހަނު ފާޑުކިޔައި، މިދިޔަ ސަރުކާރުން އަނިޔާދީފައިވާކަމަށް ވިދާޅުވެފައިވެއެވެ.

މީގެ އިތުރުން، ހުޅުމާލެއިން ނުޙައްޤުން ބިން ދޫކޮށްފައިވާކަމަށާއި، އެކަންކަން ބަލަންޖެހޭކަމަށް ފަޒުލް ވިދާޅުވެފައިވާ ޚަބަރުތައް ވެސް ފިޒާނާ ވަނީ އޭނާގެ ސޯޝަލް މީޑިއާގައި ހިއްސާކުރައްވާފައެވެ. މާނައަކީ ހައުސިންގް ކޮމިޓީގައި މި ހިމެނެނީ މިދިޔަ ސަރުކާރުން ގޯއްޗާއި ފްލެޓު ބަހާފައިވާ ގޮތް ރަނގަޅު ނޫންކަމަށް ވިދާޅުވެ ފަޒުލް ދައްކަވާފައިވާ ވާހަކަތަކަށް ތާއީދުކުރައްވާ، އެކަން ފާޅުގައި ހާމަކުރައްވަމުން ގެންދަވާ ފަރާތެއްކަމެވެ.

ހަމައެއާއެކު، ސަރުކާރާއި ރައީސް ޑރ މުއިއްޒުއަށް ތާއީދުކުރައްވާ ލިޔުއްވާފައިވާ ޕޯސްޓުތައް ވެސް އޭނާ ހިއްސާކުރައްވާފައިވެއެވެ.

ކަން މިހެން އޮތްއިރު، ކޮމިޓީގައި ހިމެނޭނީ ރައްޔިތުން އިތުބާރު ކުރާ ފަދަ ބޭފުޅުން ކަމަށާއި، އެއީ ވަކި ކޮޅަކަށް ނުޖެހޭ މިނިވަން ބޭފުޅުންކަމަށް ރައީސް ވިދާޅުވި ވާހަކަފުޅާމެދު ސުވާލު އުފެއްދުމުގެ ޖާގާ އެބައޮތެވެ.

ވަކިން ޚާއްސަކޮށް، މިދިޔަ ސަރުކާރުން އޭނާއަށް "އެހާވަރުކޮށްލީ ކީއްވެތޯ" އޭ ބުނެ މިދިޔަ ސަރުކާރަށް އެހާ ފާޑުކިޔާއިރު، އެ ސަރުކާރުން ބަހާފައިވާ ފްލެޓުތަކަކާމެދު މިނިވަން ވިސްނުމަކުން ފިޒާނާއަށް ވިސްނޭނެކަމާމެދު ވެސް މިވަނީ ސުވާލު އުފެދިފައެވެ.