ރަޝިޔާއިން ޔޫކްރެއިނުން ފޭބުމަށް ގޮވާލައި އދ. ގެ އާންމު މަޖިލީހުން ގަރާރު ފާސްކޮށްފި

ޔޫކްރެއިން އަށް ރަޝިޔާ އިން ދެމުންދާ ހަމަލާތައް ހުއްޓާލާ ޔޫކްރެއިން އަށް އަރާތިބި ރަޝިޔާގެ އަސްކަރީ ފައުޖުތައް ޔޫކްރެއިން އިން ފޭބުމަށް އދ ގެ އާންމު މަޖިލީހުން ގަރާރެއް ފާސްކޮށްފިއެވެ.

193 ގައުމުގެ ތެރެއިން މި ގަރާރު ފާސްކުރުމަށް ވޯޓު ދީފައިވަނީ 141 ގައުމަކުންނެވެ. ޗައިނާ އާއި އިންޑިޔާ ހިމެނޭ ގޮތުން 35 ގައުމަކުން ވަކި ކޮޅަކަށް ވޯޓު ދީފައެއްނުވެއެވެ. ރާއްޖެހިމެނޭ ދެކުނު އޭޝިޔާ ސަރަހައްދުން ސްރީލަންކާ، ޕާކިސްތާން އަދި ބަންގްލަދޭޝްވެސް ވަކި ކޮޅަކަށް ވޯޓު ދީފައެއްނުވެއެވެ. އިރާނާއި އިރާގު އަދި ދެކުނު އެފްރިކާއިންވެސް ވަކިކޮޅަކަށް ވޯޓު ދީފައެއްނުވެއެވެ. ގަރާރާ ދެކޮޅަށް ވޯޓުދީފައިވަނީ 5 ގައުމަކުންނެވެ. އެއީ ރަޝިޔާ، ސީރިޔާ، ބެލަރޫސް، އުތުރު ކޮރެއާ އަދި އެރިޓްރިއާ އެވެ.

އާންމު މަޖިލީހުން ފާސްކުރި ގަރާރަށް ރަޝިޔާއިން އަމަލުކުރާކަށް މަޖުބޫރެއް ނުވާނެއެވެ. ނަމަވެސް މިގަރާރުގެ ސަބަބުން ރަޝިޔާއަށް ފިއްތުންތައް އިތުރުވާނެއެވެ.

ވޯޓަށް ފަހު ވާހަކަދައްކަވަމުން އދ ގެ ސެކެޓްރީ ޖެނެރަލް އެންތޯނިއޯ ގުޓަރޭސް ވިދާޅުވީ ޔޫކްރެއިންގެ ރައްޔިތުން ތިބީ އިންތިހާއަށް ސުލްހަ ބޭނުންވެފައި ކަމަށާއި މުޅި ދުނިޔެއިން ގޮވަމުން ދަނީވެސް ސުލްހައަށްކަމަށެވެ.

ހަނގުރާމަ ހިނގަމުންދާތާ ހަފްތާއެއް ވީއިރު އދން ރަޝިޔާއަށް ހަނގުރާމަ ހުއްޓާލުމަށް ގޮވާލާ ހުށަހެޅި ގަރާރާއި ގުޅޭގޮތުން ވާހަކަދައްކަވަމުން އެމެރިކާއިން އދށް ކަނޑައަޅުއްވާފައި ހުންނަވާ އެމްބަސެޑަރ ލިންޑާ ތޯމަސް ގްރީންފީލްޑް ވިދާޅުވީ ރަޝިޔާއިން ވަނީ ޔޫކްރެއިންގެ އިންފްރާސްޓަރަކްޗަރ ހަލާކުކޮށްލާފައި ކަމަށެވެ. އޭގެތެރޭގައި ފެނާއި ގޭހާއި މިނޫންވެސް ޒަރޫރީ ޚިދުމަތްތަކުގެ ތެރޭގައި ހިމެނޭ ޚިދުމަތްތަކުގެ އިންފްރާސްޓަރަކްޗަރ ހަލާކުކޮށްފައިވާކަމަށް ވިދާޅުވިއެވެ.

ގަރާރުގައި ރަޝިޔާގެ ނިއުކްލިއަރ ފައުޖު ތައްޔާރީ ހާލަތަށް ގެނައުން ކުށްވެރިކުރާކަމަށްވެސް ހިމަނާފައިވެއެވެ. މިގަރާރަށް ވާހަކަ ދެއްކުމަށް ހުޅުވާލުމުން ގިނަ ގައުމުތަކަކުން ވަނީ ރަޝިޔާ ކުށްވެރިކޮށް ވާހަކަދައްކާފައެވެ.

ރަޝިޔާއިން ޔޫކްރެއިން އަށް އަމާޒުކޮށް ހަމަލާތައް ދެމުންދާއިރު އެމެރިކާ އާއި ހުޅަނގުން ވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. ހުޅަނގުން ތުހުމަތުކުރަނީ ރަޝިޔާއިން ޔޫކްރެއިންގެ އާންމު ރައްޔިތުންނަށް އަމާޒުކޮށް ހަމަލާދޭކަމުގައެވެ. ނަމަވެސް ރަޝިޔާއިން އދ ށް ކަނޑައަޅުއްވާފައި ހުންނަވާ އެމްބަސެޑަރ ވަނީ އެކަން ދޮގުކުރައްވާފައެވެ. އަދި މިގަރާރުގެ ސަބަބުން އިތުރަށް ހާލަތު ގޯސްވެދާނެކަމުގެ އިންޒާރު ވަނީ ދެއްވާފައެވެ.