ހަނގުރާމައަށް ފިލުނީ ނުރައްކަލުގެ ތެރެއަށް ކޮއްކޮ ދޫކޮށްލާފައި

މިއަދު ދުނިޔޭގެ އެންމެންގެ ނަޒަރު ހުއްޓިފައިވަނީ ރަޝިޔާއާ ޔޫކްރެއިނާ ދެމެދު ކުރެވެމުންދާ ހަނގުރާމަށެވެ. ރަޝިޔާއިން ޔޫކްރެއިނަށް ދެމުންދާ ހަމަލާތަކަށެވެ. މި ހަނގުރާމައިގެ ސަބަބުން ނިކަމެތިވެގެން ދަނީ ހަމައެކަނި ޔޫކްރެއިންގެ ސަރުކާރެއް ނޫނެވެ. މުޅި އެގައުމެވެ. ބިކަވެ ހާލުގައި ޖެހެނީ އެގައުމުގެ ރައްޔިތުންނެވެ. މިއީ މުޅި ދުނިޔެ މިއަދު އެކަމަކާމެދު ކަންބޮޑުވުން ފާޅުކުރަމުން އަންނަ ކަމެކެވެ.

މި ހަނގުރާމައިގެ ތެރޭގައި ކުރިމަތިވަމުންދިޔަ ނުރައްކާތަކުން ސަލާމަތްވުމަށް ޔޫކްރެއިން ދޫކޮށް ޕޮލެންޑަށް ދަތުރުކުރި, ޔޫކްރެއިނަށް ނިސްބަތްވާ ޒުވާނެއްގެ ވާހަކައަށް ޖެހިލާނަމެވެ. މިދިޔަ ފެބްރުއަރީ މަހުގެ 24 ވަނަ ދުވަހު ޔޫކްރެއިންގެ މައި ސިޓީ ކިޔެވްއަށް ރަޝިޔާއިން ދޭންފެށި ހަމަލާތަކާއެކު އުމުރުން 26 އަހަރުގެ އޮލްގާ ބެލަބަންއަށް ވިސްނުނީ އޭނާއަށާއި އާއިލާއަށް އެންމެ ރައްކާތެރިވާނީ ގައުމު ދޫކޮށް ދިއުން ކަމަށެވެ. އެއާއެކު އޭނާގެ މަންމައާއި، 74 އަހަރުގެ މުސްކުޅި މާމަގެ އިތުރުން، 18 އަހަރުގެ ފިރިހެން ކޮއްކޮ ގޮވައިގެން އޭނާ މިސްރާބުޖެހީ ޔޫކްރެއިންގެ ބޯޑަރާ ދިމާއަށެވެ.

ރޭލުގައި އޭނާ މި ދަތުރު ފެށިއިރު އޭގެ ދެބައިކުޅަ އެއްބައި އޮތީ ހުހަށެވެ. ނަމަވެސް ވަކި ހިސާބަކުން ގިނަ ބަޔަކު ރޭލަށް އަރައި ފުރާލިއެވެ. އެމީހުންގެ އަތުން ޓިކެޓް ރުފިޔާ ނެގުމުގެ ބަދަލުގައި ރޭލުގެ މުވައްޒަފުންވެސް ބެލީ ގިނަ ބަޔަކު އެއަށް އަރުވައިގެން ރައްކާތެރި ހިސާބަކަށް ގެންދެވޭތޯއެވެ. ރޭލުގެ ތެރޭގައި ކުދިބޮޑު މީހުންގެ ރުއިމުގެ އަޑާއެކު ކާރޫބާރޫ ބޮޑު މަގުތަކުގައި ދުއްވާފައި ބޯޑަރު ކައިރިއަށް ދެވުނުއިރު ތިން ގަޑިއިރު ވެއްޖެއެވެ.

ބޭރުގެ ނޫހަކަށް އޭނާ މައުލޫމާތުދިންގޮތުގައި އެމީހުން އެސަރަހައްދަށް ދިޔައިރު ބޯޑަރު ކައިރީގައި ގާތްގަނޑަކަށް 30 ކިލޯމީޓަރުގެ ދިގު ކިއުއެއް އޮތެވެ. އަމިއްލަ ވަޒަން ދޫކޮށް ދާން ކިއުގައި ތިބި މީހުންނެވެ. ދެ ދުވަހުގެ މުއްދަތަކަށް އެކިއުގައި މަޑުކުރަން ޖެހުނުއިރު، އެތައް ބަޔަކު އެސަރަހައްދުގައި ކުޑަކުދިންނާއި އުމުރުން ދުވަސްވީ މީހުން ގޮވައިގެންވެސް ތިއްބެވެ. ކިއުގައި މަޑުކުރަން ޖެހުމުގެ ސަބަބުން އޮޕަރޭޝަނަކުން ރަނގަޅުވަމުން އައި މާމައަށް ދިމާވެދާނެ ދަތިތަކަށް ބަލައި އެމީހުން މާމަ ފޮނުވާލީ އެތަނުން ކިއުގެ ކުރީގައި ތިބި ބަޔަކާ އެކުގައެވެ.

ގަދަ ފިނީގައި ދެދުވަސް ހޭދަކުރުމަށްފަހު ބޯޑަރު ކައިރިއަށް ދެވުމުން ދެންވެސް ކުރިމަތިލާން ޖެހުނީ ދަތި އުނދަގޫ ވަގުތަކާއެވެ. ޔޫކްރެއިންގެ ސްޓޭޓް ބޯޑަރ ގާޑުން އަންގަމުން ދިޔައީ 18 އަހަރާ 60 އަހަރާ ދެމެދުގެ ފިރިހެނުންނަށް ބޯޑަރު ހުރަސް ނުކުރެވޭނެ ކަމަށެވެ. އެއާއެކު އޭނާގެ މަންމަ, ކޮއްކޮއާއެކު މަޑުކުރަން ނިންމިއެވެ. އަދި އޮލްގާއަށް ބޯޑަރު ހުރަސްކުރަން ޖެހުނީ ލޯބިވާ މަންމައާއި ކޮއްކޮއަށް ކުރި ވަދާއީ ސަލާމާއެކުއެވެ. އެކަނިމާއެކަނި ޔޫކްރެއިންގެ ބޯޑަރު ހުރަސްކުރުމަށްފަހު އޮލްގާއަށް އޭނާގެ މާމައާ ބައްދަލުކުރެވުނީ ބޯޑަރުގެ އަނެއް ފަރާތުން އޭގެ ދެދުވަސް ފަހުންނެވެ.

މިއީ މި ހަނގުރާމައިގެ ސަބަބުން ޔޫކްރެެއިންގެ އެންމެ ރައްޔިތަކާއި އޭނާގެ އާއިލާއިން ކުރިމަތިލާން ޖެހުނު ތަކުލީފުތަކެވެ. ރަޝިޔާއިން ދެމުންދިޔަ ހަމަލާތަކުގައި މީގެ ކިތައް ހާސް މީހުން ތިބޭނެބާއެވެ؟ އަދި ހަމަލާތަކުގެ ސަބަބުން ތިމާގެ މީހުން މަރުވުމާއި ހާލުގައި ޖެހުނު މީހުންވެސް ވަކި މަދެއް ނުވާނެކަން ގައިމެވެ.