ޝަރީއަތް ނިމެންދެން ބަންދުކޮށްފައި ހުއްޓައި ޕެސްޓް ދޫކޮށްލި މައްސަލަ ޕީޖީން އިސްތިއުނާފުކޮށްފި
2 މާރިޗު 2022 | ބުދަ 10:42ޕެސްޓުގެ މައްޗަށް 5 ދައުވާއެއް އުފުލި
މަޝްހޫރު ރެޕް ލަވަކިޔުންތެރިޔާ ޏ. ފުވައްމުލަކު ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު)
މަސްތުވާތަކެތީގެ މައްސަލައަކާއި ގުޅިގެން ޝަރީއަތް ނިމެންދެން ބަންދުކޮށްފައި ހުއްޓައި މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގޭ ބަންދަށް ދޫކޮށްލި މައްސަލަ ޕްރޮސެކިއުޓަރ ޖެނެރަލް (ޕީޖީ) އޮފީހުން ހައިކޯޓުގައި އިސްތިއުނާފު ކޮށްފިއެވެ.
މި މައްސަލައިގައި ޕެސްޓް ހިމެނޭހެން ފަސް މީހެއްގެ މައްޗަށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށައެޅީ 2021 ވަނަ އަހަރުގެ އޭޕްރީލް މަހުއެވެ. މި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށް ގެންގޮސް، އޭނާ ޝަރީއަތް ނިމެންދެން ބަންދުކޮށްފައި ހުއްޓައި ގާޒީ ވަނީ ބޭސްފަރުވާއަށް އޭނާ ޝަރުތުތަކާއެކު ގޭބަންދަށް ދޫކޮށްލައްވާފައެވެ. އެގޮތުން އޭނާ ގޭ ބަންދަށް ބަދަލު ކުރީ 60 ދުވަހަށެވެ.
އެކަމާ ގުޅޭގޮތުން ޕީޖީ އޮފީހުގެ މީޑިއާ އޮފިޝަލު ރާއްޖެއެމްވީއަށް ވިދާޅުވީ، ކްރިމިނަލް ކޯޓުގެ އެ ނިންމުން ހޯމަ ދުވަހު ހައިކޯޓުގައި އިސްތިއުނާފު ކޮށްފައިވާ ކަމަށެވެ. ހައިކޯޓުގެ ލިއުންތަކުން މި މައްސަލަ ހުށައެޅިފައިވާކަން ފެނުނު ނަމަވެސް، މައްސަލަ ބަލައިގަތުމާމެދު އަދި ގޮތެއް ނިންމާފައިވާކަން އެނގޭކަށް ނެތެވެ.
ޕެސްޓް ހައްޔަރުކޮށްފައިވަނީ ގިނައަދަދެއްގެ މަސްތުވާތަކެތި ރާއްޖެ އެތެރެކުރުމަށްފަހު އެތަކެތި ގެންގުޅެ، ބޭނުންކޮށް އަދި ވިޔަފާރި ކުރާކަމަށް ލިބުނު މައުލޫމާތަކާއި ގުޅިގެން ފުލުހުން ހިންގި އޮޕަރޭޝަނެއްގެ ތެރެއިން 2021 ވަނަ އަހަރުގެ ފެބްރުއަރީ މަހުގެ 13 ވަނަ ދުވަހުއެވެ. މި އޮޕަރޭޝަންގައި ޕެސްޓްގެ އިތުރުން ފުލުހުން ހައްޔަރުކޮށްފައިވަނީ، ލ. ގަން/ތުނޑި، ހަނދުވަރީހިޔާ، އަހްމަދު ޝަމްއޫނާއި ލ. ގަން/ތުނޑި، ރޯޝަންހިޔާ، އަހްމަދު ހުސާމާއި ލ. ގަން/ތުނޑި، އަބަދަށްއުފާ، މުހައްމަދު ސުއައިދު އާއި ކ. މާލެ/ މ.އަސަރީހަދާން، އާއިޝަތު ހަސްނާ ނާހިދުއެވެ.
މި މައްސަލައިގައި ޕްރޮސެކިއުޓަރ ޖެނެރަލްގެ އޮފީހުން ބުނީ، 13 ފެބްރުވަރީ 2021 ދުވަހު، ދިވެހިރާއްޖެއަށް މަސްތުވާތަކެތި އެތެރެކުރުމަށްފަހު އެތަކެތި މއ. ވީމާގޭގައާއި، ގ.ރިހިއަވިގޭގެ އިތުރުން މައްސަލާގައި ދައުވާލިބޭ މީހުންނާ ގުޅުންހުރި ތަންތަނުގައި ބޭނުންކޮށް، ގެންގުޅެ އަދި އެތަކެތީގެ ވިޔަފާރި ކުރާކަމަށް ތުހުމަތު ކުރެވޭ ކަމަށެވެ.
މައްސަލައިގައި ތުހުމަތުކުރެވޭ ޕެސްޓްގެ މައްޗަށް ފަސް ދައުވާއެއް އުފުލާފައިވެއެވެ. އެއީ ކެނެބިސް ޓްރެފިކްކުރުމުގެ ކުށުގެ ދައުވާ އާއި، ޑައިމޯފިން ޓްރެފިކް ކުރުމުގެ ކުށުގެ ދައުވާ އާއި، މަސްތުވާތަކެއްޗާބެހޭ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އާއި، ކެނެބިސް ބޭނުންކުރުމުގެ ކުށުގެ ދައުވާގެ އިތުރުން ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާއެވެ.
