ކާޑެއްދޫ އެއަރޕޯޓް، ވިލާ އެއަރއަށް
1 މާރިޗު 2022 | އަންގާރަ 13:07މާޗް މަސް ނިމުމުގެ ކުރިން އެއަރޕޯޓު އޮޕަރޭޝަނަށް ގެނައުމަށް ދަނީ މަސައްކަތް ކުރަމުން
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ގދ. ކާޑެއްދޫ ޑޮމެސްޓިކް އެއަރޕޯޓް ވިލާ އެއަރއާ ހަވާލުކޮށްފިއެވެ.
އެއަރޕޯޓް ހަވާލުކުރުމުގެ އެއްބަސްވުމުގައި ސޮއިކުރުން އޮތީ އަންގާރަ ދުވަހުގެ ހެނދުނު މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގައެވެ.
އެއްބަސްވުމުގައި ވިލާ އެއަރގެ ފަރާތުން ސޮއިކުރެއްވީ ވިލާ ގްރޫޕްގެ ޗެއަރމަން އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމްއެވެ. އެއްބަސްވުމުގައި ސޮއިކުރުމުގެ ރަސްމިއްޔާތުގައި ވިލާ އެއަރގެ މެނޭޖިންގ ޑިރެކްޓަރ އަބްދުﷲ ނާޝިދާއި، ކާޑެއްދޫ އެއަރޕޯޓުގެ އައު މެނޭޖިންގ ޑިރެކްޓަރ ހަބީބުވެސް ބައިވެރިވެވަޑައި ގެންނެވިއެވެ.
ވިލާއިން ބުނީ މާޗް މަސް ނިމުމުގެ ކުރިން އެއަރޕޯޓު އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. ސަރުކާރާއެކު އެއްބަސްވެފައިވާ ގޮތުގެ މަތިން ވިލާ އެއަރއިން ހިންގަން ފަށާތާ ފުރަތަމަ 7 އަހަރުގެ ތެރޭގައި ކާޑެއްދޫ އެއަރޕޯޓް ބައިނަލްއަގުވާމީ ފެންވަރަށް ތަރައްގީކުރުމަށް ވެސް ހަމަޖެހިފައިވެއެވެ.
ވިލާ އެއަރއިން މިހާރުވެސް ޕްލޭންކޮށްފައިވާ ގޮތުގެމަތިން ކާޑެއްދޫ އެއަރޕޯޓުން ދެވޭ ޚިދުމަތްތަކުގެ ފެންވަރު މަތިކުރެވި، އިތުރަށް ތަރައްގީ ކުރެވިގެންދާނެއެވެ. މިކަމުގެ ފައިދާ ސަރަހައްދުގެ ވިޔަފާރިތަކަށާއި، އާންމުންނަށް ވެސް ކުރާނެ ކަމަށް ވިލާއިން ބުނެއެވެ.
ކާޑެއްދޫ އެއަރޕޯޓަކީ އާންމު މަސްލަހަތުތަކާ ވަރަށް ބޮޑަށް ގުޅުންހުރި ކަމަކަށްވާތީ، މީގެ ކުރިން އެއަރޕޯޓް އެއްބަސްވުން ބާތިލްކުރުމުން ވިލާ އެއަރއަށް ލިބުނު ގެއްލުންތަކުގެ ބަދަލު ހޯދަން މަސައްކަތް ނުކުރުމަށް ވިލާ ގްރޫޕްގެ ޗެއަރމަން އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމްއާއި ވިލާ ގްރޫޕުން ވަނީ ނިންމާފައެވެ.
އެއަރޕޯޓްގެ އެއްބަސްވުން ބާތިލްކޮށް ސަރުކާރުން އެއަރޕޯޓް އަތުލުމުން, ވިލާ ގްރޫޕުން އެ މައްސަލަ ކޯޓަށް ހުށަހެޅުމުން, އެއްބަސްވުން ބާތިލްކޮށްފައިވަނީ ގޯސްކޮށް ކަމަށް ބުނެ އެއަރޕޯޓް ވިލާ ގްރޫޕާ އަނބުރާ ހަވާލުކުރަން ސުޕްރީމް ކޯޓުން ހުކުމް ކޮށްފައިވަނީ މިދިޔަ 2021 ވަނަ އަހަރުއެވެ.
ކާޑެއްދޫ އެއަރޕޯޓް ވިލާ އެއަރއާ ހަވާލުކުރުމާ ގުޅިގެން ވިލާ ގްރޫޕްގެ ޗެއަރމަން ގާސިމް އިބްރާހީމް މިއަދު ކާޑެއްދޫއަށް ވަޑައިގަތުމަށް ވަނީ ހަމަޖެހިފައެވެ.
