މާލީ ބަޔާނުގައި ދޮގު ހަދައިފިނަމަ ބޮޑެތި އަދަބުތަކެއް ދޭ ގޮތަށް ކަނޑައަޅާފައިވާ ބިލް ހުށަހަޅާ، ބަހުސް ފަށައިފި
1 މާރިޗު 2022 | އަންގާރަ 08:52މިބިލް ރައްޔިތުންގެ މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނާއިބު ރައީސް އީވާ އަބްދުﷲ
އީވާ އަބްދުﷲ / ގަލޮޅު އުތުރު ދާއިރާގެ މެމްބަރު
މާލީ ބަޔާން ހުށަހަޅަން ޖެހޭ ފަރާތްތަކުން ދޮގު މައުލޫމާތެއް ދީފިނަމަ ބޮޑެތި އަދަބުތައް ކަނޑައަޅާގޮތަށް މަޖިލީހަށް ހުށަހަޅާފައިވާ މާލީ އަދި އެހެނިހެން މަސްލަހަތުތައް ހާމަކުރުމުގެ ބިލް ހުށަހަޅާ، އެބިލްގެ ބަހުސް ފަށައިފިއެވެ.
މިބިލް ރައްޔިތުންގެ މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނާއިބު ރައީސް އީވާ އަބްދުﷲ އެވެ. ބިލް ހުށަހަޅުއްވަމުން އީވާ ވިދާޅުވީ މިބިލަކީ ޓްރާންސްޕޭރެންސީ މޯލްޑިވްސް އާއި ގުޅިގެން ހުށަހަޅުއްވާ ބިލެއްކަމަށެވެ. ބިލުން އެޖެންޑާ 19ގެ ވައުދުތަކުގައި ބަޔާންކޮށްފައިވާ ކަންކަންވެސް ހާސިލުވާކަމަށް އީވާ ވިދާޅުވިއެވެ.
މިބިލަކީ ގާނޫނުއަސާސީ އާއި ގާނޫނުތަކުގެ ދަށުން މާލީ ބަޔާން ހުށަހަޅަންޖެހޭ މީހުންނާއި މިގާނޫނުގައި ކަނޑައަޅާފައިވާ ދައުލަތުގެ މަގާމުތައް އަދާކުރާ ފަރާތްތަކުން އެފަރާތްތަކުގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި ވިޔަފާރީގެ މަސްލަހަތުތަކާއި ދަރަނީގެ އިތުރުން އެފަރާތްތަކުގެ އެހެނިހެން މަސްލަހަތުތައް ހާމަކޮށް ތައްޔާރުކުރާ ބަޔާން ހުށަހެޅުމުގައި އަމަލުކުރަން ޖެހޭ އުސޫލުތަކާއި ބަޔާން ބަލައިގަނެ ބަޔާނުގައިވާ މައުލޫމާތުގެ ސައްހަކަން ދެނެގަތުމާއި ބަޔާނާއި ގުޅިގެން އިތުރަށް އަޅަންޖެހޭ ފިޔަވަޅުތައް އެޅުމުގެ އުސޫލުތައް ބަޔާންކުރާ ބިލެއްކަމަށް އީވާ ވިދާޅުވިއެވެ.
އީވާ ވިދާޅުވީ ބިލް ހުށަހަޅުއްވާ މައިގަނޑު ސަބަބަކީ އެމްޑީޕީން ރައްޔިތުންނަށް ވީވައުދުތައް ފުއްދުމުގެ ގޮތުންކަމަށެވެ.
އީވާ ވިދާޅުވީ އެޖެންޑާ 19ގެ ދަށުން ރައްޔިތުންގެ މަޖިލީހުގެ މެމްބަރުންގެ މާލީ ބަޔާން ހާމަކުރާއިރު މިބިލް ގާނޫނަކަށް ވެގެންދިޔުމުން އެއުސޫލު ހުރިހާ އިދާރާތަކަކަށްވެސް ހިނގާނެކަމަށެވެ.
ބިލްގެ ޖަދުވަލް 1 ގައި ބަޔާން ހުށަހަޅަންޖެހޭ ފަރާތްތައް ހިމަނާފައިވާއިރު އޭގެތެރޭގައި ހިމެނެނީ ރައީސުލްޖުމްހޫރިއްޔާ، ނާއިބު ރައީސް، ވަޒީރުންގެ މަޖިލީހުގެ މެމްބަރުން، ރައްޔިތުންގެ މަޖިލީހުގެ މެމްބަރުން، ފަނޑިޔާރުން، މިނިވަން މުއައްސަސާތަކުގެ މެމްބަރުން، ޕީޖީ އަދި ޑެޕިޔުޓީ ޕީޖީ، ރިޔާސީ ކޮމިޝަންތަކުގެ މެމްބަރުން، ކޮމިޝަނަރ ޖެނެރަލް އޮފް ޓެކްސޭޝަން، ޑެޕިޔުޓީ ޖެނެރަލް އޮފް ޓެކްސޭޝަން އަދި މީރާގެ ގަވަރނިންގ ބޯޑުގެ މެމްބަރުން، ކޮމިޝަނަރ ޖެނެރަލް އޮފް ކަސްޓަމްސް، ޑެޕިޔުޓީ ކޮމިޝަނަރ އޮފް ކަސްޓަމްސް، އެސިސްޓެންޓް ކޮމިޝަނަރ އޮފް ކަސްޓަމްސް، ކޮމިޝަނަރ އޮފް ޕޮލިސް، ޗީފް އޮފް ޑިފެންސް ފޯސް، ވައިސް ޗީފް އޮފް ޑިފެންސް ފޯސް، ދައުލަތުގެ އިދާރާތަކުގެ ޕާމަނަންޓް ސެކެޓްރީން، އެމްއެމްއޭގެ ގަވަރުނަރު ހިމެނެއެވެ.
ބިލްގައި ބުނެފައިވަނީ ތެދު ނޫން މައުލޫމާތެއް މާލީ ބަޔާނުގައި ހިމަނައިފިނަމަ، ނުވަތަ މައުލޫމާތު ފުރިހަމަނުވާނަމަ ކަމުގެ ކުޑަ ބޮޑު މިނަށް ބަލައި އެކަމެއް ކުރާ ފަރާތެއް ގިނަވެގެން ފަސް ލައްކަ ރުފިޔާއިން ޖޫރިމަނާކުރަންވާނެ ކަމަށެވެ. އަދި މިކުށުގެ އަދަބަކީ ގިނަވެގެން 2 އަހަރުގެ ދުވަހަށް ޖަލަށްލުމާއެކު އެކުށްކުރާ މީހަކު ދައުލަތުގެ މަގާމަކުން ވަކިކުރުމެވެ.
