މިވަގުތު ޔޫކްރެއިންގައި ތިބީ 9 ދިވެހިންކަމަށް ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މިއުވާން މުހައްމަދު ވިދާޅުވީ ޔޫކްރެއިންގެ ވެރިރަށް ކިއޭވް ކައިރީގައި ދިރިއުޅެމުން ދިޔަ ދިވެހި އާއިލާއެއް، އެއީ ދިވެއްސަކާއި ކައިވެނިކޮށްގެން އުޅޭ ޔޫކްރެއިން ރައްޔިތެއް އަދި އެދެމަފިރިންގެ ކުޑަ 2 ކުދިން މިހާރު ވަނީ ބޯޑަރު ހުރަސްކޮށް، ހަންގޭރީއަށް އެތެރެވެފައިކަމަށެވެ. ޚަރްކީވްގައި ތާށިވެފައި ތިބި ކުދިން ރައްކާތެރި ހިސާބުތަކަށް ގެންދިޔުމަށް އިތުރު ޤައުމުތަކާއި ގުޅިގެން ދަނީ މަސައްކަތްކުރަމުން ކަމަށް ވިދާޅުވިއެވެ. އަދި ޚަރްކީވްގައި ތިބި ދިވެހި ދަރިވަރުންނަށް ފޮރިން މިނިސްޓަރު އަބްދުﷲ ޝާހިދު ހޯމަ ދުވަހު ފޯނުން ގުޅުއްވައި، އެކުދިންގެ ޙާލު ބެއްލެވިކަމަށް މިއުވާން ވިދާޅުވިއެވެ. މިހާރު ޔޫކްރެއިންގައި ތިބީ ޚަރްކީވް ގައި 8 ދިވެހިންނާއި ނީޕްރޯގައި އެކަކެވެ.

މީގެއިތުރުން ބެލަރޫސްގައި ކިޔަވަމުންދާ ދަރިވަރުންގެ ތެރެއިން އަނބުރާ ރާއްޖެ އަންނަން ބޭނުންވާ ދަރިވަރުންނަށް މާލެ އައުމަށް މާލީ އެހީތެރިކަން ފޯރުކޮށްދިނުމަށް ނިންމައި، ދަރިވަރުންނަށް ވަނީ އެކަން އަންގާފައިކަމަށް މިއުވާން ވިދާޅުވިއެވެ. ބެލަރޫސްގައި ކްލާސްތައް މެދުނުކެނޑި ހުރިހާ ޔުނިވަރސިޓީއެއްގައި ކުރިއަށްދާ ކަމަށް ވިދާޅުވިއެވެ.

ރަޝިޔާގައި ކިޔަވަމުންދާ ދަރިވަރުންގެ ތެރެއިން އަނބުރާ ރާއްޖެ އަންނަން ބޭނުންވާ ދަރިވަރުންނަށް މާލެ އައުމަށް މާލީ އެހީތެރިކަން ފޯރުކޮށްދިނުމަށް ނިންމައި، ދަރިވަރުންނަށްވެސް ވަނީ އެކަން އަންގާފައިކަމަށް މިއުވާން ވިދާޅުވިއެވެ. ރަޝިޔާގައިވެސް ކްލާސްތައް މެދުނުކެނޑި ހުރިހާ ޔުނިވަރސިޓީއެއްގައި ކިޔެވުން ކުރިއަށްދާ ކަމަށް މިއުވާން ވިދާޅުވިއެވެ.

ކްލާސްތައް އޮންލައިން ކްލާސްތަކަށް ބަދަލުކުރެވޭތޯ ދަރިވަރުން ދަނީ ޔުނިވަރސިޓީއާއެކު މަޝްވަރާކުރަމުން ކަމަށާއި ދަރިވަރުންނަށް މިކަމުގައި ބޭނުންވާ އެހީތެރިކަން ބަރލިންގައި ހުންނަ ދިވެހި ރާއްޖޭގެ އެމްބަސީއިން އަންނަނީ ފޯރުކޮށްދެމުން ކަމަށް މިއުވާން ވިދާޅުވިއެވެ.