ރަޝިޔާއިން ދަނީ ހަނގުރާމައިގެ ކުށްތަކަށް އަރައިގަންނަމުން: ޔޫކްރެއިން ރައީސް

ރަޝިޔާއިން އަންނަނީ ހަނގުރާމައިގެ ކުށްތަކަށް އަރައިގަންނަމުން ކަމަށާއި އެކަންކަން ބެލެންޖެހޭކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.

ޓީވީ މެދުވެރިކުރައްވާ ވާހަކަދައްކަމުން ޒެލެންސްކީ ވިދާޅުވީ ރަޝިޔާއިން ފާއިތުވި ފަސް ދުވަހު 56 ރޮކެޓް ހަމަލާ އަދި 113 ކްރޫޒް މިސައިލް ހަމަލާ ޔޫކްރެއިންއަށް ފޮނުވާލާފައިވާކަމަށެވެ. ޒެލެންސްކީ ވިދާޅުވީ ރަޝިޔާއިން ހިންގަމުންދާ ހަނގުރާމައިގެ ކުށްތައް ބައިނަލްއަގްވާމީ ގޮތުން ބެލެންޖެހޭކަމަށެވެ.

ޒެލެންސްކީ ވިދާޅުވީ ރަޝިޔާގެ މިސައިލްތަކާއި، މަތިންދާ ބޯޓުތަކާއި ހެލިކޮޕްޓަރުތަކަށް ނުއުދުހެވޭ ޒޯނެއް ކަނޑައަޅަންޖެހޭކަމަށެވެ.

މީގެއިތުރުން ޒެލެންސްކީ ވިދާޅުވީ ސުލްހައިގެ ވާހަކަތަކުގެ ފުރަތަމަ ބުރު ކުރިޔަށްދިޔައިރުވެސް ރަޝިޔާއިން ދިޔައީ ޔޫކްރެއިން އަށް ހަމަލާތައް ދެމުންކަމަށެވެ. ޒެލެންސްކީ ވިދާޅުވީ ސުލްހައިގެ ވާހަކަތައް ކުރިޔަށްދާނީ ދެ ފަރާތުންކުރެ އެއްވެސް ފަރާތަކުން ހަމަލާ ނުދޭކަމަށްވާނަމަ ކަމަށެވެ.

ޒެލެންސްކީ ވިދާޅުވީ ރަޝިޔާއިން ދެމުންދާ ހަމަލާތަކުގެ ހެކިންގެ ގޮތުގައި އެތައް ހާސް ބަޔަކު އެބަތިބިކަމަށެވެ. އަދި އާންމުންނަށް އަމާޒުކޮށް ހަމަލާދެނީ ގަސްތުގައި ކަމަށް ޒެލެންސްކީ ވިދާޅުވިއެވެ.

ޒެލެންސްކީ ވަނީ ޔޫކްރެއިންގެ ވެރިރަށް ކިޔެވްގައި ދިރިއުޅޭ ރައްޔިތުންނަށް އެސިޓީއަށް އަމާޒުކޮށް އިތުރު ހަމަލާތައް އަމާޒުވާނެކަމުގެ އިންޒާރު ދެއްވާފައެވެ. ކިޔެވް އަކީ ދުޝްމިނުންގެ އެންމެ މައި އަމާޒުކަމަށް ޒެލެންސްކީ ވިދާޅުވިއެވެ. ދުޝްމަނުން ބޭނުންވަނީ އެސިޓީގެ ކަރަންޓް ކަނޑާލާ ކަނުއަނދިރީގައި ރައްޔިތުން ބޭތިއްބުމަށްކަމަށްވެސް ވިދާޅުވިއެވެ.

މީގެއިތުރުން ޒެލެންސްކީ ވިދާޅުވީ ރަޝިޔާ އާއި ދެކޮޅަށް ހަނގުރާމަ ކުރުމަށް ބޭނުންވާ މީހުންނަށް ޔޫކްރެއިން އަށް ވިސާ އާއި ނުލާ އެތެރެވެވޭނެކަމަށެވެ.

ޒެލެންސްކީގެ ވާހަކަފުޅުގައި ވަނީ އދ އަށްވެސް ފާޑުވިދާޅުވެފައެވެ. އެގޮތުން ހަނގުރާމައިގެ ކުށްތަކަށް އަރައިގަންނަ ބަޔަކަށް އދ ގެ ސަލާމަތީ މަޖިލީހުގެ ދާއިމީ މެމްބަރެއްގެ ގޮތުގައި އިނދެވިގެން ނުވާނެކަމަށް ވިދާޅުވިއެވެ.