ޕެރޯލް ދޭ ގައިދީންނަށް ކުރިއަށްގެންދާ "ފަހި ފުރުސަތު" ފްރޮގްރާމް ފުޅާކުރުމުގެ ގޮތުން، އާރްޑީސީއާއެކު އެމްއޯޔޫއެއްގައި ސޮއިކޮށްފި
މި އެމްއޯޔޫގެ މުއްދަތަކީ 12 މަސްދުވަސް
އެމްއޯޔޫގައި ސޮއިކުރުމުގެ ރަސްމިއްޔާތުގެ ތެރެއިން
މޯލްޑިވްސް ކަރެކްޝަނަލް ސަރވިސް (އެމްސީއެސް)އިން ގައިދީން ރިހެބިލިޓޭޓްކޮށް، މުޖްތަމައުއަށް ފައިދާހުރި ރަނގަޅު މަސައްކަތްތެރި ފަރުދުންގެ ގޮތުގައި ނެރުމަށް ކުރާ މަސައްކަތްތަކުގެ ތެރެއިން، ޕެރޯލް ފުރުސަތުގެ ދަށުން މުޖްތަމައުއަށް ދޫކުރާ ފަރާތްތަކަށް "ފަހި ފުރުސަތު"ގެ ނަމުގައި ކުރިއަށް ގެންދާ އިންޓަރންޝިޕް ޕްރޮގްރާމް ފުޅާކުރުމުގެ ގޮތުން މިނިސްޓްރީ އޮފް ހޯމް އެފެއަރޒްއާއި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރްޑީސީ)ން އެމްއޯޔޫއެއްގައި ސޮއިކޮށްފިއެވެ.
މި ފަހުމުނާމާގައި ސޮއިކުރުން ކުރިއަށް ގެންގޮސްފައިވަނީ މާފުށީ ޖަލުގައި ގައިދީންނަށް ހިންގާ ޑްރަގް ރިހެބިލިޓޭޝަން ޕްރޮގްރާމް އިފްތިތާހުކުރުމުގެ ރަސްމިއްޔާތުގައެވެ. މިނިސްޓްރީ އޮފް ހޯމް އެފެއަރޒްގެ ފަރާތުން މި ފަހުމުނާމާގައި ސޮއިކުރެއްވީ މިނިސްޓަރ އިމްރާން އަބްދުﷲއެވެ. އަދި މޯލްޑިވްސް ކަރެކްޝަނަލް ސަރވިސްގެ ފަރާތުން ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު މި ފަހުމުނާމާގައި ސޮއިކުރައްވާފައިވާއިރު، ރޯޑް ޑިވެލޮޕްމަންޓް ކޯޕަރޭޝަން ފަރާތުން ސޮއިކުރެއްވީ ޖެނެރަލް މެނޭޖަރ ހަސަން ސައީދުއެވެ.
މި އެމްއޯޔޫގެ މުއްދަތަކީ 12 މަސްދުވަހެވެ.
މި ފަހުމުނާމާގެ ދަށުން, "ފަހި ފުރުސަތު" ޕްރޮގްރާމް މެދުވެރިކޮށް, އެމްސީއެސްގެ ޖަލުތަކުގައި ހުކުމްތަންފީޒުކުރަމުންދާ ގައިދީންގެ ތެރެއިން, އުޅުން އެންމެ ރަނގަޅު، މުޖްތަމައުއަށް އެ ގައިދީންގެ ފަރާތުން ގެއްލުން ނުލިބޭނެކަމަށް ޔަގީންވާ ގައިދީން، އާރްޑީސީން ހަވާލުކުރާ މަސައްކަތްތައް ކުރުމުން އެލަވަންސް ލިބޭ ވަޒީފާއެއް އަދާކުރުމުގެ ފުރުސަތު ލިބިގެންދާނެއެވެ. އަދި މި ޕްރޮގްރާމް ކާމިޔާބުކަމާއެކު ފުރިހަމަކުރާ ފަރާތްތަކަށް އެ ކުންފުނިން ދާއިމީ ވަޒީފާ ލިބުމުގެ ފުރުސަތު ލިބިގެންދާނެއެވެ.
މިގޮތުން އޮކްޓޯބަރު 2020ގައި އިފްތިތާހުކުރެވުނު "ފަހި ފުރުސަތު"ގެ ދަށުން، ސްޓެލްކޯގައި, ޕެރޯލް ފުރުސަތު ލިބިފައިވާ ފަރާތްތައް މަސައްކަތްކުރަމުންދެއެވެ. މީގެ ތެރެއިން ބައެއް ފަރާތްތަކަށް ވަނީ ދާއިމީ ވަޒީފާ ލިބިފައެވެ.
