ޖެންޑަރ މިނިސްޓަރު: ފިޔަވައްޗަށް ވަނުމުން ކުޑައިރުގެ ހަނދާން ''އައި ލިވްޑް ދެއަރ ލައިފް''

ހުންނެވި މަގާމުގެ ގޮތުން އެތަނަށް ޒިޔާރަތް ކުރަން ޖެހެއެވެ. ދިރިއުޅެމުންދާ ކުޑަކުދިންގެ ހާލަތު ވަރަށް ގާތުން ބަލަންޖެހެއެވެ. ޚިދުމަތްތައް ދެމުންދަނީ އެންމެ ރަނގަޅަށްތޯ ބަލައި މޮނިޓަރ ކުރަންޖެހެއެވެ. މާ އުފާވެރި މާޒީއަކަށް ނުވި ނަމަވެސް މިއަދު ވެސް ފިޔަވައްޗަށް ޒިޔާރަތް ކޮށްފިނަމަ ކުޑައިރު ހަނދާންތައް ވަށާލައެވެ. އެއީ ސަބަބެއް ވެސް ނެތިއެއް ނޫނެއެވެ. ޖެންޑަރ މިނިސްޓަރު ކަމުގެ މަގާމުގައި ހުންނެވި އައިޝަތު މުހައްމަދު ދީދީ ކުޑައިރުގެ ދުވަސްތައް ހޭދަކުރެއްވީ ފިޔަވަތީގައި ކުދިން ދުވަސްތައް ހޭދަކުރަމުންދާ ގޮތަށެވެ.

މާޒީގެ ބައެއް ސޮފުހާތަކާއި، މަސައްކަތުގެ ތަޖުރިބާ ވަރަށް ތަފްސީލީ ގޮތެއްގައި މިނިސްޓަރު އައިޝަތު ވަނީ ފަށާއިރުގައި ކިޔައިދެއްވާފައެވެ. މިނިސްޓަރުގެ ވާހަކަފުޅުތަކަށް ބަލާއިރު، އެކަމަނާއަށް 8 އަހަރު ވުމުގެ ކުރިން ތައުލީމު ހާސިލް ކުރުމަށް މާލެއަށް ބަދަލުކުރި އެވެ. މާލޭގެ ގެއެއްގައި ކިޔަވަން ހުރުމަށްފަހު އެގޭގެ މަންމަ ބަލިވުމާއި ގުޅިގެން ހޭސްލީން ނަމަކަށް ކިޔާ ބޯޑިން ތަނަކަށް ބަދަލުވީއެވެ. ސްކޫލު ދައުރު ނިންމާލީ އެތަނުގައި އުޅުނު 40 ވަރަކަށް ކުދިންނާއެކުއެވެ. ހަނދާނުން ފުހެލަން ދަތި ބައެއް ކަންކަން ހުރި ނަމަވެސް ހޭސްލީންއިން ދިރިއުޅުމުގެ ގިނަ ކަންކަން ދަސްކޮށްދިނެވެ. އޭގެ ތެރޭގައި ކެއްކުމާއި އިސްތިރިކުރުން ފަދަ މަސައްކަތްތައް ހިމެނެއެވެ.

އެހެންކަމުން މިއަދު ޖެންޑަރ މިނިސްޓަރުކަމުގެ މަގާމުގައި ހުންނަވާ ދައުލަތުގެ ބެލުމުގެ ދަށުގައި ތިބޭ ކުދިންގެ މަރުކަޒުތަކަށް ޒިޔާރަތް ކުރުމުން އެ ހަނދާންތައް އައު ވަމުންދާ ކަމަށް މިނިސްޓަރު ވިދާޅުވެފައިވެއެވެ.

މިނިސްޓަރު ސްކޫލުގެ ދައުރަށް ބަލާއިރު، ގިނަ އިތުރު ހަރަކާތްތަކުގައި ބައިވެރިވެފައިވެއެވެ. އެގޮތުން ބަހުސްކުރުމާއި، ވާހަކަ ދެއްކުމުގެ މުބާރާތްތަކަށް ބޮޑަށް އިސްކަންދެއްވިއެވެ. ކުޅިވަރު ކުޅުއްވުމަށް އެހާއި މޮޅު ނުވި ނަމަވެސް ފާރު މައްޗަށާއި، ފުރާޅު މައްޗަށް އަރުއްވައި ވަރަށް މަޖާ ކަންކަން ކުރުއްވާފައިވެއެވެ. އެގޮތުން ސްކޫލުގައި ހުރި އަނބު ގަހަކަށް އަރުއްވައި އަނބު ބިނދެ ޕްރިންސިޕަލް އޮފީހަށް ގެންދިޔަ ވާހަކަ ހިއްސާކުރެއްވީ ވަރަށް މަޖާ ރާގެއްގައެވެ. މިނިސްޓަރު ވިދާޅުވި ގޮތުގައި ސްކޫލުގެ ދައުރު މަސައްކަތް ކޮށްފިނަމަ ހުރިހާ ކަމެއް ވެސް ވާނެ ކަމަށް ވިސްނުނީ އޭރު ޓީޗަރަކަށް އުޅުއްވި ލަތީފާ އަހުމަދުގެ ނަސޭހަތުގެ ސަބަބުންނެވެ. އަދި އެއީ ހަނދާނުން ފުހެލަން ދަތި ރަނގަޅު މުދައްރިސެއްގެ ގޮތުގައި މިނިސްޓަރު ސިފަކުރެއްވިއެވެ.

މިނިސްޓަރު މިއަދު ވެސް މަސައްކަތް ކުރައްވަމުން ގެންދަވަނީ އެއަޒުމުގައެވެ. މަސައްކަތް ކޮށްފިނަމަ ނުވާނެ ކަމެއް ނޯންނާނެ ކަމަށް އެކަމާނާ ގަބޫލުކުރައްވައެވެ. ސިޔާސީ މައިދާނަށް ނުކުމެވުނު ގޮތާއި ގުޅޭ ގޮތުން މިނިސްޓަރު ވިދާޅުވީ ސިޔާސީ މީހަކަށް ވުމަށް އެއްވެސް އިރެއްގައި މަސައްކަތް ނުކުރައްވާ ކަމަށެވެ. ނަމަވެސް 2005 އަހަރުގެ މެދުތެރޭގައި ކުރީގެ ރައީސް މައުމޫން އަބްދުގައްޔޫމްގެ ވެރިކަމުގައި ކެބިނެޓަށް ޓެކްނިކަލް ބޭފުޅުންތަކެއް އަންޔަންކުރެއްވިއިރު ފުރުސަތު ލިބިވަޑައިގެންނެވީ ކަަމަށް މިނިސްޓަރު ވިިދާޅުވިއެވެ. އޭރުވެސް އެކަމަނާއާ މަތިކުރެއްވީ ޖެންޑަރ މިނިސްޓްރީ ކަމެވެ.

ރައީސް އިބްރާހިމް މުހައްމަދު ސޯލިހު ސަރުކާރު އަންނަންދެން މިނިސްޓަރު މަސައްކަތް ކުރެއްވީ ތައުލީމީ ދާއިރާގައެވެ. ގިނަ ވަގުތު ހޭދަ ކުރެއްވީ މާމަ ދަރިންގެ ގާތުގައެވެ. ނަމަވެސް މިސަރުކާރާއެކު އަނެއްކާ ވެސް ދައިރާ ބަދަލު ކުރެއްވިއެވެ. އެއީ ވަރަށް ވިސްނެވުމަށްފަހު ގައުމަށް ގިނަގުނަ ޚިދުމަތްތަކެއް ކުރައްވަން ބޭނުންފުޅުވާތީއެވެ. އެގޮތުން މިސަރުކާރުން ދެއްވި ފުރުސަތާއެކު ރާއްޖެއިން އިންޑިއާ އަށް ކަނޑައަޅުއްވާފައި ހުންނަވާ ސަފީރުކަމުގެ މަގާމު ގަބޫލުކުރައްވައި އިންޑިއާއަށް ދިރިއުޅުން ބަދަލުކުރެއްވިއެވެ. އަދި ހީނަރުވެފައިވާ ދެގައުމުގެ ގުޅުން ބަދަހި ކުރެއްވުމަށް ރެއާދުވާލު ގިނަ މަސައްކަތްތަކެއް ކުރެއްވިއެވެ. މި މިމަސައްކަތުގައި އުޅުއްވަނިކޮށް އޭރު ޖެންޑަރ މިނިސްޓަރު ކަމުގެ މަގާމުގައި ހުންނެވި ޝިދާތާ ޝަރީފް އިސްތިއުފާ ދެއްވުމާއި ގުޅިގެން އެމަގާމަށް އައުމަށް ފުރުސަތު ލިބިގެން ދިޔައެވެ. އަބަދުވެސް އިޖްތިމާއީ ރައްކާތެރިކަމަށް ކުރަންޖެހޭ މަސައްކަތްތައް ކުރުމަށް ޝައުގުވެރިކަން ހުންނާތީ އެ ފުރުސަތު ގަބޫލުކުރައްވައި މަސްއޫލިއްޔަތާއި ހާވަލުވެވަޑައިގެންނެވިއެވެ.

ދުވަސް ހޭދަކުރައްވާ ގޮތަށް އިޝާރާތްކުރައްވައި މިނިސްޓަރު ވިދާޅުވީ މަސައްކަތް ކުރައްވަނީ ވަކި ޝެޑިއުލެއްގެ ދަށުން ކަމަށެވެ. މަދުވެގެން ހަފްތާގެ ތިން ދުވަހު ކަސްރަތު ކުރުމަށް އިސްކަންދޭ ކަމަށެވެ. ނަމަވެސް ކޮންމެ ދުވަހެއްގެ ގިނަ ވަގުތު ހޭދަކުރައްވަނީ މަސައްކަތުގައެވެ.

މިނިސްޓަރު މިއަދު ހުންނެވީ މުޖުތަމައުއާއި އާއްމު ރައްޔިތުންނާއި އެންމެ ބޮޑަށް ގުޅުންހުރި މިނިސްޓްރީގެ މަސައްކަތްތަކާއި ހަވާލުވެވަޑައިގެންނެވެ. ގޮންޖެހުން ބޮޑު މަސައްކަތެއް ނަމަވެސް ރައްޔިތުންނަށް ޚިދުމަތް ކުރެއްވުމުގެ އަޒުމުގައެވެ. ހެޔޮ ބަދަލުތަކެއް ގައުމަށް ގެނެސްދެއްވުމަށެވެ. ސިޔާސީ މަސައްކަތްތަކުގައި ބައިވެރިވުމުގެ އެއްވެސް ޝައުގުވެރިކަމެއް ނެތް ނަމަވެސް މަސައްކަތް ކުރައްވަމުން ގެންދަވަނީ ގައުމާއި ޖީލުގެ ހައްގުގައެވެ.''އަޅުގަނޑު މިނިސްޓަރަކަށްވާ ހިތެއް ނުވޭ. އެކަމަކު މަސައްކަތް ކުރާ ހިތްވޭ. އެހެންވީމަ ޖެންޑަރ މިނިސްޓަރު ކަމާއި ހަވާލުނުވެވުނު ކަމަށް ހިތަކަށް ނާރާ.''މިނިސްޓަރު ވިދާޅުވިއެވެ.