އުރީދޫ ދިވެހި ޕްރިމިއާ ލީގުގައި ޔުނައިޓެޑް ވިކްޓްރީ (ޔޫވީ) އިން ކުލަބު ގްރީން ސްޓްރީޓްސް ބަލިކޮށްފިއެވެ.
ގައުމީ ފުޓުބޯޅަ ދަނޑުގައި ހޮނިހިރު ދުވަހުގެރޭ ކުޅުނު މެޗު ޔޫވީން ކާމިޔާބުކުރީ 1-0 ގެ ނަތީޖާއަކުންނެވެ.
ޔޫވީން އެންމެ ފަހުން ކުޅުނު މެޗުގައި ދަ ގްރާންޑޭ އަތުން ވަނީ މޮޅުވެފައެވެ. އަނެއްކޮޅުން ގްރީން ސްޓްރީޓްސް އެންމެ ފަހުން ކުޅުނު މެޗުގައި ވެލެންސިއާގެ މައްޗަށް ވަނީ ކުރިހޯދައިފައެވެ.
މި މެޗު ފަށައިގެން ފަސްވަނަ މިނެޓުގައި ޔޫވީގެ ކިރްގިސްތާން މިޑްފިލްޑަރު އަނަޓޯލީ ވްލަޝީޗޭފް (ޓޯނީ) ފޮނުވާލި ނުރައްކާތެރި ހަމަލާގެ ހުރަހަކަށްވީ ގްރީން ސްޓްރީޓްސްގެ ކީޕަރު ހަނީފް ސާގިބެވެ. އޭގެ ފަހުން ގްރީން ސްޓްރީޓްސްގެ ފޯވާޑް ހޯސޭ އަވީލާއަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭގެ ފަހުން މެޗުގެ 21 ވަނަ މިނެޓުގައި ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ނުރައްކާތެރި ހަމަލާއެއް ފޮނުވާލި ނަމަވެސް ޔޫވީގެ ކީޕަރު އަޙްމަދު އަނަފް ޒަރިޔަންދު ވަނީ ހުށިޔާރުކަމާއެކު މަތަކޮށްފައެވެ.
މެޗުގެ ދެވަނަ ހާފުގެ ވަރަށް ކުރީކޮޅު ޔޫވީން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ބެލަރޫސްގެ ފޯވާޑް އިވާން ވެރާސްއެވެ.
މި ލަނޑާއެކު ގްރީންއިން ވަނީ ކުރިއަށް ޖެހި ޔޫވީގެ ހާފަށް ބާރުބޮޑުކޮށްފައެވެ. އެގޮތުން މެޗުގެ 77 ވަނަ މިނެޓުގައި ގްރީންގެ އަވީލާއަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. މުޅިން ހުސްކޮށްހުރެ އޭނާ ބޮލުން ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.
މެޗުގެ ފަހު ކޮޅުގައި ގްރީން ސްޓްރީޓްސް އިން ދިޔައީ ފުލުފުލުގައި އެޓޭކްކުރަމުންނެވެ. އޭގެ ތެރެއިން ބޯޅައެއްގައި ގްރީން ސްޓްރީޓްސްގެ ކެޕްޓަން ރިލްވާން ވަހީދު (ރިލޭ) ޖެހި ބޯޅައެއް ޔުނައިޓެޑް ވިކްޓްރީގެ ކުޅުންތެރިއަކު އަތުގައި ޖެހުނު ކަމަށް ބުނެ، ޕެނަލްޓީ އަކަށް އެޕީލްކުރި ނަމަވެސް މެޗުގެ ރެފްރީ އަފްޝީން ނަސީރު ނިންމީ ޕެނަލްޓީ ދޭން ނުޖެހޭ ކަމަށެވެ.
މި ނަތީޖާއާއެކު ޔޫވީން ލީގު ތާވަލުގެ ގަދަ ތިނަކަށް އަރާފައިވާއިރު، އެއްވަނައިގައި އޮތް މާޒިޔާ އާއި ދެވަނައިގައި އޮތް ވެލެންސިއާ އަދި ތިންވަނައިގައި އޮތް ޔޫވީއަށް ވެސް ހަ ޕޮއިންޓް ވަނީ ލިބިފައެވެ. އެކަމަކު މާޒިޔާ އެއްވަނައިގައި އޮތީ އެއް މެޗު މަދުން ކުޅެ ލަނޑުގެ ތަފާތުންނެވެ. ދެވަނައިގައި އޮތް ވެލެންސިއާ އާއި ތިންވަނައިގައި އޮތް ޔޫވީ ލަނޑުގެ ގޮތުންވެސް އެއްވަރެވެ.
