ހދ. ކުޅުދުއްފުށި ރީޖަނަލް ހޮސްޕިޓަލުން މިހާރު ފޯރުކޮށްދެމުންދަނީ ޓާޝަރީ ފެންވަރުގެ ޚިދުމަތްތައް ކަމަށް އެ ހޮސްޕިޓަލްގެ މެނޭޖަރު އަހުމަދު ދާވޫދު ވިދާޅުވެއްޖެއެވެ.

ރީޖަނަލް ހޮސްޕިޓަލަށް ގެންނަމުންދާ ބަދަލުތަކާއި، ސިއްހީ ޚިދުމަތްތައް އިތުރަށް ފުޅާކުރުމަށް ކުރެވެމުންދާ މަސައްކަތްތަކާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ދާވޫދު ވިދާޅުވީ ކުޅުދުއްފުށި ރީޖަނަލް ހޮސްޕިޓަލަށް ދިމާވެފައިވާ ޖާގައިގެ ދަތިކަން ހައްލު ކުރުމުގެ ގޮތުން އައު ހޮސްޕިޓަލެއް އެޅުމަށް ނިންމާފައިވާ ކަމަށެވެ. އަދި އެހޮސްޕިޓަލް އެޅުމަށް ބިން ހަމަޖައްސާފައިވާކަމަށާއި މިއަހަރުގެ ތެރޭގައި ހޮސްޕިޓަލް އެޅުމުގެ އަމަލީ މަސައްކަތް ކުރެވިގެންދާނެ ކަމަށް އުންމީދު ކުރައްވާ ކަމަށް ދާވޫދު ވިދާޅުވިއެވެ.

ކުޅުދުއްފުށި ރީޖަނަލް ހޮސްޕިޓަލަށް އިޝާރާތް ކުރައްވައި ދާވޫދު ވިދާޅުވީ މިސަރުކާރުން ހަވާލުވިއިރު ހޮސްޕިޓަލްގެ ޚިދުމަތްތައް ވަރަށް ބޮޑަށް ދަށަށް ގޮސްފައިވާ ކަމަށެވެ. އަދި ކުރެވުނު މަސައްކަތާއެކު މިސަރުކާރުގެ ތިން އަހަރުގެ ތެރޭގައި ބޮޑެތި ބަދަލުތަކެއް ގެނެސް، ޚިދުމަތް ވަރަށް ބޮޑަށް ފުޅާކުރެވިފައިވާ ކަމަށް އޭނާ ވިދާޅުވިއެވެ. އެގޮތުން މިހާރު ހޮސްޕިޓަލުން ދެމުންދާ ޚިދުމަތްތަކަކީ ޓާޝަރީ ފެންވަރުގެ ޚިދުމަތްތަކެއް ކަމަށް ދާވޫދު ވިދާޅުވިއެވެ.

ޓާޝަރީ ފެންވަރުގެ ހޮސްޕިޓަލެއް ވަކިން އިމާރާތް ކުރުމަށް ނިންމާފައިވާ ނިންމުމާއި ގުޅޭ ގޮތުން ދާވޫދު ވިދާޅުވީ އެ ހޮސްޕިޓަލްގެ މަސައްކަތް ނިމުމާއެކު، ރީޖަނަލް ހޮސްޕިޓަލުގެ ޚިދުމަތްތައް އެ ހޮސްޕިޓަލަށް ބަދަލުކުރައްވާނެ ކަމަށެވެ. އަދި ވަކިން ދެ ހޮސްޕިޓަލެއް ހިންގުމަކީ ގޮންޖެހުންތަކެއް ކުރިމަތިވާނެ ކަމެއްގެ ގޮތުގައި އޭނާ ސިފަކުރެއްވިއެވެ. މީގެއިތުރުން ދާވޫދު ވިދާޅުވީ ޓާޝަރީ ހޮސްޕިޓަލް ނިމި ޚިދުމަތްތައް ބަދަލުކުރެވޭ ހިސާބުން މިހާރު އެޅުމަށް މަސައްކަތް ކުރާ ހޮސްޕިޓަލްގެ އިމާރާތް ވެސް ބޭނުންކުރަމުންދާނީ ހޮސްޕިޓަލްގެ އެކިއެކި ޔުނިޓްތައް ހިންގުމަށް ކަމަށެވެ. އަދި ވިދާޅުވީ މިކަންކަމުގައި ސަރުކާރު ލެވަލްގައި ވަކި ގޮތެއް އަންގާފައިނުވާ ކަމަށާއި، ކަންކަން ނިންމާނީ ރައްޔިތުންނަށް އެންމެ ރަނގަޅަށް ޚިދުމަތްތައް ފޯރުކޮށްދެވޭނެ ގޮތަށް ކަމަށެވެ.

މިސަރުކާރުގެ ތިން އަހަރުގެ ތެރޭގައި ކުޅުދުއްފުށި ރީޖަނަލް ހޮސްޕިޓަލަށް ބޮޑެތި ބަދަލުތަކެއް ގެނެސްފައިވާއިރު، މުވައްޒަފުންގެ އަދަދު 200 އިން 370 އަށް ވަނީ އިތުރުކޮށްފައެވެ. އެގޮތުން ޑޮކްޓަރުންނާއި ނަރުހުން އަދި ލެބޯޓްރީ ޓެކްނޮލޮޖިސްޓުންނާއި، ކުލިނިކަލް އެސިސްޓެންޓުންނާއި، ރިސެޕްޝަނިސްޓް އަދި ރޭޑިއޮގުރާފަރސްގެ އިތުރުން އެޓެންޑެންޓުންގެ އަދަދު ގާތްގަނޑަކަށް ދެ ގުނައަށް އިތުރު ކުރެވިފައިވާ ކަމަށް އެހޮސްޕިޓަލުން ބުނެއެވެ. ލެބޯޓްރީއަށް އައު ގިނަ މެޝިނަރީސް ހޯދުމުގެ އިތުރުން ގިނަ ތަހުލީލްތަކެއް ކުރެވޭނެ ގޮތްވެސް ހަދާފައިވާކަމަށް އެހޮސްޕިޓަލުން ވަނީ ބުނެފައެވެ. އަދި ތައާރަފްކޮށްފައިވާ ގިނަ ޚިދުމަތްތަކުގެ ތެރޭގައި އެމްއާރުއައި، ސީޓީ ޚިދުމަތާއި ތެލަސީމިޔާ ޑީއެންއޭ ޓެސްޓިންގެ ޚިދުމަތް، ސްޕީޗު ތެރަޕީގެ ޚިދުމަތް އަދި މެމޯގްރާމްގެ ޚިދުމަތް ތައާރަފުކޮށްފައިވެއެވެ. ދާއިމީ ފުޓުނި އަދި ރޫޓް ކެނަލްގެ ޚިދުމަތާއި ސާޖިކަލް އެކްސްޓްރެކްޝަނާއި މީގެއިތުރުންވެސް ދަތާއި ގުޅުން ހުރި ޚިދުމަތްތައް ތައާރަފު ކުރުމަށް ސްޓްރަކްޗަރަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރަމުންދާ ކަމުގައިވެސް އެހޮސްޕިޓަލުން ވަނީ ބުނެފައެވެ. އަދި ކުއްލި ހާލަތުގައި ފަރުވާ ދިނުމަށް ރިސަސިޓޭޝަން ރޫމެއް ހަދައި، ކުރިޓިކަލް ކެއަރ ދެވޭ ގޮތަށް ތަރައްގީ ކުރުމުގެ އިތުރުން އެންއައިސީޔޫ އަށް ވަނީ ތަފާތު ކުރިއެރުންތައް ގެނެސްފައިވާ ކަމަށްވެސް ހޮސްޕިޓަލުން ބުނެއެވެ.

މީގެ އިތުރުން ޑެންޓަލް އޯޕީޑީގެ ޚިދުމަތް ތައާރަފްކޮށްފައިވާއިރު، އައު ލޭބަރ ރޫމެއް ހަދައި ޚިދުމަތް ދޭން ވަނީ ފަށާފައެވެ. މޯބައިލް ކިއު ސިސްޓަމްއެއް ގާއިމްކޮށް، ޚިދުމަތްތައް ފޯރުކޮށްދިނުމަށް ފަސޭހަ ކުރުމަށް ކަސްޓަމަރުންނާއި ގުޅޭ އިތުރު ގޮތްތަކުގެ ތެރޭގައި ވައިބަރ، އެސްއެމްއެސް، ވެބްސައިޓް އަދި ސޯޝަލް މީޑިއާގެ ޒަރީއާއިން ތައާރަފު ކުރެވިގެން ދިޔަ ކަމަށް އެހޮސްޕިޓަލުން ބުނެއެވެ. އަދި ކުރިއަށް އޮތްތަނުގައި ވެސް ގިނަ ޚިދުމަތްތައް ތައާރަފްކުރެވި ހަރުދަނާ ކުރެވިގެންދާނެ ކަމަށް ހޮސްޕިޓަލުން ބުނެއެވެ.

ހދ. ކުޅުދުއްފުށި ރީޖަނަލް ހޮސްޕިޓަލުގެ އާބާތުރަ ފިލުވައި ކުލަ އައުކޮށް ބައެއް މަރާމާތުތައް ކުރުމަށް 2.2 މިލިއަން ރުފިޔާގެ ޕްރޮޖެކްޓެއް ހިންގާފައިވާކަމަށްވެސް އެހޮސްޕިޓަލުގެ ފަރާތުންވަނީ މައުލޫމާތު ދީފައެވެ.