އުޒްބެކިސްތާން އަދި ތައިލޭންޑާއި އެއް ގްރޫޕެއްގައި ރާއްޖެ ހިމެނިއްޖެ

އަންނަ އަހަރު ޗައިނާގައި ބާއްވާ އޭޝިއަން ކަޕް ކޮލިފައިންގެ ގްރޫޕް ސްޓޭޖުގައި ރާއްޖެ އާއި ސްރީލަންކާ، އުޒްބެކިސްތާން އަދި ތައިލޭންޑުން އެއް ގްރޫޕެއްގައި ލައްވާލައިފިއެވެ.

ކޮލިފިކޭޝަނުގެ ގްރޫޕް ސްޓޭޖު މެޗުތައް އަންނަ ޖޫން މަހު ސެންޓްރަލައިޒްކޮށް ކުޅޭނީ އުޒްބެކިސްތާނުގައެވެ. ކޮލިފިކޭޝަނުގެ މެޗުތައް ހޮސްޓު ކުރުމަށް ރާއްޖޭން ވެސް ހުށަހެޅިއެވެ. އެކަމަކު އެ ފުރުސަތު ދިން ހަ ގައުމުގެ ތެރޭގައި ރާއްޖެ ނުހިމެނެއެވެ. ކޮލިފިކޭޝަން މެޗުތައް ސެންޓްރަލައިޒްކޮށްގެން ކުޅެން ފުރުސަތު ލިބުނީ އުޒްބެކިސްތާން، މެލޭޝިއާ، ކުވެއިތު، މޮންގޯލިއާ، ކިރްގިސްތާން އަދި އިންޑިއާއަށެވެ.

ކޮލިފައިންގެ ފުރަތަމަ މެޗުގައި އަންނަ ޖޫން މަހުގެ އަށްވަނަ ދުވަހު ރާއްޖެއިން ނުކުންނާނީ ތައިލޭންޑާއި ދެކޮޅަށެވެ. ދެވަނަ މެޗުގައި ޖޫން މަހުގެ 11 ވަނަ ދުވަހު ރާއްޖެއިން ނުކުންނާނީ، އުޒްބެކިސްތާނާއި ދެކޮޅަށެވެ. އަދި ގްރޫޕް ސްޓޭޖުގެ ފަހު މެޗުގައި ޖޫން މަހުގެ 14 ވަނަ ދުވަހު ރާއްޖެއިން ނުކުންނާނީ ލަންކާއާ ދެކޮޅަށެވެ.

އޭޝިއަން ކަޕްގެ ކޮލިފައިން ހަ ގްރޫޕުގެ އެއް ވަަނަ ޓީމާއި ހަ ގްރޫޕްގެ ދެ ވަނަ ޓީމުތަކުގެ ތެރެއިން ފަސް ޓީމަށް ޗައިނާގައި 2023 ވަނަ އަހަރު ބާއްވާ އޭޝިއަން ކަޕުގެ ޖާގަ ލިބޭނެއެވެ.

ގައުމީ ޓީމާއި ދާދި ފަހުން ހަވާލުވި އިޓަލީގެ ކޯޗު ފްރެންޗެސްކޯ މޮރިއޭރޯއަށް ދީފައިވާ އެންމެ ބޮޑު ޓާގެޓަކީ އޭޝިއަން ކަޕަށް ރާއްޖެ ކޮލިފައި ކޮށްދިނުމެވެ.

އޭޝިއަން ކަޕް ކޮލިފިކޭޝަނަށް ތައްޔާރުވުމުގެ ގޮތުން އަން މަހުގެ 24 ވަނަ ދުވަހު ރާއްޖެއިން ބަންގްލަދޭޝް އާއި ދެކޮޅަށް ބައިނަލްއަގްވާމީ އެކުވެރިކަމުގެ މެޗެއް ކުޅޭނެއެވެ.

އޭޝިއަން ކަޕް ކޮލިފައިން ރާއްޖެ ގްރޫޕްގައި ހިމެނޭ ލަންކާއާ ދެކޮޅަށް މޮރިއޭރޯގެ ކޯޗުކަމުގައި ގައުމީ ފުޓްބޯޅަ ޓީމުން ވަނީ މިދިޔަ ނޮވެމްބަރު މަހު ލަންކާގައި ކުރިއަށްދިޔަ ފޯ ނޭޝަންސް ކަޕްގައި ކުޅެފައެވެ. އެ މެޗުގައި ރާއްޖެއިން 4-0 އިން ކުރީގައި އޮއްވައި ލަންކާއިން ވަނީ ފަހަތުން އަރާ ހަތަރު ލަނޑު ޖަހާ ނަތީޖާ ހަމަހަމަ ކޮށްފައެވެ.