އައިއެސްއާ ގުޅުންހުރި މީހަކު މާލެއިން ހައްޔަރުކޮށްފި

ހަރުކަށި ފިކުރުގެ ޖަމާއަތެއްކަމަށްވާ އިސްލާމިކް ސްޓޭޓް (އައިއެސް) ގުޅުންހުރި ދިވެއްސަކު މާލެއިން ހައްޔަރުކޮށްފިއެވެ.

އައިއެސް ޖަމާއަތުގެ މީހަކު މާލެއިން ހައްޔަރުކޮށްފައިވާ ކަމަށް ވިދާޅުވެ ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓުގައި ވިދާޅުވީ, އެމްރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި)އާއި ޔޫރަޕިއަން ޔޫނިއަންގެ 2 ގައުމެއްގެ އެހީތެރިކަމާއެކު ދިވެހި ފުލުހުން 30 އަހަރުގެ ދިވެހި ފިރިހެނަކު މާލެއިން ހައްޔަރުކޮށްފައިވާކަމަށެވެ.

ސީޕީ ވިދާޅުވީ މި މީހާ ހައްޔަރުކޮށްފައިވަނީ ޖެނުއަރީ މަހުގެ 6 ވަނަ ދުވަހު ކަމަށެވެ. އޭނާގެ މައްޗަށް ކުރެވޭ ތުހުމަތުތަކުގެ ތެރޭގައި ޓެރަރިސްޓް ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) ގުޅުން އޮންނަ ކަމާއި، މީޑިއާ ކެމްޕޭންތައް ކުރިއަށް ގެންދިއުމުގެ އިތުރުން, ހަރުކަށި ފިކުރު ފެތުރުން ހިމެނެއެވެ. މީގެ އިތުރުން ޔޫރަޕްގައި ޓެރަރިޒަމްގެ އަމަލު ހިންގަން ގޮވާލުމާއި، އެތަންތަނުގެ ވެރިންނަށް ގެއްލުން ދިނުމަށް ވެސް ގޮވާލާފައިވާކަމުގެ ތުހުމަތު ކުރެވެއެވެ.

ސީޕީ ވިދާޅުވީ އޭނާ މި ކަން ކުރަމުން އަންނަނީ 2015 ވަނަ އަހަރުން ފެށިގެން ކަމަށާއި، މި ހުރިހާކަމެއް ވެސް ކުރަމުން އަންނަނީ ރާއްޖޭގައި ހުރެގެން ކަމަށެވެ. އަދި މި މައްސަލަ ޓެރަރިޒަމްގެ ބޮޑު މައްސަލައެއްގެ ގޮތުގައި ބަލައި ތަހުގީގުކުރަމުން އަންނަ ކަމަށެވެ. މިކަމުގެ އިތުރު ތަފްސީލު ހާމަކުރައްވާނެ ކަމަށް ސީޕީ ވިދާޅުވިއެވެ.