ބޮޑު ކުރި މުސާރަ ފުލުހުންނަށް ހަމަ އަށް ނުލިބޭ މައްސަލަ ފެންމަތިވެއްޖެ
29 ޖުލައި 2025 | އަންގާރަ 13:53ސްޕެޝަލް ކޮންސްޓެބުލަރީ ކޮންސްޓަބަލް އަށް ދޭންޖެހޭ 85 އިންސައްތަ އުވާލަން ސަރުކާރުން ވަނީ މަޝްވަރާކޮށްފަ
ޕޮލިސް ސްޕެޝިއަލް ކޮންސްޓެބްލަރީ ކޮންސްޓަބަލް
ފުލުހުންގެ ޚިދުމަތުގައި މަސައްކަތް ކުރާ ސްޕެޝަލް ކޮންސްޓެބުލަރީ ކޮންސްޓަބަލްސް އަށް ދޭ މުސާރައިގެ 85 އިންސައްތަ 2024 ވަނަ އަހަރުގެ މާޗު މަހުން ފެށިގެން، އެ އެއަހަރުގެ ޑިސެމްބަރު މަހާ ހިސާބަށް ނުދޭކަން ހާމަވެއްޖެ އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ފުލުހުންނަށް ލިބޭ މުސާރައިގެ 85 އިންސައްތަ ސްޕެޝަލް ކޮންސްޓެބުލަރީ އަށް ދޭން ފަށާފައިވަނީ 2024 ވަނަ އަހަރުގެ ޑިސެމްބަރު މަހުން ފެށިގެންނެވެ. ފުލުހުންގެ މުސާރަ މިދިޔަ އަހަރުގެ މާޗު މަހު ބޮޑު ކޮށްފައި ވާއިރު ސްޕެޝަލް ކޮންސްޓެބުލަރީ ކޮންސްޓަބަލް ގައި މަސައްކަތް ކުރާ މުވައްޒަފުންނަށް އެ މުއްދަތުން ފެށިގެން ޑިސެމްބަރު މަހާ ހަމައަށް އެ ފައިސާ ދީފައެއް ނުވެ އެވެ.
ފުލުހުންގެ މުސާރަ އަށް އައި ބަދަލާއެކު ސްޕެޝަލް ކޮންސްޓެބުލަރީ ކޮންސްޓަބަލްގެ މުސާރަ އަށް އިތުރު ވަނީ 3،689 ރ. (ތިންހާސް ހަސްތޭކަ އައްޑިހަ ނުވަ ރުފިޔާ) އެވެ. އަދި އެ 9 މަހުގެ މުސާރައަށް އެ އަދަދު އިތުރުވެފައި ނުވާތީ ކަންބޮޑުވުން ފާޅުކުރި ނަމަވެސް މިއަދާ ހަމައަށް ވެސް އެ މުއްދަތުގައި ލިބެން ޖެހޭ ފައިސާ ލިބިފައެއް ނުވެއެވެ. ސްޕެޝަލް ކޮންސްޓެބުލަރީ ކޮންސްޓަބަލްގައި ޚިދުމަތް ކުރާ ގާތްގަނޑަކަށް 177 މުވައްޒަފުންނަށް އެ މުވައްޒަފުންގެ މުސާރަ އަށް މީގެ ކުރިން ނުދީވާ 9 މަހަށްވާ ފައިސާގެ ގޮތުގައި ކޮންމެ މުވައްޒަފަކަށް ޖުމުލަ 33،201 ރ. ( ތިރީސް ތިންހާސް ދުއިސައްތަ އެއް ރުފިޔާ) ލިބެން ޖެހެއެވެ.
ނަމަވެސް ރާއްޖެ އެމްވީ އަށް އެނގިފައިވާ ގޮތުގައި ސްޕެޝިއަލް ކޮންސްޓެބުލަރީ ކޮންސްޓަބަލްއަށް ދޭންޖެހޭ 85 އިންސައްތަ އުވާލަން މިސަރުކާރުން ވަނީ މަޝްވަރާ ކޮށްފަ އެވެ. އެހެން ނަމަވެސް އަދި އެކަން ފާސްނުވާކަން ވަނީ އެނގިފަ އެވެ.
ފުލުހުންނާއި ސިފައިންގެ މުސާރަ ބޮޑުކުރުމަކީ ރައީސް ޑރ. މުހައްމަދު މުއިއްޒު އާއި ކުރީގެ ރައީސް އިބްރާހިމް މުހައްމަދު ޞާލިހުގެ ވެސް ވައުދެކެވެ. އެ ވައުދާ އެއްގޮތަށް މިދިޔަ އަހަރަށް ލަފާކޮށް ރައީސް ޞާލިޙުގެ ސަރުކާރުގައި އޭގެ ކުރީ އަހަރު ފޮނުވި ބަޖެޓުގައި މުސާރަ ބޮޑުކުރަން ވެސް އޮތީ ހިމަނައިފަ އެވެ.
ސިފައިންނާއި ފުލުހުންގެ މުސާރަ ބޮޑުކުރަން ރައީސް މުއިއްޒު ވިސްނަވަނީ ތިން ފިޔަވައްސަކަށް ބަހާލައިގެން، ވެރިކަމުގެ ފުރަތަމަ އަހަރު 35 ޕަސެންޓު، ދެ ވަނަ އަހަރު 25 ޕަސެންޓު، އަދި ދައުރުގެ ފަހު އަހަރު ބާކީ 40 ޕަސެންޓު މުސާރަ ބޮޑުކުރާ ގޮތަށް ކަމަށް ވަނީ ހާމަ ކޮށްފައެވެ.
