ވެސްޓާން އޭޝިއާ ޖޫނިއާ ޗެސް ޗެމްޕިއަންޝިޕް ރާއްޖޭގައި ބާއްވަނީ

ވެސްޓާން އޭޝިއާ ޖޫނިއާ ޗެސް ޗެމްޕިއަންޝިޕް އަންނަ ޖޫން މަހުގެ 15 އިން 25 އަށް ރާއްޖޭގައި ބާއްވާ ގޮތަށް ނިންމައިފިއެވެ.

މިއީ ރާއްޖޭގައި ބާއްވާ ޗެސްގެ ބައިނަލްއަގްވާމީ ފުރަތަމަ މުބާރާތެވެ. މި މުބާރާތް ކުރިއަށް ދާނީ އއ. އުކުޅަސް ކޮންވެންޝަން ސެންޓަރުގައެވެ.

ކުޅިވަރާ ބެހޭ ވަޒީރު އަޙްމަދު މަޚްލޫފް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މި މުބާރާތުގައި 26 ފެޑަރޭޝަނަކުން 350 ކުޅުންތެރިން ވާދަކުރާނެ ކަމަށެވެ.

މުބާރާތުގައި ވާދަކުރާ ގައުމުތަކަކީ ޕާކިސްތާން, ސްރީލަންކާ، ނޭޕާލް، ބަންގްލަދޭޝް، ބޫޓާން، ދިވެހިރާއްޖެ، އިންޑިއާ، އަފްގާނިސްތާން، ތަޖިކިސްތާން، ކަޒަކިސްތާން، އުޒްބެކިސްތާން، ބަހްރެއިން، ލެބަނަން، އިރާން، އޮމާން، އިރާގް، ފަލަސްތީން، ޖޯޑަން، ގަތަރު، ކުވެއިތް، ސައުދީ އަރަބިއްޔާ، ސީރިއާ، ޔޫއޭރީ އަދި ޔަމަންއެވެ.

18 އަހަރުން ދަށުގެ ކުޅުންތެރިން ވާދަކުރާ މި މުބާރާތުގައި ހަ ކެޓަގަރީއެއް ކުރިއަށްދާނެއެވެ. އެއީ 18 އަހަރުން ދަށް، 16 އަހަރުން ދަށް، 14 އަހަރުން ދަށް، 12 އަހަރުން ދަށް، 10 އަހަރުން ދަށް އަދި 8 އަހަރުން ދަށުގެ އުމުރުފުރާއެވެ. ކޮންމެ އުމުރުފުރާއެއްގައިވެސް ވާދަކުރާނީ ކޮންމެ ގައުމަކުންވެސް އަންހެން އަދި ފިރިހެން އެންމެ ކުޅުންތެރިއެކެވެ.

އާންމު ގޮތެއްގައި ބައިނަލްއަގްވާމީ މުބާރާތްތައް ކުޅޭ ތިން ފޯމެޓް ކަމަށްވާ، ރެޕިޑް، ކްލަސިކް އަދި ބްލިޓްޒް ބީޗް ޗެސް ފޯމެޓަށްވެސް މި މުބާރާތުގެ މެޗުތައް ކުރިއަށްދާނެއެވެ.

ގިނަ ދުވަސްތަކެއް ވަންދެން ރަސްމީ ހޯލެއް ނެތި ރާއްޖޭގައި ޗެސްގެ އެކި ހަރަކާތްތައް ބާއްވަމުން އައިސް 2019 ވަނަ އަހަރުގެ އޮގަސްޓްމަހު ވަނީ ނެޝަނަލް ޗެސް އާކޭޑް ހުޅުވާފައެވެ. ހުޅުމާލޭ ސްޕޯޓްސް ކޮމްޕްލެކްސްގައި ގާއިމުކުރި ނެޝަނަލް ޗެސް އާކޭޑް ހުޅުއްވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްއެވެ.