ހާރިސްގެ މަރުގެ މައްސަލައިގެ ޚުލާސާ ބަޔާން އިއްވުން މާރޗު މަހު
23 ފެބުރުއަރީ 2022 | ބުދަ 09:33ދެން މި މައްސަލައިގައި އޮންނާނީ ޚުލާސާ ބަޔާން އިއްވުން
ހުޅުމާލޭގައި ތުނޫ އެއްޗަކުން ހަމަލާދީ މަރާލާފައިވަނީ ގއ. ދާންދޫ، ގޯލްޑް ލީފް، ހާރިސް ޢަބްދުލްޤަފޫރް (24އ)
ހުޅުމާލޭގައި ތުނޫ އެއްޗަކުން ހަމަލާދީ ގއ. ދާންދޫ، ގޯލްޑް ލީފް، އުމުރުން 24 އަހަރުގެ ހާރިސް ޢަބްދުލްޤަފޫރް މަރާލި މައްސަލައިގެ ޚުލާސާ ބަޔާން އިއްވުމަށް ތާވަލުކޮށްފިއެވެ.
މި މައްސަލައިގައި ދައުލަތުން ދައުވާ އުފުލާފައި ވަނީ ޏ. ފުވައްމުލަކު ހިލްޓަން، ޔާމިން ރަޝީދުގެ މައްޗަށެވެ. އޭނާގެ މައްޗަށް ދައުލަތުން ކޮށްފައިވަނީ، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.
ބުދަ ދުވަހު މި މައްސަލައިގައި ކުރިއަށް ދިޔަ އަޑުއެހުމުގައި ދައުލަތުން ވަނީ އެ މައްސަލަ ސާބިތުކުރުމަށް ބޭނުންވާ މުހިއްމު ދެ ސިއްރު ހެކިވެރިއަކު ހާޒިރު ކުރުމަށްފަހު ފުރުސަތަކަށް އެދިފައެވެ. އެހެންނަމަވެސް އެ ހެކިވެރިންގެ ހެކިބަސް ނެގުމަށް މީގެ ކުރިންވެސް ގިނަ ފުރުސަތުތަކެއް ދެވިފައިވާތީ މައްސަލަ ބައްލަވާ ގާޒީ ވަނީ އެހެކިވެރިންގެ ހެކިބަސް ނުނަގައި މައްސަލަ ކުރިއަށް ގެންދެވުމަށް ނިންމަވާފައެވެ.
އެއާއެކު ދެން މި މައްސަލައިގެ އޮންނާނީ ޚުލާސާ ބަޔާން އިއްވުމެވެ. އެ އަޑުއެހުން އޮންނާނީ މާރޗު މަހުއެވެ. އެއަށްފަހު އޭޕްރީލް މަހު މި މައްސަލައިގެ ޙުކުމް ކުރުމަށް ވަނީ ތާވަލުކޮށްފައެވެ.
ހާރިސްއަށް ތޫނު އެއްޗަކުން ހަމަލާދީ މަރާލާފައިވަނީ 2017 ވަނަ އަހަރުގެ ސެޕްޓެމްބަރު 29 ވަނަ ދުވަހުގެ ރޭ ހުޅުމާލޭގައެވެ.
ހާރިސް މަރުވިއިރު އަންބަކާއި ދަރިއަކު ދުނިޔޭގައި ތިބި ކަމަށް މަޢުލޫމާތު ލިބެއެވެ.
މަޢުލޫމާތު ލިބިފައިވާ ގޮތުގައި ހާރިސްއަކީ ހުޅުމާލޭ ހާފްވޭ ހައުސްގައި މަސްތުވާތަކެތީގެ ވަބާއަށް ފަރުވާ ހޯދަމުންދިޔަ ޒުވާނެކެވެ. ހާރިސްއަށް ވަޅިން ހަމަލާ ދިފައިވަނީ، އާއިލީ ދުވަހަށް ބޭރަށް ދިއުމަށްފަހު އެނބުރި ހާފްވޭ ހައުސްއަށް ދަނިކޮށް، ހާފްވޭ ހައުސް ކައިރިން، ސައިކަލެއްގައި ދިޔަ ދެމީހަކެވެ.
ހުޅުމާލެއިން ރާއްޖެއެމްވީއަށް މައުލޫމާތު ދިން މީހަކު ބުނެފައިވާ ގޮތުގައި، ހާރިސް ހޮސްޕިޓަލަށް ގެންގޮސްފައި ވަނީ ހަމަލާ ދިން ވަގުތު އެ ސަރަހައްދުން ދުއްވާފައި ދިޔަ ޕިކަޕެއްގައެވެ.
