"އެއް ފުރާޅެއްގެ ދަށުގައި އެތައް އާއިލާއެއް ދިރިއުޅެން މަޖުބޫރު ކުރި" މިއީ މިހާރު ބޯހިޔަވާހިކަމުގެ ދަތިކަން ކުރިމަތިވެފައިވާ ކޮންމެ އާއިލާއެއްގެ ހާލަތެވެ. ބޯހިޔަވާހަކަމުގެ މައްސަލަ އަކީ ޒަމާނުއްސުރެން ހައްލު ނުވެ ވާ މައްސަލައެކެވެ. މާލެ ސަރަހައްދުގައި ވެސް މިމައްސަލަ އިންތިހާއަށް ބޮޑުވެފައިވާއިރު މިހާރު އަތޮޅު ތެރޭގައި ރަށްތަކުގައި ވެސް ބޯހިޔާވަހިކަމުގެ މައްސަލަ މިވަނީ ކުރިމަތިވެފައެވެ. މިކަމާއި ގުޅިގެން އާއިލާގެ އެތަކެއް މެމްބަރުން އެއް ކޮޓަރިއެއްގައި ނިދަން ޖެހެއެވެ. ނޫނީ ޖާގަ ކުޑަވުމުން ޑިއުޓީ ބަހައިގެން ނިދަން ޖެހެއެވެ. ތިމާގެ މީހެއް ނުވަތަ އާއިލާ މީހަކު ގޭގައި ހުރެލަން އައިސްފިނަމަ ނިދަން މިދާން ޖެހެނީ އެހެން ގެއަކަށެވެ.

މިއީ ބޯހިޔާވަހިކަމުގެ ދަތިކަން ތަހައްމަލް ކުރަމުންދާ ހާލަތެވެ. މި ސަރުކާރުން ވަނީ މިދަތިތަކަށް ހައްލެއް ގެނެސްދޭނެ ކަމުގެ ވައުދުވެފައެވެ. އެގޮތުން ބޯހިޔާވަހިކަމުގެ އެކި މަޝްރޫއުތައް ކުރިއަށްދާއިރު ސަރުކާރުން ވަނީ ޅ. ނައިފަރުގައި އިމާރާތްކުރި ހައުސިންގ ޔުނިޓްތައް އެރަށު ކައުންސިލާއި ހަވާލުކޮށްފައެވެ.

ނައިފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށްޓަކައި ސަރުކާރުން އެރަށުގައި އިމާރާތްކުރި 100 ހައުސިންގ ޔުނިޓްގެ ތަޅުދަނޑި އެރަށު ކައުންސިލާއި ހަވާލުކޮށްދެއްވީ ހައުސިންގ މިނިސްޓަރ މުހައްމަދު އަސްލަމެވެ.

މިއީ 1000 އަކަފޫޓުގެ 3 ކޮޓަރީގެ އެޕާރޓްމެންޓްތަކެކެވެ. މި އެޕާޓްމަންޓްތަކަކީ ޖާގައިގެ ގޮތުން ތަނަވަސް ރައްޔިތުންނަށް ހިތްފަސޭހަކަމާއެކު ދިރިއުޅެވޭނެ ގޮތަށް ހަދާފައިވާ ތަންތަނެވެ. އަދި ފާހަނާތައް ވެސް ބޮޑެވެ. މި ތަންތަނަށް ބަލާލުމުން، ކޮންމެ ރައްޔިތަކު ވެސް ތަނުގައި ވެންޓިލޭޝަނާއި ތަން ފަރުމާކޮށްފައިވާ ގޮތާމެދު ހިތްހަމަޖެހޭނެކަން ޔަޤީނެވެ.

މިއީ ސަރުކާރުގެ ޕީއެސްއައިޕީ ބަޖެޓުން ޚަރަދުކުރި މަޝްރޫއެކެވެ. ނައިފަރު ކައުންސިލުން އާއްމު ކޮށްފައިވާ ލިސްޓްގައި, ހައުސިންގ ޔުނިޓަށް އެދުނު ފަރާތްތަކުގެ ތެރެއިން 741 މީހުންގެ ޝަރުތު ހަމަވާކަމަށް ބަޔާން ކޮށްފައިވެއެވެ. އަދި 17 މީހުންނަށް ޔުނިޓް ލިބިފައި ނުވާއިރު 8 ފަރާތެއްގެ ފޯމް ވަނީ ބާތިލްކޮށްފައެވެ. ފޯމް ލާފައިވާ ފަރާތްތަކުގެ ތެރެއިން އެންމެ މަތިން ޕޮއިންޓް ލިބިފައިވަނީ 91 ޕަސެންޓަށެވެ. މި ލިސްޓް އާންމު ކުރީ މި މަހުގެ ކުރީކޮޅުގައެވެ.

މި ހައުސިންގ ޔުނިޓްތައް ހަވާލުކުރެވިގެން ދިޔުމާއި ގުޅިގެން ފްލެޓްތައް ލިބުނު ރައްޔިތުން ތިބީ ނުހަނު އުފަލުންނެވެ. 100 ހައުސިންގ ޔުނިޓްތައް ހަވާލުކުރެވިގެން ދިޔައިރު މިކަމުގެ ސަބަބުން އެތައް އާއިލާތަކެއްގެ ދިރިއުޅުން އުޖާލާވެގެންދާނެއެވެ. ބޯހިޔާވަހިކަމުގެ މައްސަލައަށް ދިމާވެފައިވާ ދަތިތައް ހައްލުވެގެންދާނެއެވެ. ޑިއުޓީ ބަހައިގެން ނިދާ ނިދުން ނިމުމަކަށް އަންނާނެއެވެ. ތިމާގެ މީހެއް ނުވަތަ އާއިލާ މީހަކު ގޭގައި ހުރެލަން އައިސްފިނަމަ ނިދަން އެހެން ގެއަކަށް ދާން ޖެހޭ ދިޔުން ވެސް ނިމުމަކަށް އަންނާނެއެވެ.

ނައިފަރުގައި މި ހަވާލު ކުރެވިގެންދިޔަ ހައުސިންގ ޔުނިޓާއެކު އެ ރައްޔިތުންގެ ތުންފަތް މައްޗަށް މިއަދު މި ވަނީ ހިނިތުންވުން ގެނުވާފައެވެ. ދިރިއުޅުމާއި މެދު ދެކެމުން އައި ހުވެފަންތަކުގައި ކުލަ ޖެހެން މިވަނީ ފަށާފައެވެ. ދިރިއުޅުމަށް އައި އެ ބަދަލުގެ ސަބަބުން އާއިލާތަކަށް ހިންދަމާލަން ފުރުސަތު ލިބި، ހިތްހަމަ ޖެހުމާއެކު އެއްތަނެއްގައި އުޅުމުގެ ފުރުސަތު މިވަނީ ފަހިވެގެން ގޮސްފައެވެ. ފްލެޓް ލިބުމާއެކު އެއް ފުރާޅެއްގެ ދަށުގައި އެތައް އާއިލާއެއް ދިރިއުޅެން މަޖުބޫރު ކުރި ކުރުން މިވަނީ ނިމުމަކަށް އައިސްފައެވެ.