އެންމެ ބޮޑު އިސްކަމެއް ދެނީ ޕްރިވެންޝަންއަށް ކުރެވޭ މަސައްކަތްތައް ވަރުގަދަކުރަން – ޖެންޑަރ މިނިސްޓަރ

މަގާމާއި ހަވާލުވެވަޑައިގެންނެވި ފަހުން އެންމެ ބޮޑު އިސްކަމެއް ދެއްވަމުން ގެންދަވާ އެއް ކަމަކީ ޕްރިވެންޝަންއަށް ކުރެވޭ މަސައްކަތްތައް ވަރުގަދަކުރެއްވުން ކަމުގައި ޖެންޑަރ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެއެވެ.

ޖެންޑަރ މިނިސްޓަރު މިހެން ވިދާޅުވީ ގެވެށި ގުޅުން ކެންޕެއިންގެ މަޖައްލާ “ސާސްތުރަ” ނެރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. މިނިސްޓަރު ވިދާޅުވީ ގެވެށި ގުޅުން ކެމްޕެއިންގެ ދަށުން ނެރެވޭ މިމަޖައްލާ އަކީ ވަރަށް އަގުހުރި މަސައްކަތެއް ކަމަށެވެ. މީގެ ސަބަބުން މުޖުތަމައުގައި އިތުރުވެގެންދާނީ ހޭލުންތެރިކަން ކަމަށާއި، ބަދަލުވުމަށް މަގުފަހިވެގެން އަންނާނީ ޒަމާނުއްސުރެ އަށަގެންފައި އޮތް ބޯދާ ވިސްނުން ކަމަށެވެ. އަދި ބަދަހިވެގެން އަންނާނީ އާއިލާތަކުގެ ތެރޭގައި އޮތް ގެވެށި ގުޅުން ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މީގެ ދެ އަހަރު ކުރިން މަގާމާއި ހަވާލުވެވަޑައިގެންނެވި ހިސާބުން ފެށިގެން އެންމެ ބޮޑު އިސްކަމެއް ދެއްވަމުން ގެންދަވާ އެއް ކަމަކީ ޕްރިވެންޝަންއަށް ކުރެވޭ މަސައްކަތްތައް ވަރުގަދަކުރެއްވުން ކަމަށެވެ. އަދި ހޭލުންތެރިކުރުވުމަކީ ޕްރިވެންޝަންއަށް ކުރެވޭނެ އެންމެ މުހިންމު އެއް މަސައްކަތް ކަމަށާއި، ހޭލުންތެރިކަން އިތުރުވުމުގެ ނަތީޖާއަކަށް ވަނީ ގެވެށި އަނިޔާފަދަ އިޖުތިމާއީ ބޮޑެތި މައްސަލަތަކާ މެދު ކަންބޮޑުވާ މީހުން އިތުރުވުން ކަމުގައި މިނިސްޓަރު ވިދާޅުވިއެވެ.

ޖެންޑަރ މިނިސްޓަރު ވިދާޅުވީ މައްސަލަތައް ހުށަހެޅޭ މިންވަރު އިތުރުވަމުން އައުމަކީ ޝައްކެއްވެސް ނެތް ގޮތުގައި ރައްކާތެރިކަން ފޯރުކޮށްދިނުމުގެ ނިޒާމަށް ގޮންޖެހުންތަކެއް ކުރިމަތިވާނެ ކަމެއް ކަމަށެވެ. އެހެން އެކަން އޮތްކަމުގައި ވިޔަސް އަނިޔާ ތަހައްމަލުކުރަމުން އަންނަ ފަރާތްތަކުގެ ތެރެއިން އެހީތެރިކަމަށް އެދޭ ފަރާތްތައް އިތުރުވަމުން އައުމަކީ އަނިޔާގެ ސަބަބުން ވަކިވަކި ފަރުދުންނަށާއި، އާއިލާތަކަށް ލިބޭ ގެއްލުން ކުޑަކުރުމަށް އިތުރު ފުރުސަތުތައް ހުޅުވިގެންދާނެ ކަމެއް ކަމަށެވެ.

އަދި ސަރުކާރުގެ އަމާޒަކީ ގެވެށި އަނިޔާ ލިބޭ ފަރާތްތަކަށް ފޯރުކޮށްދެވޭ އެހީތެރިކަން އިތުރުކޮށް، އިތުރު އަނިޔާއަށް އެފަރާތްތައް ހުށަހެޅުމުގެ ފުރުސަތު ކުޑަކުރެއްވުން ކަމަށްވެސް ޖެންޑަރ މިނިސްޓަރު ޢާއިޝަތު މުޙައްމަދު ދީދީ ވިދާޅުވިއެވެ.