އުރީދޫ ދިވެހި ޕްރިމިއާ ލީގުގައި ދަ ގްރާންޑޭ ސްޕޯޓްސް ކުލަބުގެ މައްޗަށް ޔުނައިޓެޑް ވިކްޓްރީ (ޔޫވީ) އިން ކުރިހޯދައިފިއެވެ.

ގައުމީ ފުޓުބޯޅަ ދަނޑުގައި އަންގާރަ ދުވަހުގެ ހަވީރު ކުޅުނު މެޗު ޔޫވީ އިން ކާމިޔާބުކުރީ ހަނި ތަފާތަކުން 1-0 ގެ ނަތީޖާއަކުންނެވެ.

މެޗު ފަށައިގެން ދެވަނަ މިނެޓުގައި ޔޫވީގެ އަޙްމަދު ބައްސާމް މުޙައްމަދު ނައީމް (ބައްކު) އަށް ލަނޑު ޖަހާނެ ރަނގަޅު ފުރުސަތެއް ލިބުނެވެ. ގްރާންޑޭގެ ކީޕަރު ހަސަން މުއާޒްއަށް ހެދުނު ގޯހެއްގެ ފައިދާ ނަގާ ބައްކު ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ. އޭގެ ފަސް މިނެޓު ފަހުން ޔޫވީގެ ބެލަރޫސް ފޯވާޑް އިވާން ވެރާސް ފޮނުވާލި ބޯޅަ ވެސް އަމާޒުވީ ގޯލުގެ ދަނޑިއަށެވެ.

ގްރާންޑޭއިން ވެސް ވަނީ ފުރަތަމަ ހާފުގައި ލަނޑު ޖަހަން ފުރުސަތުތަކެއް ތަނަވަސްކޮށްފައެވެ. އެގޮތުން ގްރާންޑޭ އަށްކުޅޭ ސްރީލަންކާ ދެ ކުޅުންތެރިންކަމަށްވާ ޗަމޯދު ދިލްޝާން އާއި މުޙައްމަދު އާކިބް އަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. އޭގެ ތެރެއިން އާކިބް ލަނޑެއް ޖެހި ނަމަވެސް އޭނާ ޖެހީ އޮފްސައިޑް ލަނޑެއް ކަމަށް ރެފްރީ ވަނީ ނިންމާފައެވެ.

މެޗުގެ ދެވަނަ ހާފު ފަށައިގެން ޔޫވީ އިން ގްރާންޑޭގެ ހާފަށް ބާރުބޮޑުކުރިއިރު، މި ހާފުގައި ޔޫވީގެ ފުރަތަމަ ހަމަލާ އުފެއްދީ ކިރްގިސްތާން މިޑްފީލްޑަރު އަނަޓޯލީ ވްލަޝީޗޭފް (ޓޯނީ)އެވެ. އޭގެ ދިހަ މިނެޓު ފަހުން ޓޯނީ ވަނީ ހިތްގައިމު ލަނޑެއް ޖަހާ ޔޫވީއަށް ލީޑު ނަގައިދީފައެވެ.

މިއީ ލީގުގައި ޔޫވީން ހޯދި ފުރަތަމަ މޮޅެވެ. ލީގުގެ ފުރަތަމަ މެޗުގައި ޔޫވީން ވަނީ ކްލަބް ވެލެންސިއާ އަތުން 2-1 ގެ ނަތީޖާއަކުން މޮޅުވެފައެވެ. އަދި މި މޮޅާއިއެކު ޔޫވީން ވަނީ ލީގު ތާވަލުގެ ހަތަރުވަނައަށް ޖެހިލާފައެވެ. ޔޫވީއަށް ދެ މެޗުން 3 ޕޮއިންޓް ވަނީ ލިބިފައެވެ.