ޅަފަތުގައި ކުދިންނަށް އުގަންނައިދޭ ތައުލީމަކީ މާދަރީ ބަހުގެ މައްޗަށް ބިނާވެފައިވާ ތައުލީމަކަށް ވާންޖެހޭ : ޝާހިދު
މިކަމުގެ ސަބަބުން ކިޔަވަން ބޭނުންވާ މިންވަރާއި އުގެނޭ މިންވަރު އިތުރުވާނެ
އދ.ގެ އާންމު މަޖިލީހުގެ ރައީސް އަދި ފޮރިން މިނިސްޓަރ އަބްދުﷲ ޝާހިދު
ޅަފަތުގައި ކުދިންނަށް އުގަންނައިދޭ ތައުލީމަކީ މާދަރީ ބަހުގެ މައްޗަށް ބިނާވެފައިވާ ތައުލީމަކަށް ވާންޖެހޭ ކަމަށް އދ. ގެ 76 ވަނަ އާއްމު މަޖިލީހުގެ ރައީސް އަދި ދިވެހިރާއްޖޭގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ބައިނަލްއަގުވާމީ މާދަރީ ބަހުގެ ދުވަހުގެ މުނާސަބަތުގައި ދިވެހިބަހުން ފޮނުއްވި ވީޑިއޯ މެސެޖެއްގައި ޝާހިދު ވިދާޅުވީ އދ. ގެ އާއްމު މަޖިލީހުގެ ރައީސްގެ އޮފީހަކީ 45 ގައުމަށް ނިސްބަތްވާ މުވައްޒަފުން އުޅޭ އޮފީހެއްކަމަށާއި، މާދަރީ ބަހުގެ ދުވަހުގައި ލިބޭ އެންމެ ބޮޑު ފަޚުރަކީ މުވައްޒަފުން، އެބޭފުޅުންގެ އަމިއްލަ މާދަރީބަހުން ދުވަހުގެ ތަހުނިޔާ ދެންނެވުން ކަމަށެވެ. މިއަދު ޅަފަތުގައި ކުދިންނަށް އުގަންނައިދޭ ތައުލީމަކީ މާދަރީ ބަހުގެ މައްޗަށް ބިނާވެފައިވާ ތައުލީމަކަށް ވާން ޖެހޭކަން ގަބޫލުކުރުން މުހިންމު ކަމަށާއި، މިކަމުގެ ސަބަބުން ކިޔަވަން ބޭނުންވާ މިންވަރާއި އުގެނޭ މިންވަރު އިތުރުވާނެ ކަމަށް ވިދާޅުވިއެވެ.
އަ
ބްދުﷲޝާހިދުގެ އިތުރުން މި ވީޑިއޯ މެސެޖުގައި ރާއްޖެ ހިމެނޭހެން 45 ގައުމަކަށް ނިސްބަތްވާ ބޭފުޅުން 30 ބަހުން ވަނީ ދުވަހުގެ ތަހުނިޔާ ފޮނުއްވާފައެވެ.
އދގެ އާއްމު މަޖިލީހުގެ ރިޔާސަތުގައި އިންނަވައިގެންވެސް މިނިސްޓަރ ޝާހިދު ވަނީ ދިވެހި ބަހުން ވަރަށް ގިނަ ފަހަރު ވާހަކަފުޅު ދައްކަވާފަވެއެވެ. އަދި އާއްމު މަޖިލީހުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެސް ދިވެހި ބަހުން ތަގުރީރުކުރައްވާފައި ވެއެވެ.
