މެޖިސްޓްރޭޓަކު ހައިކޯޓުގެ ޙުކުމެއް ސަސްޕެންޑު ކުރުން، ފެންވަރާމެދު ސުވާލު އުފެދޭ ކަމެއް: ޕީޖީ އޮފީސް
އެކަން ބެލުމަށް ޖޭއެސްސީއަށް ހުށައަޅުއްވާނެ
ޕީޖީ އޮފީހުގެ އައްޑޫ ގޮފީގައި ކުރިއަށްދިޔަ ޝަރީއަތުގެ ސެޝަނެއްގެ ތެރެއިން
ރާއްޖެއަށް 98 ކިލޯގެ ޑްރަގް އެތެރެކުރުމުގައި ބައިވެރިވި ކަމަށް ތުހުމަތު ކުރެވޭ މީހަކު އައްޑޫ ސިޓީ ހިތަދޫ މެޖިސްޓްރޭޓް ކޯޓުން ދޫކޮށްލުމަށް ނިންމެވި މެޖިސްޓްރޭޓުގެ މައްސަލަ ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށައަޅާނެކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
މިކަމާއި ގުޅޭގޮތުން ޕީޖީ އޮފީހުގެ އޮފިޝަލަކު ރާއްޖެއެމްވީއަށް ވިދާޅުވީ، މެޖިސްޓްރޭޓަކު ހައިކޯޓުގެ ޙުކުމެއް ސަސްޕެންޑު ކުރުމަކީ އެފަރާތުގެ ފެންވަރާމެދު ސުވާލު އުފެދޭ ކަމެއް ކަމަށް ފެނިވަޑައިގަންނަވާ ކަމަށެވެ. ވުމާއެކު އެކަން ބެލުމަށް ޖޭއެސްސީއަށް ހުށައަޅުއްވާނެކަމަށް ވިދާޅުވިއެވެ. ޕީޖީ އޮފީހުން ވަނީ އެ މައްސަލައިގައި މެޖިސްޓްރޭޓް ނިންމެވި ނިންމެވުން ހައިކޯޓުގައި އިސްތިއުނާފުވެސް ކޮށްފައެވެ.
އޭނާ ވިދާޅުވީ، ދަށު ކޯޓުތަކުން މަތީ މަރުޙަލާގެ ކޯޓުތަކުގެ ނިންމުންތަކަށް ތަބާވާން ޖެހޭނެކަމަށް ދިވެހިރާއްޖޭގެ ކޯޓުތަކާއި ބެހޭ ޤާނޫނުގައި ސާފުކޮށް ބަޔާންކޮށްފައިވާ ކަމަށެވެ.
މީގެއިތުރުން، ޤާނޫނުއަސާސީގެ 143 ވަނަ މާއްދާގައިވެސް މަތީ މަރުޙަލާގެ ކޯޓުތަކުން ނިންމާ ނިންމުންތަކަށް އެއަށްވުރެ ދަށު މަރުޙަލާގެ ކޯޓުތަކުން ތަބާވާންވާނެ ކަމަށް ވަނީ ބަޔާންކޮށްފައެވެ.
މި މައްސަލައިގައި ސ.ހިތަދޫ މަންދޫބުގެ ރުޝާން އަޙްމަދު ދީދީގެ މައްޗަށް އުފުލާފައިވަނީ މަސްތުވާތަކެތި ޓްރެފިކްކުރުމުގެ ކުށުގެ ދައުވާއެވެ. މި މައްސަލައިގައި އޭނާ އާއި އެމައްސަލަ އާއި ގުޅުން ހުރި އެއްވެސް ހެއްކެއް އަދި ޤަރީނާއެއް ފުލުހުންގެ ފަރާތުން ހުށަހަޅާފައި ނުވާކަމަށް ބުނެ މެޖިސްޓްރޭޓް ކޯޓުން ނިންމުމުން، ދައުލަތުން އެ ނިންމުން ހައިކޯޓުގައި ވަނީ އިސްތިއުނާފުކޮށްފައެވެ. އެގޮތުން އޭގެ ކުރިން ހަމަ އެ ކޯޓުން ނެރުއްވާފައިވާ ކޯޓު އަމުރުގައި އެމައްސަލަ އާއި ގުޅިގެން ރުޝާން އަޙްމަދު ދީދީގެ މައްޗަށް ތުހުމަތު ކުރެވޭ މިންވަރުގެ ހެއްކާއި ޤަރީނާ ލިބިފައިވާކަމަށް ކަނޑައަޅާފައިވާކަންވެސް ދައުލަތުން ފާހަގަކުރެއެވެ.
މި މައްސަލަ ބެއްލެވި ދިވެހިރާއްޖޭގެ ހައިކޯޓުގެ ފަނޑިޔާރުންގެ އަޢުލަބިއްޔަތުން ވަނީ ދަށު ކޯޓުގެ ނިންމުން ބާތިލުކޮށް، އޭނާ ޝަރީއަތް ނިމެންދެން ބަންދު ކުރުމަށެވެ. އެހެންނަމަވެސް މެޖިސްޓްރޭޓް ކޯޓުން ކުރި ޙުކުމުގައި ވަނީ ރުޝާން އަހްމަދު ދީދީ ޝަރީއަތް ނިމެންދެން ބަންދުކުރުމަށް ދިވެހިރާއްޖޭގެ ހައިކޯޓުން ނިންމާފައިވާ ނިންމުން، 90 ދުވަހަށް ސަސްޕެންޑް ކުރާ ކަމަށެވެ. އަދި އެ މުއްދަތަށް ބޭސްފަރުވާގެ ބޭނުމަށް އޭނާ ދޫކޮށްފައި ބެހެއްޓުމަށް ވަނީ އަމުރު ކުރައްވާފައެވެ.
ހިތަދޫ މެޖިސްޓްރޭޓް ކޯޓުގައި އެ އަމުރު ނެރުއްވީ މެޖިސްޓްރޭޓް ރަފީއުދީން އަހްމަދުއެވެ.
މިކަމާއި ގުޅިގެން ޕްރޮސެކިއުޓަރ ޖެނެރަލް ހުސައިން ޝަމީމްވެސް ވަނީ ހައިކޯޓުގެ ޙުކުމެއް ދިރި އޮއްވައި އެ ހުކުމް ސަސްޕެންޑުކުރުމަކީ ދަށުކޯޓަކުން މެޖިސްޓްރޭޓަކު ކުރައްވާ ޒާތުގެ ކަމެއް ނޫންކަމަށް ވިދާޅުވެ އެ ނިންމެވުމަށް ފާޑުވިދާޅުވެފައެވެ. އަދި މީހަކު ދޫކޮށްލަން ބޭނުންފުޅުވި ނަމަވެސް، ރަނގަޅު ސަބަބެއް ދައްކަވާންވާނެކަން ފާހަގަކުރައްވައި، ޖޭއެސްސީއަށް އެކަން ހުށައަޅުއްވާނެކަމަށް ޝަމީމް ވަނީ ވިދާޅުވެފައެވެ.
