ގާނޫނު އަސާސީއަށް ގެނައުމަށް އެމްޑީޕީން ބޭނުންވާ އިސްލާހުތަކާއި ގުޅޭގޮތުން އެހެން ޕާޓީތަކާ މަޝްވަރާކުރުމަކީ ބޭނުންތެރިކަމެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ޖުޑީޝަލް ސާރވިސް ކޮމިޝަން (ޖޭއެސްސީ) އެކުލެވިގެންވާ ގޮތް ބަދަލުކުރުމާއި ގުޅޭ ގޮތުން މަހިބަދޫ ދާއިރާގެ މެމްބަރު އަހުމަދު ތާރިގް ގާނޫނު އަސާސީއަށް ހުށަހަޅުއްވާފައިވާ އިސްލާހާއި ގުޅޭގޮތުން އަންގާރަ ދުވަހު ކުރިޔަށްދިޔަ ބަހުސްގައި އިދިކޮޅު މެމްބަރުން ވަނީ ޖޭއެސްސީ އެކުލެވިގެންވާ ގޮތް މިހާރުން މިހާރަށްވެސް ބަދަލުކުރަންޖެހޭކަމަށް ވިދާޅުވެފައެވެ. މިއިސްލާހަށް ވާހަކަދެއްކެވި އެމްޑީޕީ މެމްބަރުން ވަނީ ހަމައެކަނި ޖޭއެސްސީ އެކުލެވިގެންވާ ގޮތަށް ބަދަލު ގެނައުމުގެ އިތުރުން ގާނޫނު އަސާސީއަށް އިތުރު އިސްލާހުތަކެއް ގެންނަންޖެހޭކަމަށް ވިދާޅުވެފައެވެ. އަދި އެއިސްލާހުތަކާމެދު ފުންކޮށް ދިރާސާ ކުރަންޖެހޭކަން އެމްޑީޕީ މެމްބަރުން ފާހަގަކުރެއްވިއެވެ.

ގާނޫނު އަސާސީއަށް އިސްލާހު ގެނައުމާއި ގުޅޭގޮތުން ރައީސް ނަޝީދު ވިދާޅުވީ ގާނޫނު އަސާސީއަށް ގެންނަން ޖެހޭ އިސްލާހުތައް އެބަހުރި ކަމަށާއި އެއިސްލާހުތައް ގެނައުމުގައި ހަމައެކަނި މެޖޯރިޓީ ޕާޓީ އެދޭގޮތަށް ގެންދިޔުމުގެ ބަދަލުގައި ހުރިހާ ޕާޓީތަކަށް އެއްބަސްވެވޭ ގޮތަށް އެކަން ކުރިޔަށް ގެންދިޔުމަކީ ބުއްދިވެރިކަމެއްކަމަށެވެ. އަދި ގާނޫނު އަސާސީއަށް އިސްލާހު ގެނައުމުގައި އެމްޑީޕީން ޓައިމްލައިނެއް އެކުލަވާލާފައިވާކަމަށް ރައީސް ނަޝީދު ވިދާޅުވިއެވެ.

އެމްޑީޕީން އެންމެ ފަހުން ބޭއްވި ގައުމީ މަޖިލީހުގެ ޖަލްސާގައި ގާނޫނު އަސާސީއަށް ބޮޑެތި ބަދަލުތަކެއް ގެނައުމަށް ރައީސް ނަޝީދު ހުށަހެޅުއްވިއެވެ.

އޭގެ ތެރޭގައި، ރާއްޖޭގައި ވެރިކަން ކުރަމުން އަންނަ ރިޔާސީ ނިޒާމުން ބަރުލަމާނީ ނިޒާމަކަށް ބަދަލުވުމަށް ރައްޔިތުންގެ ފެންނަ ނުފެންނަ ވޯޓެއް ނެގުމުގެ ތާރީހެއް ކަނޑައެޅުމަށްޓަކައި ކޮންގްރަސްއެއް ބޭއްވުން ހިމެނެއެވެ. އެ ކޮންގްރެސްގައި ގާނޫނު އަސާސީއަށް ބޮޑެތި ބަދަލުތަކެއް ގެންނަން ފާސްކުރަން ވެސް ގައުމީ މަޖިލީހުން ނިންމާފައިވެއެވެ. ގައުމީ މަޖިލީހުން ވަނީ އެމްޑީޕީގެ ކޮންގްރެސް އޮގަސްޓްމަހު ބޭއްވުމަށް ނިންމާފައެވެ.

ރައީސް ނަޝީދު ހުށަހަޅުއްވާފައިވަނީ ޖޭއެސްސީ އެކުލަވާލެވިފައިވާ ގޮތަށް ބަދަލު ގެނައުމާއި، މިނިވަން މުއައްސަސާތަކުގެ މެމްބަރުންގެ އަދަދަށް ބަދަލުގެނައުމާއި، ސުޕްރީމް ކޯޓުގެ އަދަދު ގާނޫނު އަސާސީގައި އޮތުމާއި ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ތެރެއިން ޖުމްލަ ވޯޓުގެ 30 ޕަސެންޓަށް ވުރެން މަދު ނޫން އަދަދަކަށް ވޯޓު ހޯދާ ކެންޑިޑޭޓަކީ އިންތިހާބު ކާމިޔާބުކުރި ކެންޑިޑޭޓުގެ ގޮތުގައި ކަނޑައެޅުމާއި އެއްވެސް ކެންޑިޑޭޓަކަށް ޖުމްލަ ވޯޓުގެ 30 ޕަސެންޓް ނުލިބިއްޖެ ނަމަ އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ދެވަނަ ބުރު ބާއްވަން ގާނޫނު އަސާސީގައި ކަނޑައެޅުމެވެ. އަދި ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށާއި އެ ވޯޓުގެ ތާރީހު ކަނޑައެޅުމާއި އެ ނަތީޖާ އާއި އެއްގޮތަށް ގާނޫނު އަސާސީގައި ވެރިކަމުގެ ނިޒާމް ކަނޑައެޅުން ހިމެނެއެވެ. މީގެއިތުރުން ގާނޫނު އަސާސީގައި ލާމަރުކަޒީ އިތުރު އުސޫލުތައް ކަނޑައެޅުމަށް ވަނީ ހުށަހަޅުއްވާފައެވެ.