ރައީސް މުއިއްޒު ހއ. ދިއްދޫ އަށް ވަޑައިގަތުމަށް ހަމަޖެހިފައި ވަނިކޮށް އެމްޑީޕީ ދިއްދޫ ދާއިރާގެ އިސް ދެ އޮފިޝަލަކު ފުލުހަށް ހާޒިރުކޮށްފި

ރައީސް ޑރ. މުހައްމަދު މުއިއްޒް ހއ. ދިއްދޫ އަށް ވަޑައިގަތުމަށް ހަމަޖެހިފައިވަނިކޮށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދިއްދޫ ދާއިރާގެ އިސް ދެ އޮފިޝަލަކު ފުލުހަށް ހާޒިރުކޮށްފިއެވެ.

އާދިއްތަ ދުވަހުގެ ރޭ ދިއްދޫ ޕޮލިސް ސްޓޭޝަނަށް ހާޒިރު ކުރީ އެމްޑީޕީ ދިއްދޫ ދާއިރާގެ ނައިބު ރައީސް އަފްއާން އަލީ އާއި ހިންގާ ކޮމެޓީގެ މެންބަރ މަހްމޫދު ޝަފީޤް ކަމަށް މައުލޫމާތު ލިބިފައިވެއެވެ.

ދިއްދޫ ދާއިރާގެ އިސް ދެ އޮފިޝަލަކު ފުލުހަށް ހާޒިރު ކޮށް މައުލޫމާތު ސާފު ކޮށްފައިވާއިރު، ރައީސް މުއިއްޒު ދިއްދޫ އަށް ކުރައްވާ ދަތުރުފުޅަށް ހުރަސް އެޅޭ އެއްވެސް ކަމެއް ނުކުރުމަށް ދިއްދޫ ކައުންސިލުން އެމްޑީޕީ އަށް ވަނީ އަންގައިފައެވެ.

ދިއްދޫ ކައުންސިލުގެ ރައީސް އަބްދުﷲ ރަޝީދު ސޮއި ކުރައްވާ، އެމްޑީޕީގެ ދިއްދޫ ދާއިރާގެ ރައީސް އަބްދުﷲ ވަހީދަށް ފޮނުއްވި ސިޓީ އެއް ގައި ރައީސް މުއިއްޒު ދިއްދޫ އަށް 2025 ޖަނަވަރީ 28 ވަނަ ދުވަހު ޒިޔާރަތް ކުރައްވާ ގޮތަށް ހަމަޖެހިފައިވާ ކަމަށް ބުނެފައިވެއެވެ. އަދި އެ ދަތުރުފުޅަށް ހުރަސް އެޅޭ ފަދަ އެއްވެސް ކަމެއް އެމްޑީޕީ އިން ކޮށްގެން ނުވާނެ ކަމަށް ވެސް ބުނެފައިވެއެވެ.

"މިދަތުރުފުޅާ ގުޅިގެން އިންތިޒާމް ކުރާ ޙަރަކާތް ތަކަށް ހުރަސްއެޅޭ ފަދަ އެއްވެސް ކަމެއް ތިޔަ ޕާޓީއިން ނުކުރެއްވުމަށާއި ރައީސުލްޖުމްހޫރިއްޔާ ދިއްދޫ ރައްޔިތުންނާއެކު ބާއްވާ ރަސްމީ ބައްދަލުވުމަށް ދަތިވާފަދަ ގޮތަށް ލައުޑް ސްޕީކަރ މެދުވެރިކޮށް ނުވަތަ އެނޫންވެސް ވަސީލަތެއް މެދުވެރިކޮށް އެއްވެސް ކަމެއް ނުކުރުމަށް މި ކައުންސިލުން އިލްތިމާސް ކުރަމެވެ." ޖެނުއަރީ 25 ގެ ތާރީޚުގައި ކައުންސިލްގެ އިދާރާ އިން ފޮނުވާފައިވާ ސިޓީގައި ވެއެވެ.

ސިޓީ އާ ބެހޭ ގޮތުން ދިއްދޫ ދާއިރާގެ ރައްޔިތުންގެ މަޖިލީހުގެ މެމްބަރުކަން ވެސް ކުރެއްވި އަބްދުﷲ ވަހީދު ވިދާޅުވީ، ކުރީގެ ރައީސް ސާލިހް ދިއްދޫ އަށް ކުރެއްވި ދަތުރުފުޅުތަކަށް ހުރަސް އެޅުމަށް މިހާރުގެ ކައުންސިލުގެ ރައީސް އިސްވެ ހުންނަވާ ހިންގެވި ހަރަކާތްތަކުގެ މަތިން ހަނދާން ވުމުން ފޮނުވި ސިޓީ އެއް ކަމަށް ގަބޫލު ކުރެވޭ ކަމަށެވެ.

ދިއްދޫ އިން މި ނޫހަށް ވާހަކަ ދެއްކި ފަރާތަކުން ބުނި ގޮތުގައި ރައީސް ރަށްރަށަށް ވަޑައިގަންނަވަނީ ރައްޔިތުންގެ ހާލު ބައްލަވަން ކަމަށް ވުމާއެކު ހާލު އޮތް ގޮތް ރައީސް އަށް ސާފު ކޮށްދިނުމަށް ޝުއޫރު ފާޅު ކޮށް ސުލްހަވެރި ސިޔާސީ ހަރަކާތް ހިންގުމަށް ތައްޔާރު ވަމުން ދާ ކަމަށެވެ.

ދިއްދޫ އިން ވާހަކަ ދެއްކި ފަރާތުން ހާމަ ކޮށްފައިވާ ގޮތުގައި މިދިޔަ ރައްޔިތުންގެ މަޖިލިސް އިންތިޚާބުގައި ވޯޓު ހޯދުމަށް ދިއްދޫ ގައި އެއަރޕޯޓެއް އެޅުމަށް އެމްޓީސީސީ އާ އެކުު ކޮންޓްރެކްޓްގައި ސޮއި ކުރުމުގެ ރަސްމިއްޔާތު ބޭއްވި ފަހުން އެ ކަމާ ބެހޭ އެއްވެސް ޚަބަރެއް ރައްޔިތުންނަށް ލިބިފައެއް ނުވެއެވެ. އޭގެ އިތުރުން ވެސް ކުރީ ސަރުކާރުން ހިންގަން ފަށާފައި ހުރި ގިނަ މަޝްރޫއުތައްވެސް ހުރީ ހުއްޓިފައެވެ.