"އިންޑިޔާ އައުޓް" ބިލާއި ރައީސް ޞާލިހު ފެކްޝަން ދެކޮޅު
ބިލު މަޖިލީހަށް ހުށަހެޅުމުގައި ބޮޑެތި ޚިޔާތު ތަފާތުވުންތަކެއް ހުރިކަމަށް އާޒިމް ވިދާޅުވި
މެދު ހެންވޭރު ދާއިރާގެ މެމްބަރ އަލީ އާޒިމް
ކުރީގެ ރައީސް އަބްދުﷲ ޔާމީން އިސްވެ ހުންނަވާ ކުރިޔަށްގެންދަވާ "އިންޑިޔާ އައުޓް" ކެމްޕެއިން ހުއްޓުވުމަށް ސަރުކާރު ހިންގާ މައިޕާޓީ އެމްޑީޕީން ހުށަހަޅަން ނިންމާފައިވާ ބިލްގެ މަސައްކަތް އެމްޑީޕީގެ ޕާލަމަންޓްރީ ގްރޫޕްގެ ތިއްބެވި "ސަރުކާރަށް ތާއީދު" ކުރާ މެމްބަރުންގެ ކަންބޮޑުވުންތަކެއް ހުރުމާއެކު ހުއްޓިފައިވާކަމަށް އެމްޑީޕީގެ ޕީޖީ ގްރޫޕްގެ ކުރީގެ ލީޑަރު އަދި މެދު ހެންވޭރު ދާއިރާގެ މެމްބަރ އަލީ އާޒިމް ވިދާޅުވެއްޖެއެވެ.
ޚާރިޖީ ގުޅުންތަކަށް ބުރޫއަރާ ގޮތަށް އަމަލުކޮށް، ވާހަކަދައްކާ ފަރާތްތަކާމެދު ގާނޫނީ ފިޔަވަޅު އެޅުމަށް ބިލެއް މަޖިލީހަށް ހުށަހެޅުމަށް އެމްޑީޕީގެ ޕާލަމެންޓްރީ ގުރޫޕުން ފާސްކޮށްފައިވަނީ މިމަހުގެ 9 ވަނަ ދުވަހުއެވެ. ޕީޖީ ގުރޫޕުގެ އެ ދުވަހުގެ ބައްދަލުވުމުގައި ފާސްކޮށްފައިވަނީ ވަރަށް އަވަހަށް އެ ބިލް މަޖިލީހަށް ހުށަހަޅައި ގާނޫނަކަށް ހެދުމަށެވެ.
އެމްޑީޕީ ޕީޖީ ގްރޫޕުގެ މަގާމުތަކަށް މެމްބަރުން އިންތިޚާބު ކުރުމަށް ބޭއްވި އިންތިޚާބުގައި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާ ވާދަކުރައްވާ އާޒިމްއަށް ވަނީ ނާކާމިޔާބީ ކުރިމަތިވެވަޑައިގަންނަވާފައެވެ. އިންތިޚާބަށްފަހު ކުރިޔަށްދާ ފުރަތަމަ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން އާޒިމް ވިދާޅުވީ މެޖޯރިޓީ ލީޑަރު ކަމުގައި ހުންނަވާ ރައްޔިތުންނަށް ބޭނުންވާ މުހިންމު ބިލްތަކުގެ މަސައްކަތްތަކެއް ނިމިފައިވާކަމަށް ގަބޫލުފުޅު ކުރައްވާކަމަށެވެ.
އާޒިމް ވަނީ ޕީޖީ ގްރޫޕްގެ ބައްދަލުވުންތަކުގެ ތެރެއިން އެންމެ ފަހުން އާޒިމް ޕީޖީ ލީޑަރަކަށް ހުންނަވާ ކުރިޔަށް ގެންދެވި ބައްދަލުވުމުގައި ނިންމި ނިންމުމެއް ތަޅުމަށް ހުށަހެޅިފައިނުވާކަން ފާހަގަކުރައްވާ އެކަމުގެ ތަފުސީލު ހިއްސާކުރައްވާފައެވެ. އެގޮތުން ރާއްޖެއިން ބޭރުގެ ގައުމުތަކާއި ގާއިމުކޮށްފައިވާ ޚާރިޖީ ގުޅުންތަކަށް ނޭދެވޭ އަސަރުތައް ކުރާނެ އަމަލުތައް ހުއްޓުވާނެ ބިލު މަޖިލީހަށް ހުށަހެޅުމުގައި ބޮޑެތި ޚިޔާތު ތަފާތުވުންތަކެއް ހުރިކަމަށް އާޒިމް ވިދާޅުވިއެވެ.
އިންޑިޔާ އައުޓް ކެމްޕެއިނާއި ގުޅިގެން އެކެމްޕެއިން ހުއްޓުވުމަށް ސަރުކާރުން މަސައްކަތްކުރަމުންދާއިރު މިކެޕްއިނާއި ގުޅިގެން ގައުމީ ސަލާމަތަށް ނުރައްކާވާ މިންވަރު އަންނަނީ ރައްޔިތުންގެ މަޖިލީހުގެ 241 ކޮމިޓީން ދިރާސާކުރަމުންނެވެ. ކޮމިޓީގެ ބައްދަލުވުންތަކުގައި ކަމާގުޅޭ ފަރާތްތައް ހާޒިރުކުރަމުންދާއިރު އެކެމްޕެއިންގެ ސަބަބުން ތަފާތު އެކި ދާއިރާތަކަށް ނުރަނގަޅު އަސަރު ކުރަމުންދާކަމަށް އަންނަނީ ބުނަމުންނެވެ.
އިންޑިޔާ އައުޓްގެ ނަމުގައި ބިލެއް ހުށަހަޅާނެކަން އެމްޑީޕީ ޕީޖީން ހާމަކުރުމާއެކު އެއީ ޚިޔާލުފާޅުކުރުމަށް ހުރަސްއެޅޭ ކަމެއްކަމަށް ބުނެ އެކަމަށް ފާޑުކިޔުންތައްވެސް އަންނަނީ އަމާޒުވަމުންނެވެ.
