25 އޮކްޓޫބަރު 2020 ދުވަހު ރޫޓް ފިހާރައިގެ ފަރާތުން ބޭންކް އޮފް ސިލޯނަށް ޖަމާކުރުމަށްޓަކައި ގެންދިޔަ 4 މިލިއަނަށްވުރެ ގިނަ ފައިސާ ފޭރުނު މައްސަލައިގައި ފޭރުމުގެ ކުށުގެ ދައުވާ އުފުލާފައިވާ މީހުން ދައުވާއަށް އިއުތިރާފުވެފައިވާތީ ކުށް ސާބިތުވާކަމަށް ކަނޑައަޅައި އެ އެންމެންވެސް 2 އަހަރާ 4 މަހާއި 24 ދުވަހަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފިއެވެ.

ކްރިމިނަލް ކޯޓުގެ ގާޒީ ޙަސަން ސައީދު އާދިއްތަ ދުވަހު ކުރެއްވި މި ޙުކުމުގައި ވިދާޅުވެފައިވަނީ، ދައުވާލިބޭ 4 މީހުންގެ އިއުތިރާފާއެކު އެމީހުންގެ މައްޗަށް ކުށްސާބިތުވެފައިވާކަމަށާއި، އެ ކުށުގެ އަސާސީ އަދަބަކީ 3 އަހަރާއި 2 މަހާއި 12 ދުވަހަށް ޖަލަށް ލުން ކަމަށެވެ. ނަމަވެސް އެމީހުން އިބްތިދާއީ މަރުޙަލާއާއި އަވަސްނިޔާގެ ޝަރީއަތުގެ މަރުޙަލާގައިވެސް ކުށަށް އިއުތިރާފުވެފައިވާތީއާއި، އަދަބު މަތި ކުރާނެ ޙާލަތެއް ނެތުމާއެކު، އެމީހުންނަށް އިއްވާފައިވަނީ 2 އަހަރާ 4 މަހާއި 24 ދުވަހުގެ ޖަލު ޙުކުމެކެވެ.

އެގޮތުން ކުށް ސާބިތުވެފައިވަނީ ލ. ގަން. ތުނޑި، ކީމިޔާގެ، ޢަބްދުﷲ ރާޝިދުއާއި، ގއ. ވިލިނގިލި، ކަނީރުމާގެ، މުޙައްމަދު މުސްޢަބު ޒުބައިރުއާއި، ކ. މާލެ، ދަފްތަރު. ނަންބަރު ރސ 3678، ޙުސައިން ޢަބްދުލްމަޖީދުއާއި، ކ. މާލެ، ވ. ޕިންކްވިލާ، އަޙްމަދު އަމީރުގެ މައްޗަށެވެ. އެމީހުންގެ މައްޗަށް ދިވެހިރާއްޖޭގެ ޤާނޫނުލް އުޤޫބާތުގެދަށުން އުފުލާފައިވަނީ ފޭރުމުގެ ކުށުގެ ދަޢުވާއެވެ.

އެމީހުން ބަންދުގައި ތިބި މުއްދަތު ކެނޑުމުން ޙުކުމުން ތަންފީޒު ކުރަން ޖެހެނީ ގާތްގަނޑަކަށް އަހަރު ދުވަހުގެ މުއްދަތެކެވެ. ސަބަބަކީ އެމީހުން ބަންދުގައި ތިބޭތާވެސް އަހަރަކަށްވުރެ ގިނަ ދުވަސްވެފައިވާތީއެވެ.

އޭގެ އިތުރުން، ރ. ރަސްމާދޫ، އޯކިޑްމާގެ، މުޙައްމަދު ޢަޒްމީންގެ މައްޗަށް، ފޭރުމުގައި ބައިވެރިވުމުގެ ކުށުގެ ދަޢުވާ އުފުލިއެވެ. އެހެންނަމަވެސް އޭނާ ދައުވާއަށް އިއުތިރާފު ވެފައެއް ނުވެއެވެ.

ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަ ގޮތުގައި "ރޫޓް" ފިހާރައިގެ ގިނަ އަދަދެއްގެ ފައިސާ ކަރުދާސް ބޮޑު ފޮށިގަނޑަކަށް އަޅާއިގެން އައި ވޭން، ބޭންކް އޮފް ސިލޯން ކުރިމައްޗަށް މަޑު ކުރުމާއެކު، ދެ ސައިކަލެއްގައި އައި ހަތަރު މީހަކު ވަނީ އެ ފައިސާ ފޮށިގަނޑު ފޭރެން މަސައްކަތްކޮށްފައެވެ.

ނަމަވެސް އެ މީހުންނަށް އެކަން ކާމިޔާބު ނުވީ، ބޭންކް އޮފް ސިލޯންގެ ސެކިއުޓީ ބަލަހައްޓާ، އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ޕްރައިވެޓް ލިމިޑެޓް (އޭއެސްއޭޕީ) ގެ ސެކިއުރިޓީ ގާޑު ބޭންކުން ނުކުމެ، އެ ފައިސާ ފޮށިގަނޑު އެ މީހުންގެ އަތުން އަތުލައިގަތުމުގެ ސަބަބުންނެވެ.

ސައިކަލުގައި ދިޔަ ހަތަރު މީހުންގެ ތެރެއިން ތިން މީހަކު ތިބީ ހެލްމެޓް އަޅައިގެންނެވެ. އަނެކަކު ހުރީ މާސްކެއް އަޅައިގެންނެވެ. ފައިސާ ފޭރެން މަސައްކަތް ކުރި އެ ވަގުތަކީ، އެ ސަރަހައްދުގެ ކާރުބާރު ބޮޑު، އަދި މީހުން ގިނަ އަދަދަކަށް ތިބި ވަގުތެއް ނަމަވެސް، ވީޑިއޯއިން ފެންނަ މަންޒަރުން، އާންމުންގެ ގިނަ ބަޔަކު އެކަމަށް މާބޮޑު ސަމާލުކަމެއް ނުދިން އިރު އަނެއްބަޔަކު އުޅުނީ، އެ ސަރަހައްދު ދޫކޮށް ދިއުމުގައެވެ.