އަނދުން ހުސައިންއާއި އިލްޔާސްގެ ވޯޓު އެއްވަރުވުމާއި ގުޅިގެން ބާއްވާ އިންތިޚާބު އަންނަ ހޯމަ ދުވަހު

މޯލްޑިވްސް ޑިމޮކްރެޓިކް ޕާޓީ (އެމްޑީޕީ)ގެ ޕާލަމެންޓްރީ ގުރޫޕްގެ އިންތިހާބުގައި ޑެޕިއުޓީ ލީޑަރުންގެ މަގާމަށް ވާދަކުރެއްވި ބޭފުޅުންގެ ތެރެއިން ދެ ކެންޑިޑޭޓެއްގެ ވޯޓު އެއްވަރުވުމާއި ގުޅިގެން އަންނަ ހޯމަ ދުވަހު އަލުން އިންތިޚާބު ބޭއްވުމަށް ނިންމައިފި އެވެ.

އެމްޑީޕީގެ ޕާލިމެންޓްރީ ގުރޫޕްގައި ދެ ޑެޕިއުޓީ ލީޑަރުން ތިއްބަވާއިރު އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އަށް 49 ވޯޓު ލިބިވަޑައިގެން ވަނީ މަގާމު ވަނީ ކަށަވަރުކުރައްވާފައެވެ. ދެން މި މަގާމަށް ވާދަ ކުރެއްވީ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ޙުސައިން) އާއި ހުޅުދޫ ދާއިރާގެ މެންބަރު އިލްޔާސް ލަބީބަށް ލިބިވަޑައިގެންނެވީ 34 ވޯޓެވެ.

އެމްޑީޕީން ބުނީ 18 ފެބްރުއަރީ 2022 ވީ ހުކުރު ދުވަހު އެ ޕާޓީގެ ޕާލިމެންޓަރީ ގްރޫޕްގެ މަގާމްތަކަށް މެމްބަރުން އިންތިޚާބު ކުރުމަށް ބޭއްވި އިންތިޚާބުގައި ޑެޕިއުޓީ ލީޑަރ ކަމަށް ކުރިމަތިލެއްވި 3 ކެންޑިޑޭޓުންގެ ތެރެއިން 2 ކެންޑިޑޭޓުންނަށް ލިބުނު ވޯޓު އެއްވަރުވުމާއި ގުޅިގެން އެއްވަރުވި 2 ކެންޑިޑޭޓުންގެ މެދުގައި އަލުން ވޯޓުނެގުމާއި، ޕާލިމެންޓަރީ ގްރޫޕުގެ 1 ވިޕްގެ މަގާމަށް ހުޅުވާލާފައިވާ ކަމަށެވެ. އަދި އިންތިޚާބުގެ ވޯޓުލުން އޮންނާނީ 28 ފެބްރުއަރީ 2022 ވާ ހޯމަ ދުވަހުގެ މެންދުރުފަހު 2:00ން ހަވީރު 4:00ށް ކަމަށް އެމްޑީޕީން ބުނެއެވެ.

ވިޕުންގެ ގޮތުގައި 6 ބޭފުޅަކު އައްޔަން ކުރަން ހަމަޖެހިފައިވީ ނަމަވެސް، އެ މަގާމަށް ވާދަ ކުރެއްވީ 5 މީހުންނެވެ. އަދި އެ 5 ބޭފުޅުން ވެސް ވަނީ ހޮވިވަޑައިގެންފައެވެ. އެއީ ކޮމަންޑޫ ދާއިރާގެ މެންބަރު މުހައްމަދު ރާޝިދު (ރާޑޯ) އާއި ވައިކަރަދޫ ދާއިރާގެ މެންބަރު ހުސައިން ޒިޔާދާއި، އިހަވަންދޫ ދާއިރާގެ މެންބަރު މުހައްމަދު ޝިފާއު އާއި މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް އަދި ފޮނަދޫ ދާއިރާގެ މެންބަރު މޫސާ ސިރާޖެވެ. މި މަގާމަށް ވެސް އަދި އިތުރު ބޭފުޅަކު އައްޔަން ކުރުމަށް އިންތިހާބު ކުރަންޖެހޭތީ އެ މަގާމަށް ވެސް ވާދަކުރުމުގެ ފުރުސަތު ވަނީ ހުޅުވާލާފައެވެ.

އެމްޑީޕީން ބުނީ އިންތިޚާބުގައި ހުޅުވާލި ވިޕްގެ މަގާމަށް ވާދަކުރުމަށް ބޭނުންވާ ބޭފުޅުންނަށް ޕާޓީގެ ޕާލިމަންޓަރީ ގްރޫޕް މެމްބަރުން 27 ފެބްރުއަރީ 2022 ވާ އާދިއްތަ ދުވަހުގެ 12:00 ކުރިން elections@mdp.org.mvށް ކުރިމަތި ލުމަށް އެދޭ ލިއުމާއެކު އައި.ޑީ ކާޑް ކޮޕީ އީމެއިލް ކުރުމަށް އެދޭ ކަމަށެވެ.