ހިޔާ ފްލެޓްތަކުގެ ފިނިޝިންގ މަސައްކަތް ނިންމައި އާއިލާތައް ބަދަލުވެފައި ވަނީ ކިހާވަރަކަށްތޯ ބެލުމަށް ޚާއްސަ ސަރވޭ އެއް ފަށަނީ

ހިޔާ ފްލެޓްތަކުގެ ފިނިޝިންގ މަސައްކަތް ނިންމައި އާއިލާތައް ބަދަލުވެފައި ވަނީ ކިހާވަރަކަށްތޯ ބެލުމަށް ޚާއްސަ ސަރވޭއެއް މިމަހުގެ ފަހުކޮޅު ފަށާނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.

ހިޔާ ފްލެޓްތަކާއި ބެހޭ ގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ސުހައިލް ވިދާޅުވީ މީގެ ކުރިން ވެސް ފިނިޝިންގެ މަސައްކަތް ކުރުމަށް އިތުރު މުއްދަތެއް ދިނުމަށް ނިންމީ ޚާއްސަ ސަރވޭ ކުރުމަށްފަހު ކަމަށެވެ. އެގޮތުން މިފަހަރު ވެސް ޚާއްސަ ސަރވޭ ކުރިއަށް ގެންދާނެ ކަމަށާއި، ފްލެޓްތަކަށް ބަދަލުވެފައިވަނީ ކިހާ އަދަދެއްގެ އާއިލާއެއްތޯ ބަލާނެ ކަމަށެވެ. މިހާރު ގާތްގަނޑަކަށް 3000 އާއިލާ ހިޔާ ފްލެޓަށް ބަދަލުވެފައިވާ ކަމަށް އަންދާޒާ ކުރެވޭ ކަމަށް ސުހައިލް ވިދާޅުވިއެވެ.

ސުހައިލް ވިދާޅުވީ ފިނިޝިންގ މަސައްކަތް ކުރުމަށް ގާތްގަނޑަކަށް 7 މަސް ދެވިފައިވާ ކަމަށާއި، އެއީ އެކަށީގެންވާ މުއްދަތެއް ކަމަށެވެ. އަދި ވިދާޅުވީ ފިނިޝިންގެ މަސައްކަތްތަކަށް އިތުރު މުއްދަތެއް ސަރުކާރުން ދީފައިވަނީ ވަރަށް ބޮޑަށް މަޝްވަރާ ކުރުމަށްފަހު ކަމަށާއި، ލޯނު ޑީފޯލްޓްނުވާނެ ކަމަށެވެ.

މީގެ އިތުރުން ސުހައިލް ވިދާޅުވީ ފިނިޝިންގެ މަސައްކަތް ކުރުމަށް ދީފައިވާ މުއްދަތުގައި މަސައްކަތް ނިންމުން ވަރަށް މުހިންމު ކަމަށާއި، މިހާރު ބައެއް އާއިލާތައް ދިރިއުޅެމުންދާއިރު އެކަމުގެ ސަބަބުން އެ އާއިލާތަކަށް ވަރަށް ގިނަ ދަތިތަކާއި ކުރިމަތިވެ އުނދަގޫތަކާއި ކުރިމަތިލާން ޖެހޭ ކަމަށެވެ.

ހިޔާ ފްލެޓްތަކަށް ދިރިއުޅުން ބަދަލުކުރާ މީހުންގެ ހުރި ކަންބޮޑުވުންތަކާއި ދަތިތައް ހައްލުކުރުމުގެ ގޮތުން ފްލެޓްތައް ނިންމުމަށް، ކުލި ނުނަގައި އިތުރު ތިން މަސްދުވަސް، ފްލެޓްތަކުގެ ވެރިންނަށް ދޭން ސަރުކާރުން ނިންމާފައިވާކަން އިއުލާން ކުރައްވާފައިވަނީ 26 ޑިސެންބަރު 2021 ގައި ބޭއްވި އެއްބައިވަންތަކަމުގެ ދުވަހުގެ ޖަލްސާގައި ރައީސް އިބްރާހިމް މުހައްމަދު ސޯލިހް ޙެވެ. އަދި އެމަނިކުފާނު ވިދާޅުވީ 2022 ވަނަ އަހަރުގެ މާރޗު މަސް ނިމޭއިރު، ފްލެޓްތަކުގެ ފިނިޝިންގ މަސައްކަތް ނިންމައި އެތަނުގައި ފްލެޓް ލިބުނު ފަރާތްތަކަށް ދިރިއުޅެން ފެށޭވަރު ވާނެ ކަމަށް އުންމީދު ކުރައްވާ ކަމަށެވެ.

ހިޔާ މަޝްރޫއުގެ ފްލެޓްތަކުގެ މަސައްކަތް ހަވާލު ކުރެވުނު ކޮންޓްރެކްޓަރާ އެކު އެތަނުގެ ފިނިޝިންގ މަސައްކަތް ކުރުމަށް އެއްބަސްވެވިފައެއް ނުވެއެވެ. އެހެންކަމުން، މި ތަންތަން އާންމުންނާ ހަވާލު ކުރެވިފައިވަނީ ފިނިޝިންގ މަސައްކަތް ނުނިންމައެވެ. ވުމާއިއެކު ފްލެޓްތަކުގައި މުށިޖެހުމާއި، ކުލަލުމާއި، ބަދިގެ ކަބަޑުސެޓު ޖެހުމާއި، ފަންކާއާއި ބޮކި ވެސް ހަރުކުރަންޖެހޭނީ ފްލެޓްތަކުގެ ވެރިންގެ ޚަރަދުގައި އަމިއްލައަށެވެ. އެގްރިމެންޓްގައި ސޮއިކުރުމަށްފަހު ފުރަތަމަ ތިން މަސް ދިނީ ފިނިޝިންގ މަސައްކަތްތައް ކުރުމަށެވެ. މި މުއްދަތުގައި އެއްވެސް ކުއްޔެއް ނުނަގާގޮތަށް ސަރުކާރުންވަނީ ލުއި ދީފައެވެ.

ހިޔާ ފްލެޓްތަކުގެ ކުއްޔަކީ މަހަކު 7,500 ރުފިޔާކަމަށް ވަނީ ނިންމާފައެވެ. އަދި ފްލެޓްގެ މެއިންޓަނަންސް ފީގެ ގޮތުގައި ކޮންމެ މަހަކު 1,000 ރުފިޔާ ނަގާނެއެވެ. ފްލެޓްތަކަށް ފައިސާ ދައްކާ ޚަލާސް ކުރަން ޖެހެނީ 25 އަހަރުގެ މުއްދަތަށް ބަހާލައިގެންނެވެ.