ފައިޒަންއަށް ކޮށްފައިވާ ދައުވާ: އިންޓެލް ރިޕޯޓާ ގުޅިގެން ވާހަކަދައްކަން ބޭނުންވާތީ އަޑުއެހުން ސިއްރު
މި މައްސަލަ ކުރިއަށް ގެންދަވަނީ ގާޒީ ހުސައިން ފާއިޒު ރަޝާދު
ރާއްޖެއިން ބޭރުގައި ހިނގާ ހަނގުރާމައެއްގައި ބައިވެރިވުމަށް ރާއްޖެ ދޫކޮށް ދިޔުމުގެ ކުށުގެ ދައުވާ އުުފުލާފައިވާ ޙަސަން ފައިޒަން
ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ތުރުކީ މަގުން ސީރިއާއަށް ދިޔަ މައްސަލައިގައި މއ. މާރަނގަ ޙަސަން ފައިޒަންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ ގާޒީ ހުސައިން ފާއިޒު ރަޝާދެވެ.
މި މައްސަލައިގައި އެންމެ ފަހުންއަޑުއެހުމެއްބާއްވާފައިވަނީ 13 ފެބްރުއަރީ 2022 ގައެވެ. އެ ދުވަހު ކުރިއަށްދިޔަ އަޑުއެހުމުގައި އޮތީ މި މައްސަލައިގެ ޝަރީއަތް ފަށައި، ދައުލަތުގެ ހެކިންގެ ހެކިބަސް ނެގުމެވެ. އެގޮތުން ފުރަތަމަ އޮތީ މޯބައިލް ފޮރެންސިކް ރިޕޯޓު ތައްޔާރު ކުރެއްވި އޮފިސަރުގެ ހެކިބަސް ނެގުމުގެ ބައެވެ.
އެހެންނަމަވެސް ފުލުހުންގެ މޯބައިލް ފޮރެންސިކް ރިޕޯޓު ހުށައެޅުމުގެ ކުރިން ފުލުހުންގެ އިންޓެލިޖެންސް ރިޕޯޓާއި ގުޅިގެން ދިފާއުން ފާހަގަ ކުރަން ބޭނުންވާ ކަންކަން ހުރުމާއެކު އަޑުއެހުމުގެ އެ ބައި ވަނީ ސިއްރު ކޮށްފައެވެ. ސަބަބަކީ ހެކިބަހުގެ ކުރިން އިންޓެލިޖެންސް ރިޕޯޓާއި ގުޅޭ ވާހަކަތަކެއް ދިފާއުން ޝަރީއަތުގައި ދައްކަން ބޭނުންވާކަން ފާހަގަ ކުރުމާއި ގުޅިގެންނެވެ.
އެ ބައި ކުރިއަށް ގެންދެވުމަށްފަހު ގާޒީ ޝަރީއަތް އެހެން ދުވަހަކަށް ފަސްކޮށްދެއްވީއެވެ.
މި މައްސަލައިގައި އާދިއްތަ ދުވަހު ކުރިއަށް ދިޔަ އަޑުއެހުމުގައި ގާޒީ ވަނީ ދިފާއީ ހެކި ހުށައަޅަން ދީފައިވާ މުއްދަތުގައި ހެކި ހުށައަޅާފައިނުވަނީ ކީއްވެތޯ ސުވާލު ކުރައްވާފައެވެ. އެހެންނަމަވެސް، އިންޓެލް ރިޕޯޓާއި ގުޅިގެން ވާހަކަ ދައްކަން ބޭނުންވާތީ އަޑުއެހުން ފެށުމަށްފަހު ވަކި ހިސާބަކުން މި އަޑުއެހުން ވަނީ ސިއްރު ކޮށްފައެވެ. އެގޮތުން ދިފާއުން އިންޓެލް ރިޕޯޓާ ގުޅިގެން ވާހަކަ ދައްކަން ބޭނުންވާތީ ދައުލަތުގެ އެދުމުގެ މަތިން ވަނީ އަޑުއެހުން ސިއްރު ކޮށްފައެވެ.
