އެޗްޑީސީގެ ނަމުގައި އޮޅުވާލައިގެން ފައިސާ ހޯދަމުންދާތީ ސަމާލުވުމަށް އިލްތިމާސްކޮށްފި
އެޗްޑީސީން މޯބައިލް ނަންބަރަކުން ނުގުޅާނެ
ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ނަމުގައި އާއްމުންނަށް ގުޅަައި އޮޅުވާލައިގެން ފައިސާ ހޯދަމުންދާތީ ސަމާލުވުމަށް އިލްތިމާސްކޮށްފިއެވެ.
ރާއްޖެޓީވީއަށް މައުލޫމާތު ލިބިފައިވާ ގޮތުގައި ފްލެޓް ލިބުނު ކަމަށް ބުނެ އާއްމުންނަށް ގުޅައި ފައިސާ ހޯދުމަށް މަސައްކަތް ކޮށްފައިވެއެވެ. އެޗްޑީސީން ބުނީ އެމައްސަލަ ސަމާލު ކަމަށް އައިސްފައިވަނީ ފާއިތުވި ހަފްތާ ތެރޭގައި އެފަދަ މައްސަލަތަކެއް އެކޯޕަރޭޝަން އަށް ހުށަހަޅާފައިވާތީއެވެ. ނަމަވެސް އެޗްޑީސީން މޯބައިލް ނަންބަރަކުން ނުގުޅާނެ ކަމަށާއި، މޯބައިލް ނަންބަރަކުން ގުޅައިފިނަމަ އެޗްޑީސީގެ ކޯލް ސެންޓަރު 1516އަށް ގުޅައި ޔަގީން ކުރުމަށް އެދިފައިވެއެވެ.
އެޗްޑީސީން ބުނީ މިދުވަސްވަރު ފްލެޓް ލިބުނު ކަމަށް ބުނެ އެޗްޑީސީން ނުގުޅާނެ ކަމަށާއި، އެފަދަ ކަންކަމަށް އާއްމުން ސަމާލުވާން ޖެހޭ ކަމަށެވެ.
އެޗްޑީސީގެ ނަމުގައި އާއްމުންނަށް ގުޅަައި އޮޅުވާލައިގެން ފައިސާ ހޯދަމުންދާ މައްސަލަ ބޮޑުވެފައިވާއިރު، ދޭތެރެ ދޭތެރޭން ދިރާގު، އުރީދޫ އަދި ބެންކް އޮފް މޯލްޑިވްސް އިން ކަމަށް ބުނެ އާއްމުންނަށް ގުޅައި، އޮޅުވާލައިގެން ފައިސާ ހޯދާ މައްސަލަ ވެސް ބޮޑުވެ އެފަދަ މައްސަލަތައް އިތުރުވުމާއެކު، އާއްމުން ހޭލުންތެރިކުރުމުގެ ގޮތުން ޚާއްސަ ޕްރޮގްރާމްތަކެއް ބޭންކުން ކުރިއަށް ގެންގޮސްފައިވެއެވެ. އަދި އެހެން ލިބޭ ކޯލްތައް ނުނެގުމަށާއި، ކާޑުގެ މައުލޫމާތުތައް ނުދިނުމަށް އިލްތިމާސްކޮށްފައިވެއެވެ.
