ދިވެހި ދައުލަތަކީ ކުފުރުގެ ދައުލަތެއް ކަމަށް ބުނެ، ޓެރަރިޒަމަށް ހިތްވަރު ދިން މައްސަލައިގައި ހދ ނޭކުރެންދޫ/ޝާޒިން، މުޙައްމަދު މުނާޒުގެ މައްޗަށް އުފުލާފައިވާ ދައުވާތައް ސާބިތުނުވާކަމަށް ކްރިމިނަލް ކޯޓުން ނިންމައިފިއެވެ.

އޭނާގެ މައްޗަށް 2 ދައުވާއެއް އުފުލާފައިވެއެވެ. އެއީ ޓެރަރިޒަމްގެ އަމަލެއް ކުރުމަށް ހިތްވަރު ދިނުމާއި، ޓެރަރިޒަމް އަށް ފައިނޭންސް ކުރުމުގެ ކުށުގެ ދައުވާއެވެ. މި ދެ ދައުވާގައި ޙުކުމް ކޮށްފައިވަނީ ބުރާސްފަތި ދުވަހުއެވެ.

މި މައްސަލައިގައި ދައުވާ އުފުލާފައިވާ މުނާޒު "އަބޫ މިޝްކާ" ނަމަކަށް ކިޔާ އެކައުންޓެއް ބޭނުންކޮށްގެން ޕާކިސްތާނުގައި އުޅޭ އިމްރާން ނަމަކަށް ކިޔާ އައިސިސްއަށް ތާއީދުކުރާކަމަށް ބެލެވޭ މީހެއްގެ އަތުން ފައިސާ ހޯދާފައިވާކަން އެނގެން އޮތްކަމަށް ދައުލަތުން ބުނެއެވެ. އަދި އެމެރިކާގެ ވާރޖީނިއާގެ ލަޔަނަލް ވިލިއަމްސް ކިޔާ މީހެއްގެ އަތުން ފައިސާ ހޯދާފައިވާއިރު، އޭނާއަކީ އެފަދަ މައްސަލައެއްގެ ރެކޯޑު އޮންނަ މީހެއްކަން އެފްބީއައި އިން ބަޔާން ކޮށްފައިވާކަމަށް ދައުލަތުން ބުނެއެވެ.

އެކަންކަން ސާބިތު ކޮށްދިނުމަށް ދައުލަތުން ހުށައަޅާފައިވަނީ ފުލުހުން ތައްޔާރު ކޮށްފައިވާ އިންޓެލިޖެންސް ރިޕޯޓާއި، ޔޫއެސް ޑިޕާޓްމަންޓް އޮފް ޖަސްޓިސް އިން ފުލުހުންނަށް ފޮނުވާފައިވާ ސީޑީއެކެވެ. އެހެންނަމަވެސް އިންޓެލް ރިޕޯޓުގައި ބަޔާންކޮށްފައިވަނީ ޕާކިސްތާނުގައި ދިރިއުޅޭ އައިސިސްއަށް ތާއީދުކުރާކަމަށް ބެލެވޭ މުޙައްމަދު އިމްރާން ކިޔާ މީހެއްގެ ފަރާތުން މުނާޒްއަށް ފައިސާ ލިބިފައިވާކަމަށް މައުލޫމާތު ލިބޭ ކަމަށެވެ. ވީއިރު އެ މައުލޫމާތު ލިބުނު ގޮތެއް ނުވަތަ އޭގެ ސައްޙަކަމެއް ސާފުނުވާކަމަށް ޙުކުމުގައި ވަނީ ބަޔާންކޮށްފައެވެ. އަދި ރިޕޯޓުގެ ސައްޙަކަން ކަށަވަރު ކޮށްދީ، އެކަމާ ގުޅިގެން ޝަރީއަތަށް ސާފުކޮށްދޭން ޖެހޭ ކަންކަން ސާފު ކޮށްދިނުމަށް ރިޕޯޓު ހުށައެޅި ފަރާތް ހެއްކެއްގެ ގޮތުގައި ހުށައަޅާފައިނުވާކަންވެސް ޙުކުމުގައި ފާހަގަކޮށްފައިވެއެވެ.

އޭގެ އިތުރުން، (ބަހުސްގެ ބޭނުމަށް) ޓެރަރިޒަމް އަށް ހިތްވަރުދޭ ފަރާތްތަކާ މުނާޒްގެ އެކައުންޓަކުން ވާހަކަ ދައްކާފައިވާކަމަށް ބެލި ނަމަވެސް، ހަމައެކަނި ޓެރަރިޒަމް އަށް ހިތްވަރުދޭ ފަރާތްތަކާ މުއާމަލާތު ކުރުމަކީ ޓެރަރިޒަމްގެ އަމަލެއް ނޫންކަމަށް ޙުކުމުގައި ފާހަގަކޮށްފައިވެއެވެ.

އޭގެ އިތުރުންވެސް ގިނަ ސަބަބުތަކެއް ޙުކުމުގައި ބަޔާންކޮށްފައިވާއިރު، އޭނާގެ މައްޗަށް އުފުލާފައިވާ ޓެރަރިޒަމް އަށް ފައިނޭންސް ކުރުމުގެ ކުށުގެ ދައުވާ ސާބިތުނުވާކަމަށް މައްސަލަ ބެއްލެވި ގާޒީ އިސްމާއިލް ޝަފީއު ވަނީ ނިންމަވާފައެވެ.

އޭނާގެ މައްޗަށް އުފުލާފައިވާ ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާވެސް ސާބިތެއް ނުވިއެވެ. އެގޮތުން "އަބޫ ޔޫސުފު" ގެ ނަމުގައި އޭނާ ގެންގުޅޭކަމަށް ބެލެވޭ ފޭސްބުކް އެކައުންޓުގައި ޓެރަރިޒަމަށް ބާރުދޭ ވާހަކަތައް ލިޔެ، ޕޯސްޓުކުރާކަން ދައުލަތުން ފާހަގަކުރި ނަމަވެސް، އެ ޕޯސްޓުތަކަކީ އޭނާ ކޮށްފައިވާ ޕޯސްޓުތަކެއްކަން ދައުލަތުން ހުށައަޅާފައިވާ ހެކިތަކުން ސާބިތުނުކުރެވޭކަމަށް ޙުކުމުގައި ފާހަގަކޮށްފައިވެއެވެ.

މި މައްސަލައާ ގުޅިގެން ދިފާއުން ފާހަގަ ކޮށްފައިވާ ކަންކަމަށް ބަލާއިރު، އޭނާ ފައިސާ ހޯދީ ޓެރަރިޒަމަށް ފައިނޭންސް ކުރުމަށްތޯ ނުވަތަ އެނޫން ބޭނުމެއްގައިތޯ ކަށަވަރު ކުރަނީ ކިހިނެއްތޯ ދިފާއީ ވަކީލު ސުވާލު ކުރެއްވިއެވެ.

މި މުއާމަލާތްތަކަށް ބަލާއިރު، އޭގައި 50 ޑޮލަރާއި 100 ޑޮލަރު ފަދަ އަދަދުތައް ހޯދަން އެދިފައިވާ ކަމަށާއި، ރާއްޖޭގެ ބައެއް މީހުންގެ ކިބައިންވެސް ފައިސާ ހޯދަން އެދިފައިވާކަމަށް ދިފާއީ ވަކީލު ވިދާޅުވިއެވެ. މިއީ ޓެރަރިޒަމްއަށް ފައިނޭންސް ކުރުންކަމަށް ބެލެވޭނެ ޖާގައެއް ނެތްކަމަށް ދިފާއީ ވަކީލު ވިދާޅުވިއެވެ.

ޤުރުއާނުގެ ބައެއް އާޔަތްތައްވެސް އޭނާ ޕޯސްޓު ކޮށްފައިވާއިރު، އެއީ ދީނީ ހަރުކަށި ފިކުރަށް ބާރުދޭ ޕޯސްޓުތަކެއް ކަމުގައި ދައުލަތުން ކަނޑައެޅީ ކިހިނެއްތޯވެސް ވަކީލު ސުވާލު ކުރެއްވިއެވެ. ވަކީލު ވަނީ މި މައްސަލަ ސާބިތުނުވާކަމަށް ކަނޑައަޅުއްވައި ދެއްވުމަށް އެދިފައެވެ. މިއީ ޓެރަރިޒަމްގެ ޤާނޫނަށް އިސްލާޙު ގެނެސް، ޓެރަރިސްޓު ޖަމާއަތްތަކަކީ ކޮބައިކަން ކަނޑައެޅުމުގެ ކުރިން ހިންގާފައިވާ ކަންކަން ކަމަށް ވަކީލު ވިދާޅުވިއެވެ.