"ރަށު ރައީސަށް މަރުހަބާ"

"ރަށު ރައީސަށް މަރުހަބާ" މިއީ އެންމެ ފުރަތަމަ ވެސް ޅ. ހިންނަވަރަށް ފޭބުމުން ލޮލުގައި އަޅައިގަތް ލިއުން ކޮޅެވެ. ރައީސް ސޯލިހް އަށް މަރުހަބާ ދެންނެވުމުގެ ގޮތުން އެރަށުގައި ބަހައްޓާފައިވާ މަރުހަބާގެ ބޯޑުގައި ލިޔެފައިވަނީ މިހެންނެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ޅ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެމަނިކުފާނުގެ އުފަން ރަށަށް ވަޑައިގެންނެވުމުން އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ.

ސަޤާފީ ހަރަކާތްތަކާއެކު މަރުހަބާ ދެންނެވުމުގެ ކަންތައްތައް ރަށުގައި ވަނީ ކުރިއަށް ގެންގޮސްފައެވެ. އަދި ރަށުގެ ކުދި ބޮޑު އެންމެން ވަނީ ރައީސްއަށް މަރުހަބާ ދެންނެވުމަށްޓަކައި ބަނދަރު ސަރަހައްދަށް ނިކުމެފައެވެ. ބަނދަރުން ފެށިގެން ރަށު ކޮޅާއި ހަމައަށް މީހުންގެ ކިޔޫ އޮތީ ދަމާލާފައެވެ. އެއަށްފަހު ރައީސް ސޯލިހުގެ ގެކޮޅު ނޫރާނީގެއާގެ އިން ފެށިގެން އަނެއްކާވެސް ބަނދަރާ ހަމައަށް އޮތީ ސަފު ދަމާލާފައެވެ. މިހާ ގިނަ އަދަދެއްގެ ރައްޔިތުން ރައީސަށް މަރުހަބާ ދެންނެވުމަށްޓަކައި އެއްވެފައިވާ އިރު މަރުހަބާ ދެންނެވުމުގެ ހަރަކާތްތަކަށް ގަޑިއެއްހާއިރު ވަނީ ހޭދަވެފައެވެ.

ކުދި ބޮޑު އެންމެހާ ރައްޔިތުންގެ މޫނުމަތިން ފެންނަމުން ދިޔައީ އުފާވެރިކަމެވެ. ރައީސް ރައްޔިތުންނާއި ސަލާމް ކުރައްވާ، ބައެއް ރައްޔިތުން ރައީސާއެކު ފޮޓޯ ނަގަމުން ދިޔައިރު ރައީސް ވަނީ ކުޑަކުދިންނާއި ވާހަކަފުޅު ދައްކަވާ ބައެއް ތުއްތު ކުދިން އުރުއްވާލައްވަވާފައެވެ. މިގޮތުން ލޮލުގައި އެންމެ ބޮޑަށް އަޅައިގަތް އެއް މަންޒަރަކީ ރައީސް އުރުއްވާ ލެއްވި ކުޑަ ކުއްޖަކު ރައީސްގެ ކޮނޑުފުޅު މަތީގައި ބޯ އަޅާލައިގެން އޮތް މަންޒަރެވެ. އަމިއްލަ އާއިލާ މީހެއްގެ ކޮނޑުމަތީގައި އޮންނަ ގޮތަށް، ރައްކާތެރިކަމާއެކު އެ ކުޑަކުއްޖާ އޮތްއިރު އެއީ ބަލާލަން ވަރަށް ވެސް ހިތްގައިމު އުފާވެރި މަންޒަރަކަށް ވެގެން ދިޔައެވެ.

މަރުހަބާ ދެންނެވުމުގެ ކަންތައްތައް ނިމުމަށްފަހު ވެސް ރައީސް ސޯލިހް ވަނީ ބައެއް ރައްޔިތުންނާއެކު ފޮޓޯ ނަންގަވާފައެވެ. މިހާ ގިނަ އަދަދެއްގެ ރައްޔިތުން ރައީސަށް މަރުހަބާ ދެންނެވިކަމުން ސާފުވާ އެއްކަމެއް އެބައޮތެވެ. ރައީސްގެ އުފަން ރަށުން ތާއިދު އޮތް މިންވަރެވެ. އެމަނިކުފާނުގެ ސިޔާސަތުތައް ބަލައިގަނެ، އެ ރައްޔިތުންވެސް އެމަނިކުފާނުގެ ފަހަތްޕުޅުގައި ތިއްބެވިކަމެވެ.

ރައީސް ސޯލިހް އަކީ މާލެ ފިޔަވާ ރާއްޖޭގެ ރަށަކަށް ނިސްބަތް ވެވަޑައިގަންނަވާ ފުރަތަމަ ރައީސް އެވެ. އެހެން ރައީސުންނާއި ނިސްބަތް ކުރާއިރު ރައީސް ސާލިހުގެ ސިޔާސަތުތައް ވެސް ތަފާތެވެ. އެމަނިކުފާނު އެންމެ ބޮޑު އިސްކަމެއް ދެއްވަނީ އަތޮޅުތެރޭގެ ރަށްތައް ތަރައްޤީކޮށް ކުރިއެރުވުމަށެވެ. އެގޮތުން މިހާރު ވެސް ރާއްޖޭގެ އެކި ރަށްތަކުގައި ތަރައްޤީގެ ގިނަ މަޝްރޫއުތަކެއް ކުރިއަށްދާއިރު އެމަނިކުފާނު އަބަދުވެސް ވިދާޅުވާ ވާހަކަފުޅެއް އޮވެއެވެ. އެއްވެސް ރަށެއް ތަފާތު ކުރުމެއް ނެތި ޚިދުމަތް ދެއްވާނެ ވާހަކަފުޅެވެ. ކިތަންމެ އާބާދީ ކުޑަ ރަށަކަށް ވިއަސް ބޮޑު ރަށަކަށް ވިޔަސް ތަރައްޤީގެ މަޝްރޫއުތައް ކުރިއަށް ގެންދަވާ ރައްޔިތުންނަށް ހިތްފަސޭހަ ދިރިއުޅުމެއް ފޯރުކޮށްދެއްވާނެ ކަމަށް ތަކުރާރުކޮށް ވިދާޅުވެއެވެ. އެމަނިކުފާނު މިއަދު އެ ގެންދަވަނީ އެކަން ސާބިތުކޮށްދެއްވަމުންނެވެ. ރައީސް ސޯލިހް އަކީ ހަޤީޤީ މާނައިގައި ވެސް ހުރިހާ ރަށެއްގެ ވެސް "ރަށު ރައީސް" އެވެ.