ހިންނަވަރު މަގު ހެދުމުގެ މަސައްކަތް ފަށައިފި
މި މަސައްކަތް އާރުޑީސީއާ ހަވާލުކޮށްފައިވަނީ މިދިޔަ އަހަރުގެ އޭޕްރީލް މަހު
ހިންނަވަރުގެ މަގުތައް ހަދަން ފެށުން
ޅ. ހިންނަވަރުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އިން ފަށައިފިއެވެ.
ހިންނަވަރު މަގުހެދުމުގެ މަޝްރޫއު އާރުޑީސީ އާއި ހަވާލުކޮށްފައިވަނީ މިދިޔަ އަހަރުގެ އޭޕްރީލް މަހުއެވެ. މި މަސައްކަތް ފެށުމަށް ވާންޖެހޭ ތައްޔާރީތަކަށްފަހު މަސައްކަތުގެ އަމަލީ މަސައްކަތް ފަށާފައިވަނީ ފެބްރުއަރީ 17 ވީ ބުރާސްފަތި ދުވަހުއެވެ. މި މަސައްކަތް ފައްޓަވައިދެއްވީ އެކުންފުނީގެ މެނޭޖިން ޑިރެކްޓަރ މޫސާ އަލީ މަނިކެވެ.
މި މަސައްކަތް އާރުޑީސީ އާއި ހަވާލުކޮށްފައިވަނީ ޑިޒައިން އެންޑް ބިލްޑް އުސޫލުން 7.125 ކިލޯ މީޓަރުގެ 8 މަގެއް ޒަމާނީ ފެންވަރަށް ތަރައްޤީކުރުމަށެވެ. މިގޮތުން މަގުތަކުގައި ފެންހިންދާ ނިޒާމު ޤާއިމްކުރުމާއި، މަގު ބައްތި ޖެހުމުގެ މަސައްކަތްވެސް މަޝްރޫއުގެ ތެރޭގައި ހިމެނެއެވެ.
މި މަސައްކަތް އާރުޑީސީ އާއި ހަވާލުކޮށްފައިވަނީ 540 ދުވަހުގެ ތެރޭގައި ނިންމުމަށެވެ. މި މަޝްރޫއަކީ 122 މިލިއަން ރުފިޔާގެ ބޮޑު މަޝްރޫއެކެވެ.
