ސެނެހިޔާގައި ތިބި އިންޑިޔާ ޑޮކްޓަރުން ނެރެން ގޮވާ އެމީހުންގެ ފޮޓޯ ނަގާ ހެދުމުގެ ސަބަބުން ނޭދެވޭ އަސަރުކުރޭ: އެމްއެންޑީއެފް
ޑޮކްޓަރުންނަށް ދައްކަން އައިސް ޑޮކްޓަރުންގެ ފޮޓޯ ނަގާ އެފޮޓޯ ޓްވިޓަރ އަށްލާ ފާޑުފާޑު ވާހަކަ ޖެހީމާ ނޭދެވޭ އަސަރުކުރޭ
ސަލާމަތީ ޚިދުމަތްތަކާއި ބެހޭ ކޮމިޓީގެ ބައްދަލުވުމުގެ ތެރެއިން
ކުރީގެ ރައީސް އަބްދުﷲ ޔާމީން އިސްވެ ހުންނަވާ ކުރިޔަށްގެންދަވާ "އިންޑިޔާ އައުޓް" ކެމްޕެއިންގެ ސަބަބުން ސެނެހިޔާ ހޮސްޕިޓަލްގައި މަސައްކަތްކުރާ އިންޑިޔާ ޑޮކްޓަރުންގެ މަސައްކަތަށް ނޭދެވޭ އަސަރު ކުރާކަމަށް މިނިސްޓްރީ އޮފް ޑިފެންސް އަދި މޯލްޑިވްސް ނޭޝަނަލް ޑިފެންސް ފޯސްއިން ބުނެފިއެވެ.
"އިންޑިއާ އައުޓް"ގެ ނަމުގައި ރައީސް ޔާމީން ހިންގަވާ ކެމްޕޭން އާ ގުޅޭގޮތުން މަައުލޫމާތު ދެއްވުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ (241) ކޮމިޓީގައި ވާހަކަދައްކަވަމުން އެމްއެންޑީއެފްގެ ސަރޖަންޓް ޖެނެރަލް ކާނަލް ޑރ. އަލީ ޝާހިދު ވަނީ އިންޑިޔާ އައުޓްގެ ނަމުގައި ހިންގާ ކެމްޕެއިންގެ ސަބަބުން އިންސާނީ އެހީތެރިކަން ފޯރުކޮށްދިނުމަށް އަސްކަރިއްޔާގައި ކުރިޔަށްދާ މަސައްކަތްތަކަށް އެޅެމުންދާ ހުރަސްތަކާއި ގުޅޭގޮތުން މައުލޫމާތު ދެއްވާފައެވެ. އެގޮތުން ޑރ އަލީ ޝާހިދު ވިދާޅުވީ ދޭދޭ ގައުމުތަކުން މަސައްކަތްކުރާއިރު ބޮޑަށް މަސައްކަތްކުރަނީ އިންސާނީ އެހީތެރިކަމުގެ ދާއިރާއިން ކަމަށެވެ.
އެގޮތުން އެކި ގައުމުތަކުގެ ސިފައިން ރާއްޖޭގައި އެމީހުންގެ ޔުނީފޯމް އަޅައިގެން މަސައްކަތްކުރާއިރު ރާއްޖޭގެ ސިފައިންވެސް އެކި ގައުމުތަކުގައި ޔުނީފޯރމްގައި މަސައްކަތްކުރަމުންދާކަމަށް ޝާހިދު ވިދާޅުވިއެވެ. ރާއްޖޭގެ ރަށްތަކަށް ގޮސް އެހެން ގައުމުތަކުގެ ސިފައިން އަސްކަރީ ޔުނިފޯރމް އަޅައިގެން ޚިދުމަތް ދެމުންދާކަމަށާއި ހަމައެގޮތަށް ދިވެހިންވެސް ދޭދޭ ގައުމުތަކުގައި ދިވެހި އަސްކަރީ ޔުނިފޯރމް އަޅައިގެން މަސައްކަތްކުރާ ކަމަށެވެ.
އެގޮތުން ސިއްހީ ދާއިރާއަކީ މިގޮތަށް މަސައްކަތްކުރާ މުހިންމު އެއް ދާއިރާކަން ފާހަގަކުރައްވާ ޝާހިދު ވިދާޅުވީ ސެނެހިޔާގައި އަސްކަރީ ޑޮކްޓަރުން ބައިތިއްބައިގެން ޚިދުމަތް ދެމުން އަންނަނީ 2013 ވަނަ އަހަރުން ފެށިގެންކަމަށެވެ. އެގޮތުން ފާއިތުވި ދުވަސްތަކުގައި މިލިޓަރީ ޑޮކްޓަރުންނާއި މިލިޓަރީ ޕެރެމެޑިކްސް ޔުނިފޯރމްގައި ދިވެހި ރައްޔިތުންނަށް ޚިދުމަތްކުރުމުގައި މަސައްކަތްކުރަމުންދާކަމަށް ޝާހިދު ވިދާޅުވިއެވެ.
މިހާރު ފަށައިގެން އުޅޭ އިންޑިޔާ އައުޓް ކެމްޕެއިނާއެކު ކުރިން ދިމާނުވާ މައްސަލަތަކެއް މިހާރު ފެންމަތިވަމުން އަންނަކަމަށް ޝާހިދު ވިދާޅުވިއެވެ. އެގޮތުން އެކެމްޕެއިނާއެކު ސެނެހިޔާ ކައިރިޔަށް އައިސް އެތަނުގައި ޚިދުމަތްދިނުމިގައި ތިބޭ އިންޑިޔާ ޑޮކްޓަރުން ނެރެން ގޮވަމުންދާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ބައެއް ފަހަރު ރަށްރަށުގައި ޑޮކްޓަރުން ނެތުމުގެ ސަބަބުން މިޑޮކްޓަރުން ރަށްތަކަށް ގޮސް އެރަށަކަށް ޑޮކްޓަރަކު ލިބެންދެން މަސައްކަތްކުރާ ކަމަށެވެ. މީގެއިތުރުން އެންމެ ފުރަތަމަ ސެނެހިޔާ ހުޅުވުމުގެ މަރުހަލާގައިވެސް އިންޑިޔާގެ ފަރާތުން މެޑިކަލް ގިނަ ކަންތައްތަކެއްގައި އެހީތެރިކަން ލިބިފައިވާއިރު ޑޮކްޓަރުން ތަމްރީނުވުމުގައިވެސް އަރމީ ގިނަ ޑޮކްޓަރުންތަކެއް އިންޑިޔާއިން ތަމްރީނުވެ މިހާރުވެސް ތަމްރީން ވަމުންދާކަމަށް ޝާހިދު ވިދާޅުވިއެވެ.
ކޮމިޓީ ބައްދަލުވުމުގައި ވާހަކަދައްކަވަމުން ޑައިރެކްޓަރ ޖެނެރަލް އޮފް ޑިފެންސް އިންޓެލިޖެންސް ބްރިގޭޑިއަރ ޖެނެރަލް އަބްދުﷲ ޒުހުރީ ވިދާޅުވީ "އިންޑިޔާ އައުޓް" ކެމްޕެއިންގެ އަސަރު ރާއްޖެއަށް ކުރަމުންދާކަމަށެވެ. ސޯޝަލް މީޑިޔާގައި ކުރިޔަށްގެންދާ އިންޑިޔާ އައުޓް ހޭޝްޓެގް ކެމްޕެއިން ރާއްޖެއާއި ރާއްޖެއިން ބޭރުގައިވެސް ކުރަމުންދާކަމަށް ޒުުހުރީ ވިދާޅުވިއެވެ. އޭގެ ނަތީޖާއެއްގެ ގޮތުން ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލާ ރާއްޖެއިން ބޭރުގެ ފަރާތްތަކުން އެކަން ކުރަމުންދާކަން ފާހަގަކުރެވިފައިވާކަމަށް ޒުހުރީ ވިދާޅުވިއެވެ.
ޒުހުރީ އިތުރަށް ވިދާޅުވީ މިކެމްޕެއިންގެ ތެރެއިން ކުރިޔަށްދާ ހަރަކާތުގެ ސަބަބުން ނަފުރަތާއި ފިތުނައާއި ރުޅިވެރިކަން އުފެދޭ ވާހަކަތައް ދެކެވެމުންދާކަމަށެވެ. އޭގެ ގެއްލުން ރައްޔިތުންނަށާއި ދައުލަތަށް ވެދާނެކަމަށް ޒުހުރީ ވިދާޅުވިއެވެ.
