211 ޕާކިންގ ސްލޮޓަށް 2429 ފޯމު
ފޯމްތަކުގެ ސައްހަކަން ކަށަވަރު ކުރުމާއި އިދާރީ ގޮތުން ބަލަންޖެހޭ ކަންކަން ބެލުމަށް ފަހު އިތުރު މައުލޫމާތު ހާމަކުރާނެ
ޕާކިންގ ސްލޮޓްތައް
މާލެ ސިޓީ ކައުންސިލުން މާލޭގައި ތަރައްގީކޮށްފައިވާ 211 ޕާކިންގ ސްލޮޓަށް އޮންލައިންކޮށް ކުރިމަތިލުމަށް ހުޅުވާލި ފުރުސަތުގައި 2429 ފޯމު ލިބިފައިވާކަމަށް މާލެ ސިޓީ ކައުންސިލުން ބުނެފިއެވެ.
ޕާކިން ސްލޮޓަށް އެދޭ ޕޯޓަލް ބުދަ ދުވަހު ހުޅުވާލި އެވެ. ނަމަވެސް އެ ލިންކް ބްލޮކްވުމާއި ގުޅިގެން، ބުރާސްފަތި ދުވަހު ވަނީ އަލުން ޕޯޓަލް ހުޅުވާލުމަށް ސިޓީ ކައުންސިލުން ނިންމާފައެވެ. އެ ލިންކް ބްލޮކް ކުރީ ސަރުކާރުން ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ތުހުމަތު ކުރައްވިއެވެ. މޭޔަރު ކުރެއްވި ތުހުމަތަށް އިޝާރާތް ކުރައްވައި މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީގެ ސްޓޭޓް މިނިސްޓަރު އަލީ ސޯލިހު ވިދާޅުވީ, މޭޔަރު މަސައްކަތް ކުރައްވަނީ އަބަދުވެސް ރައްޔިތުންނަށް އޮޅުވާލައި ރައްޔިތުންގެ ހިތުގައި ނަފްރަތު އުފެއްދުމުގެ މަސައްކަތް ކަމަށެވެ. އަލީ ސޯލިހު ވިދާޅުވީ, އެފަދަ ކަމެއް ސަރުކާރުން ނުކުރާނެ ކަމަށާއި، އެކަމުގެ ޔަގީންކަން ރައްޔިތުންނަށް އަރުވާކަމަށެވެ.
މާލެ ސިޓީ ކައުންސިލުން ފަހުން ފުރުސަތު ހުޅުވާލާފައިވަނީ ބުރާސްފަތި ދުވަހުގެ މެންދުރު ފަހު ދެއަކުން ހަވީރު ހަޔަކަށެވެ. ސިޓީ ކައުންސިލުން ބުނީ ހައެއް ޖެހުމާއެކު ފޯޓަލް ބަންދުކުރިއިރު 2429 މީހަކު ފޯމް ހުށައަޅާފައިވާ ކަމަށާއި ފޯމްތަކުގެ ސައްހަކަން ކަށަވަރު ކުރުމާއި އިދާރީ ގޮތުން ބަލަންޖެހޭ ކަންކަން ބެލުމަށް ފަހު އިތުރު މައުލޫމާތު ހާމަކުރާނެ ކަމަށްވެސް ކައުންސިލުން ބުނެއެވެ.
މާލޭގެ އެކި ހިސާބުތަކުން 450 ޖާގަ ވެހިކަލް ޕާކު ކުރުމަށް ކުއްޔަށް ދޫކުރުމަށް މާލޭ ސިޓީ ކައުންސިލުން ނިންމީ ޕާކިންގެ މައްސަލައަށް ހައްލު ހޯދުމަށެވެ. އެއީ މިދިޔަ ޖުލައި މަހުގެ ތެރޭގައި މާލޭގެ ދިހަ ސަރަހައްދުން ޖުމްލަ 211 ޖާގައަށް ކުރިމަތިލުމަށް ހުޅުވައިލި ފުރުސަތުގެ ތެރެއިން ދޫކުރި ޖާގަތަކެކެވެ.
މި ޕާކިންގ ސްލޮޓްތަކަކީ މަހު ފީގެ ގޮތުގައި އަގު ނަގާގޮތަށް ކުއްޔަށް ދޫކުރެވޭ ސްލޮޓްތަކެކެވެ. މި ސްލޮޓްތަކުގެ ތެރޭގައި ޕްރައިވެޓް ކާރުތަކަށާއި، މާލޭގައި ދުއްވާ ޓެކްސީތަކަށް, އަދި 3.5 ޓަނުގެ ޕިކަޕްތަކަށް ޚާއްސަ ސްލޮޓްތައް ހިމެނެއެވެ. މިހާރު ގާއިމުކުރެވިފައިވާ ޕާކިންގ ސްލޮޓުތަކުގެ ތެރެއިން %25 ޚާއްސަކުރެވިފައި ވަނީ މާލޭގައި ދުއްވާ ޓެކްސީތަކަށެވެ. ކޮންމެ ފަރުދަކަށްވެސް ތަފާތު ތިން ސަރަހައްދަކުން ޖާގައަށް އެޕްލައި ކުރެވޭނެއެވެ. މި ހުޅުވާލެވޭ ފުރުސަތުތަކުގެ ތެރޭގައި ގަރާޖުގެ ގޮތުގައި ސްލޮޓް ރަޖިސްޓްރީކުރުން ނުހިމެނެއެވެ.
