ފްލެޓް ފޯމު ނަގަން ގިނަ ބަޔަކު ތޮއްޖެހިފައި، އެއްބަޔަކަށް ފޯމެއް ނުލިބުނު!

ބޯހިޔާވަހިކަމުގެ މަޝްރޫއުގެ ދަށުން 7،000 ފްލެޓަށް ކުރިމަތިލުމުގެ ފުރުސަތު އާދީއްތަ ދުވަހު ސަރުކާރުން ހުޅުވާލުމާއެކު، ކިއުގައި ޖެހިގެން ދަރުބާރުގެއަށް ވަތް ބައެއް މީހުންނަށް ފޯމު ނުލިބުމުން، އެކަމުގެ ޝަކުވާ ބޮޑުވެއްޖެއެވެ.

އާދީއްތަ ދުވަހުގެ މެންދުރުފަހުން ފެށިގެން ދަރުބާރުގޭގެ ރަންނަބަނޑޭރިމާލަން އޮތީ މީހުންނާއެކު ތޮއްޖެހިފައެވެ. ތަފާތު 17 ކެޓަގަރީއަކުން ފޯމު ދޫކުރަން ޑެކްސުތަކެއް ބަހައްޓާފައިވާއިރު، ބައެއް ޑެކްސުތަކުގައި ކިއު ތަރުތީބެއް ނެތި، މީހުން ވަނީ ފުނިޖެހިފައެވެ.

ފޯމު ހޯދަން އެތައް ބަޔަކު ތޮއްޖެހިފައި

ފްލެޓް ފޯމު ހޯދަން ދަރުބާރުގެއަށް ގޮސް ތިބި ބައެއް މީހުން "ރާއްޖެޓީވީ"އަށް ބުނީ އެތަނުގައި ތިބޭތާ ތިން ގަޑިއިރަށް ވުރެ ގިނައިރު، ވެފައިވާ ކަމަށާއި ބައެއް ކެޓަގަރީތަކުން ފޯމު ހުސްވެފައިވާ ކަމަށެވެ. ފޯމު ހޯދަން އަންނަ މީހުންނަށް އިރުޝާދީ، ހަމަޖައްސަންޖެހޭ އިންތިޒާމުތައް ވެސް ފުރިހަމަވެފައި ނެތް ކަމަށް އެތަނަށް ދިޔަ ބައެއް މީހުން ރާއްޖެޓީވީއަށް ކިޔައިދިނެވެ.

"މިތަނުގެ ތެރޭގައި އެނބުރެން މި ޖެހެނީ. އިމްތިޒާމުތައް އެހާ ދަށް. އެއްވެސް ވަރަކަށް އޮގަނައިޒްވެފައެއް ނެތް. ތިން ގަޑިއިރުވީއިރުވެސް ފޯމު ނުލިބިގެން ތިބެން މިޖެހެނީ. ފޯމު ނުލިބެނީ ވަކި ކެޓަގަރީތަކުން އެކަނި،" ފްލެޓަށް ކުރިމަތިލާން ފޯމު ހޯދަން ދަރުބާރުގެއަށް ދިޔަ މީހަކު ބުންޏެވެ.

ދަރުބާރުގެއަށް މީހުން ޖަމާވެ ފުނިޖެހިފައި

ދަރުބާރުގެއަށް މީހުން ޖަމާވެ، ތޮއްޖެހިފައި ވަނީ ފަސޭހައިން ފޯމު ލިބޭނެ އިންތިޒާމް ހަމަޖައްސާފައިވާ ކަމަށް ހައުސިން މިނިސްޓްރީން ބުނެފައިވަނިކޮށެވެ. މިއަދުން ފެށިގެން އަންނަ ޖުލައި މަހުގެ 31ގެ ނިޔަލަށް ފޯމް ދޫކުރާ ގޮތަށް ނިންމާފައިވާއިރު، ހައުސިން މިނިސްޓްރީގެ ވެބްސައިޓުން ވެސް ފޯމު ޑައުންލޯޑް ކުރެވެއެވެ. ފްލެޓް ފޯމު ފޯމު ހުށަހެޅުމުގެ މުއްދަތު އަންނަ މަހުގެ ތިން ވަނަ ދުވަހުން ފެށިގެން ޖުލައި 31ގެ ނިޔަލަށް ހުޅުވާލާނެއެވެ.

ފްލެޓް ފޯމު ދޫކުރަނީ ހުޅުމާލޭގައި އިމާރާތް ކުރާ ޝޯޝަލް ހައުސިން ޔުނިޓުން ދޫކުރާ 7،000 ފްލެޓަށެވެ.