ފްލެޓަށް ފޯމު ބަލައިގަތުން އާދީއްތަ ދުވަހު
2 ޖޫން 2018 | ހޮނިހިރު 07:13އާދިއްތަ ދުވަހު ހެނދުނު 10:30 އިން 1:30 އަށް އަދި ރޭގަނޑު 9:00 އިން 11:00 އިން ފެށިގެން އަންނަ ޖުލައި މަހުގެ ނިޔަލަށް ފޯމު ބަލައި ގަންނާނެ
ފޯމު ހޯދަން އެތައް ބަޔަކު ތޮއްޖެހިފައި
ފްލެޓަށް އެދި ފޯމު ބަލައިގަތުން އާދީއްތަ ދުވަހުން (މާދަމާ) ފެށިގެން ކުރިއަށްދާނެ ކަމަށް ހައުސިން މިނިސްޓްރީން ބުނެފިއެވެ.
އެ މިނިސްޓްރީން ބުނެފައި ވަނީ އާދިއްތަ ދުވަހު ހެނދުނު 10:30 އިން 1:30 އަށް އަދި ރޭގަނޑު 9:00 އިން 11:00 ން ފެށިގެން އަންނަ ޖުލައި މަހުގެ ނިޔަލަށް ފޯމް ބަލައިގަތުމުގެ ކަންކަން ދަރުބާރުގޭގައި ކުރިއަށް ދާނެ ކަމަށެވެ.
ހައުސިން މިނިސްޓްރީން ހިންގާ ހިޔާ މަޝްރޫއުގެ ދަށުން ފްލެޓްތަށް ދޫކުރުމަށް ހަމަޖެހިފައި ވަނީ 12 ކެޓަގަރީއަކަށް ބަހާލައިގެންނެވެ. ހައުސިން މިނިސްޓްރީން ބުނެފައި ވަނީ ޖުލައި މަހުގެ 31 ގެ ނިޔަލަށް ފޯމު ހުށަހެޅޭނެ ކަމަށާއި ކިޔުޖެހިގެން ފޯމު ލާން ނުޖެހޭނެ ކަމަށެވެ. އަދި ކިއު ހެދުން ކުޑަކުރުމަށް އިލެކްޓްރޯނިކް ކިއު ސިސްޓަމް ގާއިމުކުރުމަށް ހަމަޖައްސާފައިވާ ކަމަށް އެ މިނިސްޓްރީން ބުނެފައި ވެއެވެ. ކިއުބީ އެޕްލިކޭޝަނަކީ މިހާރު ވެސް ސަރުކާރުގެ ބައެއް އޮފީސްތަކާއި ބައެއް ކުންފުނިތަކުގައި މިހާރު ވެސް ބޭނުންކުރާ ސިސްޓަމެކެވެ. އެ އެޕް މެދުވެރިކޮށް ޚިދުމަތް ދެމުން ގެންދާ ނަންބަރާއި ބާކީ އޮތް ނަންބަރާއި ވަގުތު އަންގައިދީ ކުރިއާލާ އެލާޓްކޮށްދެއެވެ. ފޯމް ބަލައިގަތުމަށް ދަރުބާރު ގޭގައި ގާއިމުކޮށްފައިވާ މަރުކަޒުގައި ގިނަ އަދަދެއްގެ ކައުންޓަރުންތައް ގާއިމުކުރާނެ ކަމަށް ވެސް ހައުސިން މިނިސްޓްރީން ބުނެފައި ވެއެވެ.
ފްލެޓް ފޯމު ދޫކުރަނީ ހުޅުމާލޭގައި އިމާރާތްކުރާ ޝޯޝަލް ހައުސިން ޔުނިޓުން ދޫކުރާ 7،000 ފްލެޓަށެވެ. އޭގެ ތެރޭގައި ހިމެނެނީ ސިވިލް ސާވިސް މުވައްޒަފުންނަށް 1000 ފްލެޓާއި، 18 އަހާރާއި 40 އަހަރާއި ދެމެދުގެ ކައިވެނިކޮށްގެން އުޅޭ މީހުންނަށް 1000 ފްލެޓާއި، ދަފުތަރުގައި ނުހިމެނޭ މާލޭ ރަށްވެހިންނަށް 1000 ފްލެޓާއި، ދަފުތަރުގައި ރަޖިސްޓްރީވެފައިވާ ފަރާތްތަކަށް 1044 ފްލެޓެވެ. އަދި ޑޮކްޓަރުންނާއި ނަރުހުންނަށް 475 ފްލެޓާއި، ޓީޗަރުންނަށް 625 ފްލެޓާއި، އެކަނިވެރި މައިންނާއި ބައިފައިންނަށް 500 ފްލެޓާއި، ނުކުޅެދުންތެރިކަން ހުންނަ ފަރާތްތަކަށް 200 ފްލެޓެވެ. މީގެ އިތުރުން ފުލުހުންނާއި ސިފައިންނަށް 600 ފްލެޓާއި ގުޅީފަޅުން ފްލެޓް ގަތުމަށް ފައިސާ ދައްކައި ފްލެޓް ނުލިބުނު ފަރާތްތަކާއި، ޓާޓާ ފްލެޓަށް ފައިސާ ނުދެއްކުނު ފަރާތްތަކަށް 300 ފްލެޓް އަދި މާފަންނު ހުޅަނގުގައި ނިކަމެތިކޮށް އުޅޭ ފަރާތްތަކަށް 256 ފްލެޓްކަމަށް ހައުސިން މިނިސްޓްރީ އިން ބުނެއެވެ.
މިކެޓަގަރީތަކުގެ ތެރެއިން ފޯމު ލެވޭނީ ބޭނުންވާ ކޮންމެވެސް އެއް ކެޓަގަރީއަކަށެވެ.
މި ސްކީމްގެ ދަށުން ދެމަފިރިންނަށް ފްލެޓް ލިބިއްޖެ ކަމުގައިވާ ނަމަ އޭގެ ތެރެއިން އެކަކު ފްލެޓް ދޫކޮށްލަންޖެހެއެވެ. އެހެން ނަމަވެސް 600 އަކަފޫޓަށް ވުރެ ކުޑަކޮށް ގެއެއް ނުވަތަ ފްލެޓެއް ލިބިފައިވާ ކަމުގައިވާ ނަމަ އެމީހަކަށް މި މަޝްރޫއުގެ ދަށުން ފްލެޓް ލިބޭނެ ކަމަށް ވެސް ހައުސިން މިނިސްޓަރ ވަނީ ވިދާޅުވެފައެވެ. މި ފްލެޓްތައް ބޭނުން ވެގެން މިހާތަނަށް ދަރުބާރުގެ މަރުކަޒުން 40،000 އަށް ވުރެ ގިނަ ފޯމު ނަގާފައިވާ އިރު އޮންލައިން މެދުވެރިކޮށް ވެސް ގިނަ ބަޔަކު ވަނީ ފޯމް ނަގާފައެވެ.
