ފްލެޓަށް އެދޭ ފޯމު ދޫކުރާ ގޮތުގެ މައުލޫމާތު މާދަމާ ހެނދުނު އިއުލާންކުރަނީ
7000 ފްލެޓަށް މިފަހަރު ހުޅުވާލާނެ
އެމްޑީޕީ ސަރުކާރުގެ ދުވަސްވަރު މަސައްކަތް ފެށި ޓާޓާ ފްލެޓްތައް
ބޯހިޔާވަހިކަމުގެ މަޝްރޫޢުގެ ދަށުން އިތުރު 7000 ފްލެޓަށް ފުރުސަތު ހުޅުވާލުމަށް އާދިއްތަ ދުވަހު ފޯމު ދޫކުރަން ފަށާއިރު، ފޯމު ދޫކުރާނެ ގޮތުގެ ތަފްޞީލް މައުލޫމާތު އާދިއްތަ ދުވަހު ހެނދުނު ބާއްވާ ނޫސްވެރިންގެ ބައްދަލުވުމެއްގައި ހާމަކުރާނެކަމަށް ހައުސިންގ މިނިސްޓްރީއިން ބުނެފިއެވެ.
ހައުސިންގ މިނިސްޓްރީއިން ބުނެފައިވަނީ ފޯމު ދޫކުރުމުގައި ފަސޭހަ ގޮތްތަކެއް މިފަހަރު އިންތިޒާމްކުރެވޭނެ ކަމަށެވެ. މީގެ ކުރިން ފޯމު ނެގުމަށްވެސް ބޮޑު ކިޔޫ ހަދާއިރު، އެކަމުގެ ސަބަބުން ފްލެޓަށް އެދޭ ފަރާތްތަކަށް ދަތިތަކާއި ދިމާވެއެވެ.
ހައުސިންގ މިނިސްޓަރ ޑރ. މުހައްމަދު މުއިއްޒު ކުރައްވާފައިވާ ޓުވީޓެއްގައިވަނީ، "ފްލެޓަށް އެދި ފޯމު ދޫކުރާ ވަގުތުތަކާއި، ފޯމު ދޫކުރުމާއި ބެހޭ އެންމެހާ އިންތިޒާމްތަކާއި, ފޯމާއި ކެޓަގަރީތަކުގެ ތަފްސީލް މައުލޫމާތުފަދަ މުހިއްމު ހުރިހާ މައުލޫމާތެއް 6 މެއި ހެނދުނު 10:00 ގައި އޮންނަ ލައިވް ޕްރެސް ކޮންފަރެންސްގައި ހިއްސާކުރެވޭނެ" ކަމަށެވެ.
ފޯމު ދޫކުރާ ގޮތަށް ހަަމަޖެހިފައިވަނީ ދަރުބާރުގެއިންނެވެ. އަދި މިނިސްޓްރީގެ ވެބްސައިޓުންވެސް ޑަައުންލޯޑްކުރެވޭނެއެވެ.
މި 7000 ފްލެޓް ޚާއްސަ ކޮށްފައިވާ ގޮތުގެ ތަފްޞީލް
- މާލޭ ދަފްތަރުގައި ރަޖިސްޓްރީވެފައިވާ މީހުންނަށް: 1،044 ފްލެޓް
- ސިވިލް ސަރވަންޓުންނަށް: 1،000 ފްލެޓް
- މާލޭގެ ރަށްވެހިންނަށް: 1،000 ފްލެޓް
- ކައިވެނިކޮށްގެން އުޅޭ 18 އަހަރާއި 40 އަހަރާއި ދެމެދުގެ މީހުންނަށް: 1،000 ފްލެޓް
- ޓީޗަރުންނަށް: 650 ފްލެޓް
- ފުލުހުންނާއި ސިފައިންނަށް: 600 ފްލެޓް
- ޑޮކްޓަރުންނާއި ނަރުހުންނަށް 475 ފްލެޓް
- އެކަނިވެރި މައިންނާއި ބަފައިންނަށް: 400 ފްލެޓް
- ގުޅީފަޅުން ފްލެޓް ގަތުމަށް ފައިސާ ދައްކައި ފްލެޓް ނުލިބުނު މީހުންނަށާއި، ޓާޓާ ފްލެޓްތަކަށް ފައިސާ ނުދެއްކުނު މީހުންނަށް: 300 ފްލެޓް
- މާފަންނު ހުޅަނގު ދާއިރާގައި ނިކަމެތިކޮށް ދިރިއުޅޭ އާއިލާތަކަށް: 256 ފްލެޓް
- ނުކުޅެދޭ އާއިލާތަކަށް: 200 ފްލެޓް
ފްލެޓަށް ކުރިމަތިލުމަށް ފޯމު ދޫކުރުމަށް ތައްޔާރުވަމުން އަންނައިރު، މިސަރުކާރުގެ ބޯހިޔާވަހިކަމުގެ މަޝްރޫޢުގައި ކޮރަޕްޝަން އިންތިހާއަށް އެކުލެވޭކަމަށް ގިނަ ބަޔަކު ދަނީ ބުނަމުންނެވެ. އަދި ފްލެޓް ދޫކުރުމުގައި ސަރުކާރުގެ އިސްވެރިންނާއި ވެރިކަންކުރާ ޕާޓީ ޕީޕީއެމްގެ މެމްބަރުންނަށް އިސްކަންދޭކަމަށް ބައެއް ފަރާތްތަކުން ދަނީ ތުހުމަތުކުރަމުންނެވެ.
